Lufta/ Kim Jong Un në Rusi me trenin e blinduar, SHBA drejt dërgimit të raketave me rreze të gjatë veprimi në Ukrainë! Putin thotë se Trump po persekutohet politikisht

Kancelari gjerman, Olaf Scholz, mohoi "historitë" sipas të cilave një marrëveshje paqeje e lidhur midis Ukrainës dhe Rusisë ishte negociuar tashmë në pranverën e vitit 2022, menjëherë pas fillimit të luftës, por ishte shkatërruar nga Shtetet e Bashkuara ose nga Britania e madhe. 

"Jo, kjo nuk është e vërtetë", tha Scholz gjatë takimit "Guximi i Paqes" të Komunitetit të Sant'Egidio. 

Palët ende po bisedonin me njëra-tjetrën, "por gjithçka që do të ishte e mundur si një marrëveshje u shkatërrua sepse presidenti rus përdori kohën vetëm për të udhëhequr trupat e tij rreth Ukrainës pas sulmit të dështuar në kryeqytetin Kiev dhe për të vazhduar sulmin në vendi në lindje të Ukrainës”, shpjegoi më tej Scholz.

Vizita e Kim Jong-un në Rusi është "një shenjë" e izolimit të presidentit rus, Vladimir Putin, nga komuniteti ndërkombëtar, deklaroi qeveria franceze. 

"Rusia është e izoluar deri në atë pikë sa është e detyruar të kthehet drejt Koresë së Veriut. Është shenjë e një izolimi shumë të fortë në nivel ndërkombëtar", tha zëdhënësja e Ministrisë së Jashtme franceze, Anne-Claire Lezhandre, në një konferencë shtypi në Paris. 

Kremlini sot ka siguruar se takimi mes liderit rus, Vladimir Putin dhe të Koresë së Veriut, Kim Jong-un do të zhvillohet "në ditët në vijim", të cilët do të bisedojnë për bashkëpunimin dypalësh në fusha të ndryshme, por edhe për çështje “të ndjeshme”.  

Qeveria polake do të vendosë në mënyrë të njëanshme që të bllokojë grurin ukrainas duke filluar nga 15 shtatori, nëse Komisioni Evropian nuk e zgjeron ndalimin e importit të grurit, misrit, rapes dhe lulediellit nga Ukraina në pesë vende të BE-së.

Pesë vendet e BE-së janë Poloni, Sllovaki, Hungari, Rumani, Bullgaria. 

Kjo u njoftua nga kreu i qeverisë polake Mateusz Morawiecki dhe ministri i bujqësisë Robert Telus, siç raportohet nga agjencia e lajmeve ukrainase Ukrinform. 

"Polonia nuk do të lejojë që të ‘mbytemi’ me grurë ukrainas. Cilido qoftë vendimi i autoriteteve të Brukselit, ne nuk do t'i hapim kufijtë tanë", shkroi Morawiecki në X.

Kremlini ka siguruar se takimi mes liderit rus, Vladimir Putin dhe të Koresë së Veriut, Kim Jong-un do të zhvillohet "në ditët në vijim". 

Këtë e ka bërë të ditur zëdhënësi i presidentit rus, Dmitri Peskov, duke iu përgjigjur një pyetjeje të gazetarëve në margjinat e Forumit Ekonomik Lindor në Vladivostok. 

Peskov nuk ka dashur të specifikojë se ku do të zhvillohet takimi.

Vladimir Putin tha se nga 1 mijë deri në 1,500 rusë në ditë kanë nënshkruar çdo ditë kontrata vullnetare për t’u bashkuar me ushtrinë.

Kjo ishte një përgjigje e Putin ndaj pyetjes nëse Rusia kishte nevojë të prezantonte një mobilizim të ri të detyrueshëm për të rritur përpjekjet e saj ushtarake në Ukrainë apo të asaj që Kremlini kishte thënë vazhdimisht se kjo gjë nuk ishte e nevojshme.

Gjatë gjashtë apo shtatë muajve të fundit, 270 mijë njerëz kanë nënshkruar kontrata vullnetare, tha Putin. Agjencia e lajmeve Reuters vëren se kjo është një shifër pak më e ulët se 280 mijë që deklaroi ish-presidenti, Dmitry Medvedev, në fillim të këtij muaji.

Ditën e djeshme, Ministria e Mbrojtjes e Mbretërisë së Bashkuar tha në konferencën e saj të përditshme të inteligjencës se Rusia ndoshta do të kërkonte të shmangte një mobilizim të detyruar përpara zgjedhjeve presidenciale të vitit të ardhshëm që do të mbahen në mars.

Presidenti rus, Vladimir Putin, tha se Rusia e pranon gabimin e politikës së jashtme të BRSS për tanket sovjetike në Hungari dhe Çekosllovaki.

 Putin e deklaroi këtë gjatë seancës plenare të Forumit Ekonomik Lindor. 

"Ne kemi pranuar prej kohësh se kjo pjesë e politikës së Bashkimit Sovjetik ishte e gabuar dhe çoi në përshkallëzimin e tensioneve", tha Putin, duke iu përgjigjur moderatorit, i cili citoi autoritetet çeke dhe hungareze të kenë thënë se "BRSS u soll si një kolonizator kur solli tanke në Pragë dhe Budapest”, raportoi agjencia Tass.

Nëse Shtetet e Bashkuara mendojnë se presidenti ukrainas është gati të ulet në një tryezë bisedimesh me Rusinë, duhet të anulojë urdhrin e Zelensky për ndalimin e çdo bisede përsa i përket negociatave, tha Putin.

“Duhet ta pyesni pse i bën këto deklarata, sepse unë nuk e di. Sa i përket procesit të negociatave, nëse Shtetet e Bashkuara besojnë se Ukraina është gati për bisedime, le ta anulojnë urdhrin e presidentit ukrainas për ndalimin e negociatave”, tha Putin.

Përmes këtij fjalimi ai i’u përgjigj edhe pyetjes se pse sekretari amerikan i shtetit Antony Blinken bëri deklarata për bisedimet midis Rusisë dhe Ukrainës.

Presidenti rus, Vladimir Putin, i ka cilësuar hetimet gjyqësore kundër ish-Presidentit të SHBA-së, Donald Trump, si “një persekutim për arsye politike”.

Këtë deklaratë lideri rus e bëri në Forumin Ekonomik Lindor në Vladivostok, Rusi, i cili foli për marrëdhëniet me SHBA-në, të cilat ai tha se Moska i konsideron "një armik të përhershëm". Ai tha se "shumë njerëz" në Amerikë po kërkojnë marrëdhënie të mira me Rusinë.

Putin tha se kushdo që do bëhet president i SHBA-së nuk do të kishte ndryshime thelbësore në politikën amerikane ndaj Rusisë.

“Hetimet gjyqësore kundër Donald Trump në SHBA janë një persekutim për arsye politike. Kushdo që do bëhet president, nuk do të ketë ndryshime thelbësore në politikën amerikane ndaj Rusisë", tha Putin.

Presidenti rus, Vladimir Putin dhe lideri i Koresë së Veriut, Kim Jong-un do të bisedojnë për bashkëpunimin dypalësh në fusha të ndryshme, por edhe për çështje “të ndjeshme”. 

Këtë e bëri të ditur zëdhënësi i Kremlinit, Dmitry Peskov, duke shtuar se Putini është gjithashtu i gatshëm të flasë për sanksionet e OKB-së kundër Phenianit. 

Por, përsa i përket paralajmërimeve të Uashingtonit për shitjet e armëve të Koresë së Veriut në Rusi, Moskë dhe Phenian, "do të udhëhiqen nga interesat e tyre".

“Mbi të gjitha do të diskutohen çështjet që kanë të bëjnë me marrëdhëniet dypalëshe, bashkëpunimin, lidhjet tregtare dhe ekonomike dhe shkëmbimet kulturore. Sigurisht që do të ketë një shkëmbim intensiv të mendimeve për situatën në rajon dhe çështjet ndërkombëtare në përgjithësi, sepse kjo është në interesin si të Putinit po ashtu edhe të mysafirit tonë nga Pheniani”, tha Peskov, cituar nga agjencia e lajmeve Tass, në lidhje me takimin Putin-Kim.

Peskov gjithashtu tha se Rusia dhe Koteja e Veriut po veprojnë në sfera të caktuara të ndjeshme që nuk mund të zbulohen apo shpallen publikisht.

Ai shtoi se Rusia ishte e gatshme për diskutimin e sanksioneve të Këshillit të Sigurimit të OKB-së kundër Koresë së Veriut.

“Sigurisht, duke qenë fqinjë, vendet tona veprojnë në sfera të caktuara të ndjeshme që nuk mund të zbulohen apo shpallen publikisht. Nëse është e nevojshme, Rusia është e gatshme të diskutojë sanksionet e Këshillit të Sigurimit të OKB-së kundër Koresë së Veriut”, tha Peskov.

Duke komentuar paralajmërimin e Shtëpisë së Bardhë kundër shitjes së armëve nga Koreja e Veriut në Rusi, Peskov tha se nuk ishte i interesuar për komentet e Uashingtonit.

“Ne do të udhëhiqemi nga interesat e dy vendeve tona”, tha ai.

Kreu i agjencisë shtetërore ruse bërthamore Rosatom, Alexei Lijachev, akuzoi autoritetet ukrainase se kanë nisur një sulm me dron në qytetin Energodar në rajonin Zaporizhzhia të Ukrainës, i cili është shtëpia e termocentralit më të madh bërthamor në Evropë.

"Dje ka pasur disa sulme me dronë në territorin e Energodarit. Dy pajisje u neutralizuan dhe katër të tjera filluan sulmet. Për fat të mirë nuk ka të vdekur apo të lënduar", tha ai për agjencinë Interfax.

Sipas kreut të Rosatom, kjo është "përgjigjja" e Kievit ndaj zgjedhjeve të organizuara nga Rusia në katër rajonet e aneksuara nga Ukraina në shtator 2022, përfshirë Zaporizhzhia.

"Unë besoj se kjo është një përgjigje ndaj zgjedhjeve. Zgjedhjet në Energodar ishin më të zhvilluara se në pjesën tjetër të rajonit të Zaporizhzhia, duke gjykuar rezultatet e partisë Rusia e Bashkuar", tha Alexei.

Sipas autoriteteve zgjedhore ruse, partia e Kremlinit, Rusia e Bashkuar, fitoi më shumë se 80% të votave në Zaporizhzhia.

Trafiku në urën që lidh Rusinë kontinentale me gadishullin e okupuar të Krimesë u ndal përkohësisht gjatë natës.

Operatori i instaluar nga Rusia i urës konfirmoi pezullimin herët në mëngjes, por nuk tha pse kishte ndodhur.

Moska ka pohuar disa herë në muajt e fundit se Ukraina ka shënjestruar urën kritike me raketa dhe drone.

Më pare, Presidenti i Ukrainës, Volodymyr Zelensky, tha se ura që lidh Krimenë me Rusinë “sjell luftë jo paqe” dhe për këtë arsye ishte një objektiv legjitim ushtarak.

Presidenti ukrainas, Volodymyr Zelensky, ka vënë veton ndaj një ligji që do të vononte zyrtarët publikë që të deklaronin pasuritë e tyre.

Presidenti, i cili po merret me një sërë pretendimesh për korrupsion në qeverinë dhe ushtrinë e tij, thotë se deklaratat duhet të hapen "menjëherë".

Parlamenti votoi javën e kaluar për të rivendosur një rregull kundër korrupsionit që u pezullua për shqetësime sigurie pasi Rusia pushtoi në 2022.

Në një postim në faqen e mediave sociale X, ish-Twitter, në momentet e fundit, Zelensky tha: "Arsyeja është e qartë: deklaratat duhet të zbulohen dhe zbatohen plotësisht. Tani për tani, jo pas një viti. Regjistri duhet të hapet menjëherë. Ky ndryshim duhet të bëhet përpara se ligji të miratohet përsëri”.

Presidenti rus, Vladimir Putin, ka paraqitur një projektligj në Dumën e Shtetit, i cili propozon vendosjen e një feste të re kombëtare, atë të 30 shtatorit, kushtuar ribashkimit me Rusinë të rajoneve të pushtuara ukrainase, ato të Donetskut, Luganskut, Zaporozhzhya dhe Kherson. 

Lajmi është bërë i ditur nga agjencia Ria Novosti.

Të paktën 9,614 civilë janë vrarë dhe 17,535 të tjerë janë plagosur në konfliktin në Ukrainë që nga fillimi i pushtimit rus të vendit më 24 shkurt 2022, tha Zyra e Komisionerit të Lartë të Kombeve të Bashkuara për të Drejtat e Njeriut (OHCHR)

Në 10 ditët e para të shtatorit, thekson OHCHR, 55 civilë u vranë, duke përfshirë një vajzë të vogël dhe 237 të tjerë u plagosën.

Të dhënat përfshijnë 47 persona të vrarë në territorin e kontrolluar nga Ukraina dhe 8 të vrarë në territoret e pushtuara.

Një zyrtar rus ka akuzuar Ukrainën për kryerjen e një sulmi me dron pranë uzinës bërthamore të okupuar në Zaporizhzhia në Ukrainën jugore.

Alexei Likhachev, kreu i firmës shtetërore bërthamore ruse Rosatom, tha se gjashtë dronë u lëshuan në qytetin Enerhodar, i cili ndodhet pak më shumë se 4 km larg uzinës.

Të gjitha u shkatërruan, tha zoti Likhachev, në komentet e cituara nga agjencia ruse e lajmeve RIA.

Vladimir Putin tani po mban një fjalim në Forumin Ekonomik Lindor në qytetin lindor të Rusisë, Vladivostok. 

Ai ka përdorur edhe një herë platformën për të sulmuar Perëndimin, të cilin ai e akuzon për "shkatërrim të sistemit të marrëdhënieve tregtare dhe financiare".

Ai tha gjithashtu se vendi i tij është "i hapura për tregti". Forumi ka për qëllim nxitjen e investimeve në rajonin rus.

Putin nuk e ka përmendur ende vizitën e Kim Jong Un në fjalimin e tij të fokusuar në tregti dhe ekonomi.