Një sulm masiv me dronë dhe raketa ukrainase ndaj portit rus të Novorossiysk ka dëmtuar dy terminale të mëdha të eksportit të grurit dhe ka goditur bazën e fundit të madhe detare ruse në Detin e Zi, raportojnë mediat e huaja.

Tre persona, përfshirë një fëmijë tetëvjeçar, u vranë dhe 24 të tjerë u plagosën në sulmin gjatë natës.

Presidenti i Ukrainës, Volodymyr Zelensky, tha se Kievi kishte përdorur raketa, avionë dhe dronë detarë në një “operacion unik” për të goditur bazën ruse, megjithëse nuk përmendi goditjen e terminaleve të grurit.

Më vonë, ushtria ukrainase tha se ishin goditur katër anije luftarake ruse, përfshirë dy fregata. Rusia nuk ka komentuar për këtë çështje.

“Flota pushtuese dhe e gjithë infrastruktura që e mbështet atë nuk do të jetë e sigurt për sa kohë që agresioni rus vazhdon,” tha Zelensky në një postim në rrjetet sociale.

Pjesa më e madhe e flotës ruse të Detit të Zi është ankoruar në Novorossiysk, një nga portet më të mëdha të Rusisë, pasi u detyrua të largohej nga baza e saj e mëparshme në Sevastopol, në gadishullin e Krimesë të pushtuar nga Rusia, i cili ishte shumë i ekspozuar ndaj sulmeve ukrainase.

Sulmi vjen pas një shtimi të shkëmbimit të goditjeve në Detin e Zi këtë verë, pas një periudhe qetësie relative.

Një kompani e madhe e tregtimit të grurit konfirmoi për agjencinë ruse të lajmeve TASS se terminali i saj ishte goditur në sulmin e së mërkurës, ndërsa një kompani tjetër i tha Reuters dhe medias ruse RBK të njëjtën gjë.

Ministria ruse e Bujqësisë njoftoi të mërkurën se po punonte për të orientuar flukset e ngarkesave drejt porteve në Detin Baltik dhe Detin Kaspik, si dhe drejt rrugëve tokësore. Ajo nuk bëri asnjë referencë për sulmet e Ukrainës, por tha se po “merrte parasysh kufizimet aktuale logjistike”.

Gjatë gjithë natës, mbi Novorossiysk u dëgjuan vazhdimisht shpërthime, ndërsa sistemet e mbrojtjes ajrore rrëzuan objekte fluturuese.

Të mërkurën u shpall gjendje e jashtëzakonshme në qytet, pasi një breshëri dronësh goditi zona përreth portit dhe dëmtoi tubacionet, duke pezulluar furnizimin me ujë për qytetin.

Diku tjetër në rajon, një person u vra nga mbeturinat e një droni, tha guvernatori rajonal Veniamin Kondratyev. Disa zona në rajonin përreth të Krasnodarit u goditën gjithashtu nga “disa qindra dronë” gjatë natës, shtoi Kondratyev, ndërsa dhjetëra ndërtesa u dëmtuan, përfshirë banesa.

Nga ana e saj, Moska ndërmori sulme ajrore gjatë natës, të cilat vranë të paktën 11 civilë në Ukrainë nga e marta deri të mërkurën.

Shumica e tyre u vranë kur Rusia goditi qytetin jugor të Zaporizhzhias me raketa balistike dhe bomba të drejtuara.

Në një intervistë për CNN, Zelensky tha se Ukrainës do t’i nevojitej një e dhjeta e rezervave aktuale amerikane të raketave interceptuese për të ndaluar të gjitha sulmet ruse me raketa balistike. Ai shtoi se pesë për qind e këtyre rezervave do ta ndihmonin Ukrainën të përballonte dimrin.

Ai tha se këtë vit Ukraina ka dy herë e gjysmë më pak raketa interceptuese sesa kishte në vitin 2025, ndërsa “Rusia ka dy herë më shumë raketa balistike në muaj sesa kishte më parë.”

Rendit zhvillimet sipas orarit:
Ora 15:37
Zelensky thirrje SHBA: Na shisni 10% të sistemeve ‘Patriot’, duhet të përfshiheni më shumë

Mungesa e raketave interceptuese po i kushton shumë Ukrainës, me qytete të pambrojtura teksa sulmet balistike ruse janë rritur ndjeshëm javët e fundit, duke goditur veçanërisht Kievin. Në një intervistë për CNN presidenti Zelensky apeloi Shtetet e Bashkuara të Amerikës të rrisin ndihmën ushtarake pasi Ukraina disponon vetëm një të dhjetën e raketave interceptuese që i nevojiten për t’u mbrojtur.

“Këtë vit kemi dy herë e gjysmë më pak raketa interceptuese sesa kishim në vitin 2025. Rusia ka dy herë më shumë raketa balistike në muaj sesa kishte më parë. Çdo natë keni sulme, dhe katër ose pesë herë në muaj kemi sulme masive. Njerëzit janë shumë heroikë, por janë të lodhur.Nëse SHBA na shesin 10%, ne do të shkatërrojmë të gjitha raketat balistike të rusëve. Unë kam 1%”, tha Zelensky.

Zelensky tha se po i lutej Shtëpisë së Bardhë drejtpërdrejt, me telefonata, mesazhe dhe tërthorazi përmes aleatëve, që të rriste ndihmën për programin Patriot, por ngurroi të jepte detaje mbi ndërveprimet e tij të fundit me administratën Trump.

"Kam disa muaj dhe miliona telefonata. Mundohem të shkëmbej diçka me raketa. Bëj disa gjëra që as nuk mund t'i ndaj. Kjo nuk do të thotë se është jashtë ligjit, por nuk mund të flas për këtë."

Presidenti ukrainas foli edhe për përpjekjet për një marrëveshje paqeje dhe tha se Ukraina kërkon përfshirje më të madhe të SHBA. Po ashtu ai akuzoi Vladimir Putinin se nuk ka interes real për t’i dhënë fund luftës.

Zelensky gjithashtu hodhi poshtë idenë që Ukraina të lëshojë territorin e mbetur në Donbas që Putini kërkon të pushtojë, duke thënë se garancitë e sigurisë mbeten thelbësore për Kievin.

Xh.K/Shqiptarja.com