Lufta në Ukrainë/ Blinken kërkon takim me Lavrov, për herë të parë që prej nisjes së luftës! Zelensky: Moska përdor gaz për të terrorizuar Evropën

Sekretari amerikan i Shtetit Antony Blinken synon të flasë me ministrin e Jashtëm rus Sergej Lavrov për herë të parë që nga fillimi i luftës në Ukrainë më shumë se pesë muaj më parë.

Diplomati i lartë amerikan tha të mërkurën se ai priste një telefonatë me homologun e tij rus këtë javë për të diskutuar një "propozim thelbësor" të paraqitur në Moskë "javë më parë" në përpjekje për të siguruar lirimin e dy amerikanëve të ndaluar gabimisht - Paul Whelan dhe Brittney Griner.

Ai gjithashtu planifikon të diskutojë marrëveshjen e nënshkruar së fundmi për të lejuar drithin ukrainas të kalojë tranzit përmes Detit të Zi.

Duke folur në një konferencë shtypi në Departamentin e Shtetit, Blinken tha se nuk do të negocionte për Ukrainën në një telefonatë me Lavrov, duke përsëritur se ata nuk do të diskutonin Ukrainën pa Ukrainën.

Ukraina konfirmoi sot (e mërkurë) se ka filluar puna në tre portet e vendit, që kanë dalje në Detin e Zi, për rifillimin e eksporteve të grurit. “Pas nënshkrimit të marrëveshjes nga Rusia për zhbllokimin të porteve të Ukrainës për eksportin e grurit, puna ka rifilluar në portet në Odesa, Chornomorsk dhe Pivdeny”, theksohet në një njoftim në shpërndarë në rrjetet sociale nga marina ukrainase.

Nga ana tjetër, ministri turk i Mbrojtjes, Hulusi Akar, njoftoi se në Stamboll është krijuar një grup pune që do të mbikëqyrë eksportin e drithërave ukrainase, pas marrëveshjes të cilësuar historike që u arrit edhe me pjesëmarrjen e OKB-së.

Rusia dhe Ukraina nënshkruan marrëveshjen, të ndërmjetësuar nga Ankaraja dhe Kombet e Bashkuara, të premten e kaluar për të rihapur eksportet e grurit dhe plehrave që janë bllokuar nga lufta duke lehtësuar kështu një krizë ndërkombëtare ushqimore.

Sipas ministrit turk grupi prej 20 personash, punonjës nga Ukraina, Rusia, Turqia dhe Kombet e Bashkuara “do të punojnë krah për krah për të siguruar që eksportet të kryhen sipas marrëveshjes”. Ndërkohë kryeministri polak tha se “nuk mund t’i besohet Rusisë se do të respektojë këtë marrëveshje”, pasi sipas tij një ditë pas firmosjes Moska sulmoi me raketa portin e Odesës në Ukrainë.

OKB-ja dhe Turqia shpresojnë se nga Ukraina do të eksportohet më shumë se 25 milion ton grurë. OKB-ja, Ukraina dhe Rusia kanë thënë të gjithë se presin që eksportet të fillojnë brenda pak ditësh. Por zëvendësministri i Jashtëm rus Andrei Rudenko tha të mërkurën se marrëveshja mund të prishet nëse pengesat ndaj eksporteve bujqësore të Rusisë nuk hiqen menjëherë.

Dërgesat e Ukrainës përmes detit kanë ngecur që nga muaji shkurt, duke shkaktuar një rritje të mprehtë të çmimeve globale për drithërat, vajrat e gatimit, karburantet dhe plehrat. Moska ka mohuar përgjegjësinë për krizën ushqimore, duke fajësuar sanksionet perëndimore për ngadalësimin e eksporteve./VOA

Separatistët e mbështetur nga Moska kanë pretenduar se kanë marrë kontrollin e termocentralit të dytë më të madh me thëngjill në Ukrainë, i cili gjendet në rajonin lindor Donjeck. Ky njoftim u bë pasi Rusia ka shënjestruar rajonet Odesa dhe Mikollaiv me sulme ajrore më 26 korrik, duke goditur ndërtesa private dhe infrastrukturë tjetër. Ndonëse në disa fotografi të mediave separatiste ruse, është thënë se shihen mercenarët e grupit privat ushtarak Vagner para termocentralit, ky pretendim rus nuk është vërtetuar në mënyrë të pavarur.

Shtabi i Përgjithshëm i Ukrainës nuk e ka përmendur termocentralin në raportin e saj ditor, mirëpo ka thënë se ka pasur luftime të ashpra në një fshat afër tij. Sipas Shtabit, trupat ukrainase kanë parandaluar luftimet përgjatë vijës së frontit në rajonet Donjeck dhe Harkiv më 26 korrik. Disa orë pas sulmeve, Kirill Stremousov, zëvendëskryetar i administratës ushtarako-civile për Hersonin, ka thënë se rajonet Odesa dhe Mikollaiv do të “çlirohen” nga forcat ruse.

Ushtria ukrainase, në anën tjetër, ka thënë se ka rrëzuar një dron rus dhe është duke tentuar të sulmojë një stacion radari në rajonin Mikollaiv. Si pasojë e bombardimeve ruse në 24 orët e fundit janë vrarë të paktën tre civilë dhe janë plagosur tetë të tjerë, ka thënë zyra e presidentit ukrainas më 26 korrik.

Sipas saj, bombardimet kanë vazhduar në gjithë vijën e frontit në rajonin Donjeck, pasi forcat ruse kanë shënjestruar qytetin Bakmut dhe qytete tjera. Ministrja gjermane e Mbrojtjes, Christine Lambrecht, ka thënë se Ukraina ka pranuar disa lansuese raketash dhe disa obusë nga Gjermania. Ajo i ka bërë këto deklarata një ditë pasi Ukraina ka pranuar tanket gjermane për mbrojtje ajrore./REL

Ministri i Jashtëm turk Mevlut Cavusoglu foli për marrëveshjen e korridorit të grurit, një marrëveshje që përfshin Rusinë dhe Ukrainën dhe tha se ajo rrit shanset për një armëpushim.

“Fatkeqësisht, ka vende që duan që kjo luftë të zgjatet dhe për fat të keq disa vende kanë kundërshtuar gjithashtu marrëveshjen e grurit, ata nuk e kuptojnë situatën në Ukrainë dhe dëmin që ajo shkakton për të gjithë botën. Nëse arrijmë të zgjidhim krizën e grurit, atëherë do të hapet një rrugë për një armëpushim”, u shpreh Cavusoglu, i cili konfirmoi rolin e Turqisë si ndërmjetës.