Lufta në Ukrainë/ Von der Leyen: Po i japim Kievit 6 miliardë euro! Zelensky: Vendimi për t'u tërhequr nga Pokrovsk varet nga ushtria

Duhet ndalur dërgimi i parave evropiane në Ukrainë, në dritën e skandalit aktual të korrupsionit. Kështu është shprehur ministri i Jashtëm i Hungarisë, Péter Szijjártó.
“Prej vitesh tashmë funksionimi i shtetit ukrainas financohet me paratë e qytetarëve evropianë. Ndërkohë, korrupsioni në Ukrainë është jashtë çdo kontrolli, ndaj nuk është për t’u habitur që askush nuk ka parë ndonjë raport të qartë se si janë shpenzuar realisht fondet e BE-së. Dhe tani çfarë do të bëjë Brukseli? Të dërgojë edhe më shumë para në Ukrainë, tek presidenti Volodymyr Zelensky, rrethi i ngushtë i të cilit sapo është zbuluar si përgjegjës për një rrjet të madh korrupsioni,” shkroi Szijjártó në një mesazh në X.

“Është koha t’i japim fund kësaj çmendurie. Duhet të ndalojmë dërgimin e parave të qytetarëve evropianë në Ukrainë,” përfundoi ministri i Jashtëm hungarez.

Sekretari i Përgjithshëm i NATO-s, Mark Rutte, gjatë një vizite në Komandën e Forcave të Përbashkëta Aleate në Brunssum, tha se 'Moska po na vë vazhdimisht në provë'.

“Rusia po e teston vazhdimisht reagimin tonë në kuadrantët lindorë dhe veriorë, dhe çdo ditë prania jonë në terren tregon gatishmërinë tonë për të mbrojtur çdo centimetër të tokës aleate', tha ai. 

“Ne sfidohemi çdo ditë nga operacionet hibride”, tha komandanti Ingo Gerhartz.

Presidenti ukrainas Volodymyr Zelensky shkoi në rajonin e Zaporizhzhias për një takim informues mbi sigurinë me komandën ushtarake.

“Vëmendja kryesore ishte përqendruar te situata operacionale në jug, te detyrat e brigadave dhe regjimenteve, si dhe te masat ushtarake dhe të personelit për të stabilizuar situatën në zonën e Rivnopillyas,” vuri në dukje Zelensky, duke shtuar se “u diskutua gjithashtu forcimi i sektorit të Stepnohirskut me ndërhyrje të inxhinierisë ushtarake dhe evakuimi i civilëve nga zonat e caktuara.”

“Ukraina lindore përfaqëson, pa dyshim, një sfidë të madhe, dhe këtu, në drejtimin e Orikhivit, situata ka qenë gjithmonë e tensionuar,” shkroi Zelensky, duke theksuar se “i gjithë rajoni i Zaporizhzhias dhe qyteti i Zaporizhzhias janë jashtëzakonisht të rëndësishëm.”

Herët a vonë, negociatat midis Rusisë dhe Ukrainës do të duhet të rifillojnë, por atëherë Kievi do të jetë në një pozicion edhe më të dobët. Ky është paralajmërimi i lëshuar sot nga zëdhënësi i Kremlinit, Dmitry Peskov. 

"Deklarata e Ministrisë së Jashtme ukrainase për pezullimin e bisedimeve me Rusinë formalizon ngurrimin de facto të Kievit për t'u angazhuar në dialog dhe kjo është e trishtueshme.  Për shkak të pamundësisë së vazhdimit të dialogut, ne do të vazhdojmë operacionin ushtarak special në çdo mënyrë për të arritur qëllimet e formuluara nga Komandanti Suprem, Presidenti", tha Peskov.