Rusia  ka vijuar me bombardimet në Ukrainë. Pesë persona u vranë dhe pesëmbëdhjetë u plagosën në një sulm me raketa të kryer nga trupat ruse në Kiev.  Sulmet dëmtuan urat Podilsko-Voskresensky dhe Darnytsky, teksa u godit edhe infrastruktura kritike.

Ndërkohë Polonia lëshoi paralajmërime,pasi një raketë ruse po vinte drejt territorit të saj. Aeroporti polak në Rzeszow pezulloi fluturimet për shkak të aktivizimit të avionëve ushtarakë, tha Agjencia Polake e Shërbimeve të Navigimit Ajror (PANSA) në X.

Shtetet e Bashkuara të Amerikës i kanë ofruar Ukrainës mundësinë e anëtarësimit në NATO në këmbim të heqjes dorë nga territoret e Donbasit që janë ende nën kontrollin e Kievit, si pjesë e negociatave për t'i dhënë fund luftës me Rusinë.

Ky opsion është diskutuar në muajt e fundit nga i dërguari special i Presidentit Donald Trump, Steve Ëitkoff, dhe dhëndri i presidentit, Jared Kushner, me zyrtarë ukrainas dhe evropianë.

Sipas burimeve të cituara nga Wall Street Journal, Kushner e ngriti çështjen javën e kaluar me Presidentin ukrainas Volodymyr Zelensky dhe përfaqësuesit evropianë gjatë një takimi në një aeroport ushtarak në Dublin.

Propozimi doli gjithashtu gjatë bisedimeve të fundit në Emiratet e Bashkuara Arabe. Një opsion i dytë i paraqitur nga Uashingtoni do të parashikonte në vend të kësaj ngrirjen e konfliktit përgjatë vijës aktuale të frontit, duke i lënë një pjesë të Donbasit Kievit, në këmbim të garancive ndërkombëtare të sigurisë përmes një traktati me Uashingtonin dhe, potencialisht, me vendet evropiane.

Presidenti amerikan Donald Trump ka thënë se presidenti rus Vladimir Putin dëshiron t’i japë fund luftës.

“Putin dëshiron t’i japë fund luftës, ai dëshiron që marrëveshja të arrihet dhe po lodhet nga kjo situatë”, tha presidenti, sipas Axios.

Ndërkohë, autoritetet lëshuan paralajmërime për një kërcënim të mundshëm me raketa në Poloni, ndërsa aeroporti i Rzeszow pezulloi fluturimet pas aktivizimit të avionëve ushtarakë, njoftoi Agjencia Polake e Shërbimeve të Navigimit Ajror (PANSA).

Sipas Washington Post, Donald Trump u ka kërkuar gjithashtu liderëve evropianë të arrijnë një marrëveshje me Moskën, duke sugjeruar që fondet e destinuara për ndihmën ushtarake ndaj Ukrainës të përdoren për nevojat e vendeve të tyre.

Rendit zhvillimet sipas orarit:
Ora 15:16
Dy raketa dhe një dron në territorin polak, Donald Tusk mbledh urgjentisht ministrat dhe krerët e sigurisë

1795184905_donaldtusk.JPG

Kryeministri polak, Donald Tusk ka thirrur një takim urgjent me ministrat, përfaqësuesit e Forcave të Armatosura dhe drejtuesit e shërbimeve të inteligjencës, pas rënies së dy raketave dhe një droni me motor reaktiv në territorin e Polonisë.

Ministri polak i Mbrojtjes, Władysław Kosiniak-Kamysz, bëri të ditur se një prej raketave ishte e tipit Kh-101 dhe kishte rënë pranë fshatit Nowy Lipowiec, në provincën e Lublinit. Raketa tjetër dhe droni u rrëzuan në dy zona të tjera.

“Po përballemi me një tjetër provokim nga Rusia. Sipas mendimit tim, data nuk është e rastësishme”, deklaroi Kosiniak-Kamysz për gazetarët, duke iu referuar edhe stërvitjeve ushtarake që po zhvilloheshin në rajon.

Ndërkohë, Komanda Operacionale e Forcave të Armatosura polake njoftoi se, për shkak të sulmeve ruse ndaj objektivave në Ukrainën perëndimore, avionë ushtarakë polakë po operonin në hapësirën ajrore të vendit. Gjithashtu, ishin aktivizuar sistemet tokësore të mbrojtjes ajrore, si masë parandaluese për garantimin e sigurisë.

Ora 13:37
Raketat ruse pranë Polonisë/ NATO mobilizon avionët luftarakë, Rutte: Incidenti është pasojë e luftës në Ukrainë, do të forcojmë mbrojtjen!

1795178665_rutte.JPG

Sekretari i Përgjithshëm i NATO-s, Mark Rutte, ka reaguar pas shkeljeve të hapësirës ajrore të Polonisë gjatë natës, duke e cilësuar incidentin si të rrezikshëm dhe pasojë të luftës së vazhdueshme të Rusisë kundër Ukrainës.

Rutte bëri të ditur se kishte zhvilluar një bisedë me kryeministrin polak, Donald Tusk, lidhur me incidentin, ndërsa në përgjigje të shkeljeve u mobilizuan avionët luftarakë të NATO-s.

"Fola me Donald Tusk rreth shkeljeve serioze të hapësirës ajrore polake që ndodhën gjatë natës. Në përgjigje, avionët luftarakë të NATO-s u mobilizuan. Ne qëndrojmë në solidaritet me Poloninë dhe do të vazhdojmë të forcojmë aftësitë tona parandaluese dhe mbrojtëse. Ky incident është qartësisht i rrezikshëm: pasojë e luftës së vazhdueshme të Rusisë kundër Ukrainës. Unë dënoj sulmet e Rusisë, si dhe luftën e saj të vazhdueshme. Ne mbetemi të bashkuar si aleatë dhe do të vazhdojmë të mbështesim Ukrainën.”- tha Rutte.

Kreu i NATO-s theksoi se aleanca qëndron në solidaritet të plotë me Poloninë dhe se do të vijojë të forcojë kapacitetet parandaluese dhe mbrojtëse.

 

Ora 11:40
Trump paralajmëroi evropianët: Putini është i lodhur dhe kërkon paqe! Pak orë më vonë Rusia ‘mbulon’ Ukrainën me raketa dhe dronë

1795092161_vladimirputin.jpg

Vetëm pak orë pasi Donald Trump u tha liderëve evropianë se Vladimir Putin ishte “i lodhur” dhe dëshironte t'i jepte fund luftës, Rusia ndërmori një nga sulmet më masive ajrore ndaj Ukrainës.

Bombardimet ndodhën pas takimit trepalësh mes Putinit, Trump dhe Xi Jinping në Kinë, ku tre liderët e paraqitën veten si një forcë për paqen në botë.

Megjithatë, në vend të një sinjali për uljen e tensioneve, Moska lëshoi rreth 100 raketa dhe 400 dronë drejt Ukrainës.

Sulmi vdekjeprurës ndodhi disa orë pasi Putin u largua nga Kina, pas një dite takimesh në Shenzhen me Presidentin e SHBA-së Donald Trump dhe udhëheqësin kinez Xi Jinping.

Bisedimet nuk arritën të sjellin ndonjë përparim në luftën më shumë se katërvjeçare të Moskës në Ukrainë dhe duket se u përdorën nga Putini si një mundësi për të përsëritur kërkesat e tij maksimaliste dhe narrativat e rreme rreth konfliktit para një audience globale./CNN

Ora 10:17
Sulmet ruse në Kiev dhe raketat ruse në Poloni, kryeministri polak: Nuk ka kërcënim nga ajri

1795166743_donlad.JPG

Kryeministri polak Donald Tusk ka reaguar pas zhvillimeve të fundit në Ukrainë dhe raportimeve për një objekt të paidentifikuar që ka rënë në territorin polak, rreth 45 kilometra nga kufiri me Ukrainën.

Tusk bëri të ditur se kishte marrë një raport nga ministri i Mbrojtjes, Władysław Kosiniak-Kamysz, dhe ministri i Brendshëm, Marcin Kierwiński, lidhur me situatën në qarkun Bilgoraj.

“Kam marrë një raport nga ministri i Mbrojtjes dhe ministri i Brendshëm mbi situatën në qarkun Bilgoraj. Aktualisht nuk ka kërcënim nga ajri. Autoritetet përkatëse janë në terren”, deklaroi kryeministri polak.

Alarmi u dha rreth orës 3:00 të mëngjesit në 25 qytete në kufirin me Ukrainën për shkak të një kërcënimi me raketa që rrjedhte nga një sulm ajror rus që po zhvillohej në Lviv. 

 

Ora 09:32
Moska: Pozicioni i BE-së në skenën botërore është anti-rus

1794900347_flamuriibe.jpg

Foto: Flamuri i BE-së

Politika e jashtme e BE-së po ngurtësohet dhe po kthehet gjithnjë e më shumë kundër Rusisë, tha zëvendësministri i Jashtëm rus Sergei Ryabkov.

"Ne i kemi informuar vazhdimisht kundërshtarët tanë, përfshirë brenda Bashkimit Evropian, se, duke pasur parasysh pozicionimin gjithnjë e më agresiv të këtij grupi në skenën ndërkombëtare dhe qëndrimin e tij qartësisht anti-rus, pretendimin e tij për një rol të rëndësishëm në mbrojtje dhe siguri, si dhe militarizimin e vazhdueshëm të Unionit dhe vendeve individuale, ne nuk shohim dallime themelore midis NATO-s dhe BE-së", tha Ryabkov.

"Ne besojmë se e gjithë kjo kërkon në mënyrë të barabartë një zgjidhje që garanton sigurinë tonë. Ky qëndrim është në zemër të qasjes që po zhvillojmë në kontaktet tona me Bashkimin Evropian dhe NATO-n, përfshirë në një format trepalësh", përfundoi Ryabkov.

Ora 07:55
Media amerikane: Trump po u bën presion evropianëve që të bëjnë paqe me Moskën

1795106844_trump.JPG

Foto: Donald Trump

Në telefonatën e tij dje në samitin "The Willing" në Berlin, Presidenti i SHBA-së Donald Trump u kërkoi qeverive evropiane të arrijnë një marrëveshje me Rusinë, në mënyrë që ato të mund të përdorin fondet e ndara për ndihmë ushtarake për Kievin për nevojat e tyre, thane burime për Washington Post.

Në fjalimin e tij nga Air Force One, shpjegojnë burimet, Trump "i inkurajoi" aleatët e tij "të arrijnë një marrëveshje me Kremlinin, në mënyrë që ata të mund të devijojnë fondet e destinuara për Ukrainën për nevojat e tyre".

Presidenti i SHBA-së thuhet se deklaroi se evropianët po shpenzojnë "miliarda e miliarda" për Ukrainën, para që në vend të kësaj mund të investohen në "vendet e tyre të bukura".

Ora 07:34
Raketë ruse drejt Polonisë, aeroporti në Rzeszow pezullon fluturimet

Polonia lëshoi një paralajmërim për një raketë ruse që po hynte drejt territorit të saj .

Aeroporti polak në Rzeszow pezulloi fluturimet për shkak të aktivizimit të avionëve ushtarakë, tha Agjencia Polake e Shërbimeve të Navigimit Ajror (PANSA) në X.