Përshkallëzohet lufta ajrore mes Rusisë dhe Ukrainës. Në 24 orët e fundit, Ukraina ka ndërmarrë një nga sulmet më të mëdha me dronë që nga fillimi i pushtimit rus, duke lëshuar, sipas Ministrisë ruse të Mbrojtjes dhe mediave shtetërore ruse, 1,478 dronë dhe të paktën nëntë raketa lundrimi drejt territorit të Rusisë.

Sulmet kanë shkaktuar viktima në disa rajone ruse. Fillimisht u raportua për të paktën gjashtë të vdekur, ndërsa gjatë paradites së 17 gushtit autoritetet ruse e rritën bilancin në nëntë viktima.

Në rajonin e Rostovit, guvernatori lokal raportoi për pesë persona të vrarë. Në Belgorod, autoritetet ruse thanë se gjashtë persona u vranë dhe katër të tjerë u plagosën në një sulm me raketa. Mes të plagosurve raportohet edhe një 14-vjeçar.

Ministria ruse e Mbrojtjes deklaroi se dronët ukrainas u interceptuan mbi 17 rajone, kryesisht në pjesën jugore dhe perëndimore të vendit. Sulmet prekën edhe zonën e kryeqytetit, ku autoritetet vendosën masa shtesë sigurie.

Në Moskë, rritja e kërcënimit nga dronët ka ndikuar edhe në aktivitetet publike. Organizatorët e Festivalit Ndërkombëtar të Orkestrave Ushtarake “Spasskaya Bashnia”, që zhvillohet tradicionalisht në Sheshin e Kuq, njoftuan anulimin e edicionit të këtij viti.

Sulmi masiv ukrainas vjen pas një serie goditjesh ruse ndaj objektivave në Ukrainë. Gjatë natës, forcat ruse goditën infrastrukturën portuale në rajonin e Odesës, ku u plagosën katër persona dhe u dëmtua edhe një anije civile.

Sipas Moskës, objektiv i sulmeve ishte edhe një qendër logjistike e kompanisë ukrainase Nova Post në portin e Odesës, si dhe infrastruktura në portin e Izmailit.

Sulmet e fundit tregojnë shkallën në rritje të luftës me mjete pa pilot. Ukraina po përdor gjithnjë e më shumë dronë me rreze të gjatë për të goditur objektiva në thellësi të territorit rus, ndërsa Rusia ka zgjeruar kapacitetet e saj për prodhimin dhe përdorimin masiv të dronëve kundër Ukrainës.

Përshkallëzimi vjen në një moment kur BE-ja po përgatit sanksione të reja ndaj Moskës.

Rendit zhvillimet sipas orarit:
Ora 12:37
Telegraph: Moska po ndërton baza të reja për dronë me rreze të gjatë veprimi

Rusia raportohet se ka ndërtuar ose rregulluar të paktën dhjetë baza për lëshimin e dronëve sulmues me rreze të gjatë veprimi, duke zgjeruar një rrjet që rrit ndjeshëm kapacitetin e saj për të kryer fushata masive ajrore kundër Ukrainës, shkruan Telegraph, duke parë imazhet satelitore, dokumentet dhe të dhënat e gjurmimit.

Gazeta britanike identifikoi të paktën 59 rampa të reja hekurudhore, infrastrukturë që lejon avionët të ngrihen pa iu drejtuar pistave konvencionale. Hetimi gjithashtu nxjerr në pah një zgjerim të konsiderueshëm të aftësive logjistike: një nga instalimet thuhet se ka hapësirë ​​të mjaftueshme për të akomoduar mbi një mijë avionë, ndërsa infrastruktura shtesë është ende në ndërtim e sipër.

Disa nga platformat e reja, vëren Telegraph, teorikisht do të kishin rreze veprimi të mjaftueshme për të arritur territoret e NATO-s, përfshirë Varshavën, por kjo nuk tregon përgatitjet ruse për të goditur Poloninë ose vendet e tjera aleate. 

Xh.K/Shqiptarja.com