Zelensky: Rusia ka filluar betejën për Dobasin! Putin nderon brigadën e masakrave në Bucha! Forcat ruse godasin fabrikën e çelikut në Mariupol, Ukraina: 1 mijë civilë të fshehur

Shtetet e Bashkuara mund të shpallin sanksione të reja kundër Rusisë në ditët në vijim. Kështu deklaroi zëdhënësja e Shtëpisë së Bardhë, Jen Psaki, duke përsëritur se Joe Biden nuk do të shkojë në Ukrainë. Ajo saktësoi se për arsye sigurie nuk do të thuhet se do të shkojë dhe kur do të shkojë.

"Tani mund të themi se trupat ruse kanë filluar betejën për Donbasin, për të cilën ata janë duke u përgatitur prej disa kohësh. Një pjesë e madhe e të gjithë ushtrisë ruse tani i është përkushtuar kësaj ofensive". Kështu ka thënë në Telegram presidenti ukrainas, Volodymyr Zelensky.

Qyteti i Mariupolit “nuk ekziston më” pas më shumë se një muaji rrethim nga Rusia. Ministri i Jashtëm ukrainas Kuleba tha se situata në Mariupol është e tmerrshme nga pikëpamja ushtarake dhe humanitare.

“Qyteti nuk ekziston më", shpjegoi ai, duke nënvizuar se "ajo që ka mbetur nga ushtarët dhe civilët ukrainas janë të rrethuar nga forcat ruse. Ata vazhdojnë të luftojnë, por si forcat e Moskës sillen duket se duan ta rrafshojnë qytetin me çdo kusht”.

Në paketën e fundit të armëve të dërguara nga SHBA në Ukrainë ka edhe 45,000 predha artilerie. Zëdhënësi i Pentagonit John Kirby tha se ushtarët amerikanë do të trajnojnë një grup të vogël ushtarësh ukrainas, jashtë Ukrainës në ditët e ardhshme, që të mësojnë përdorimin e këtyre armëve.

Ushtria ruse ka rrëmbyer ish-kryebashkiakun e Khersonit, Vladimir Nikolaenko, i cili udhëhoqi qytetin në jug të Ukrainës nga viti 2014 deri në vitin 2020.

Të paktën një mijë civilë fshihen në strehimore nën fabrikën e çelikut Azovstal në Mariupol. Kjo është bërë e ditur nga autoritetet e qytetit jugor, duke saktësuar se prania e civilëve nuk i pengon forcat ruse të vazhdojnë bombardimin e uzinës.

Zyrtarët rusë kanë njoftuar se ushtria e Kremlinit ka sulmuar me raketa një depo armësh të dërguara nga SHBA dhe Evropa për ukrainasit në Lviv.

Rusia po lëviz "artileri dhe avionë të rëndë" në Ukrainën lindore. Kjo u raportua nga burime të Pentagonit për 'CNN' duke nënvizuar se nga analizat e tyre "duket se Moska ka nxjerrë mësimin nga dështimet në veri të Ukrainës". Për momentin, sipas mbrojtjes amerikane, Rusia është ende duke "përgatitur terrenin" për një ofensivë.

Komanda e Forcave të Armatosura të Ukrainës ka deklaruar se ka shenja se Rusia po fillon ofensivën e saj të re në Ukrainën lindore.

Shtabi i Përgjithshëm i Forcave të Armatosura ka postuar në rrjetet sociales e përpjekjet kryesore të Rusisë tani ishin të përqendruara në vendosjen e kontrollit të plotë të rajoneve Donetsk dhe Luhansk, me intensifikimin e veprimeve ushtarake në Kharkiv.

Ai shtoi se lufta për Mariupolin vazhdon dhe ushtria ruse po fokusohej në marrjen e kontrollit të plotë të zonës.

Ai tha gjithashtu se Rusia vazhdon të shkelë rregullat e së drejtës ndërkombëtare humanitare dhe po bllokon iniciativat për evakuimin e civilëve nga vendbanimet e pushtuara.

Flota ruse e Detit të Zi pëson një goditje tjetër! Pas fundosjes së anijes 'Moskva', një nga oficerët më të lartë ka humbur jetën. Sot ka ndërruar jetë komandanti i anijes ruse “Caesar Kunikov”, Aleksandër Çirva. Këtë e ka bërë të ditur në Telegram guvernatori i Sevastopolit, Mikhail Razvozhayev. Kapiteni i anijes, e cila është pjesë e brigadës së 197-të zbarkuese të Flotës Ruse të Detit të Zi, vdiq nga plagët e marra nga sulmi nga ukrainasit më 24 mars, në të cilin u shkatërrua një anije tjetër, Saratov . "Guximi, profesionalizmi dhe përvoja e tij shpëtuan jetën e anëtarëve të ekuipazhit. Ne do ta kujtojmë gjithmonë heroin tonë", thotë Razvozhayev.

Luftëtarëve sirianë u ofrohen 600 dollarë në muaj për t’iu bashkuar ushtrisë ruse në luftën që ka nisur në Ukrainë.

“Rusët po rekrutojnë luftëtarë me përvojë për t'i përdorur në luftën kundër Ukrainës”, është alarmi i aktivistëve që monitorojnë situatën në Evropë. Rami Abdurrahman , drejtor i Observatorit Sirian për të Drejtat e Njeriut me bazë në Mbretërinë e Bashkuar, raportoi se rreth 40,000 njerëz janë regjistruar në ushtrinë ruse dhe grupin Wagner deri më tani.

Analistët thonë se luftëtarët nga Siria ka më shumë gjasa të vendosen në Ukrainë në javët e ardhshme.

Presidenti rus Vladimir Putin i ka dhënë një titull nderi një brigade të akuzuar nga Ukraina për kryerjen e krimeve të luftës në qytetin e Bucha.

Një dekret i nënshkruar nga Putini i dha Brigadës titullin "Roje" për "heroizmin dhe guximin masiv, këmbënguljen dhe guximin" e anëtarëve të saj.

Ukraina thotë se më shumë se 300 civilë u vranë nga rusët në Bucha, por Moska e mohon.

Putin nënshkroi gjithashtu një dekret që përcakton një pagesë prej 5 milionë rubla shtesë (47,200 £; 62,000 dollarë) nëse një roje kufitare ruse vdes ndërsa shërbente në kufirin ukrainas, si dhe në kufijtë e rajoneve Donetsk dhe Luhansk.

Masa është marrë "për të ofruar masa shtesë të mbështetjes sociale për personelin e shërbimit të agjencive kufitare të Shërbimit Federal të Sigurisë dhe anëtarëve të familjeve të tyre", tha agjencia shtetërore ruse e lajmeve Tass.

Shteti Islamik u ka bërë thirrje ndjekësve të tij që të shfrytëzojnë sa më shumë luftën në Ukrainë për të rifilluar sulmet në Europë. Në një mesazh audio të transmetuar në Telegram, zëdhënësi Abu Omar al-Muhajir njoftoi një fushatë të re ushtarake për t'u hakmarrë për vdekjen e ish-liderit Abu Ibrahim al-Hashimi al-Quryishi dhe ish-zëdhënësit të grupit. Al-Muhajir u bëri thirrje mbështetësve që të përdorin "mundësinë" e "të pafeve që luftojnë njëri-tjetrin" në Ukrainë dhe të organizojnë sulme në Europë.

Spanja do të rihapë ambasadën e saj në Kiev "në ditët në vijim”. Lajmi u bë me dije nga kryeministri Pedro Sánchez, duke u bërë vendi i fundit që kthen diplomatët e saj në kryeqytetin ukrainas.

“Rihapja do të jetë një shenjë e re e përkushtimit të qeverisë spanjolle ndaj popullit ukrainas”, tha Sanchez në një intervistë për TV spanjoll Antena 3.

Spanja evakuoi ambasadën e saj në Kiev më 27 shkurt, menjëherë pasi filloi pushtimi rus në Ukrainë. Ajo i transferoi ato funksione në Poloni.

Franca njoftoi javën e kaluar se ambasada e saj në Ukrainë do të kthehej "shumë shpejt" në Kiev nga Lviv, ndërsa Italia tha të shtunën se synon të rihapë ambasadën e saj në Kiev pas Pashkëve.

Bashkimi Evropian po rifillon gjithashtu praninë e tij diplomatike në Kiev, pasi e zhvendos atë përkohësisht në Poloni pas pushtimit rus të Ukrainës, njoftoi blloku të premten.

Sllovenia gjithashtu ka rihapur ambasadën e saj në Kiev që nga 28 marsi.

Dy persona kanë humbur jetën në Kharkiv, si pasojë e bombardimeve ruse.

Mbrëmë, presidenti ukrainas Volodymyr Zelensky tha se pesë persona ishin vrarë në një sulm me bombë në qytet. Kharkiv është qyteti i dytë më i madh i Ukrainës dhe nuk është shumë larg kufirit rus.

Kryeministri ukrainas Volodymyr Zelensky ka bërë me dije se kanë dorëzuar formularin e anëtarësimit në Bashkimin Europian.

“Sot kemi bërë një hap tjetër drejt anëtarësimit të vendit tonë në Bashkimin Evropian. Është një moment shumë i rëndësishëm, ky është një hap formal drejt bashkimit evropian”, shkruan Zelensky.

Zelensky falënderoi presidenten e Komisionit Europian Ursula von der Leyen, përfaqësuesin e BE-së Josep Borrell dhe presidentin e Këshillit Europian Charles Michel për shpejtësinë me të cilën u është dorëzuar pyetësori për anëtarësimin në BE.

Të paktën gjashtë persona u vranë dhe tetë u plagosën në sulmet me raketa në zona të ndryshme të qytetit të Lviv.

Gjatë natës, forcat ruse pretendojnë se kanë sulmuar 315 objektiva ukrainas në të gjithë vendin, duke shkatërruar katër depo armësh dhe pajisje ushtarake me raketa Iskander dhe duke rrëzuar tre avionë dhe 11 dronë.

Forcat e armatosura të Ukrainës çliruan disa vendbanime rreth qytetit të Izium, në rajonin e Kharkiv. Këtë e ka bërë të ditur Oleksandr Motuzianyk, zëdhënës i Ministrisë së Mbrojtjes të Ukrainës, gjatë një konference. Motuzianyk vuri në dukje se qyteti i Izium dhe periferitë e tij drejt Slobozhanskyi janë zonat me përqendrimin më të madh të njësive ruse. "Ata do të përpiqen të nisin një ofensivë në lindje, veçanërisht nga atje," shtoi ai. Sipas shtabit të përgjithshëm ukrainas, në zonën e Izium, rusët kanë grumbulluar deri në 22 grupe batalionesh.

Sipas Sergei Markov, komentator politik dhe ish-këshilltar i Vladimir Putinit, raketa që goditi dhe fundosi luftanijen ruse Moskva ishte nga NATO dhe ishte dërguar në Ukrainë në janar. Eksperti i politikës së jashtme, i lidhur me Kremlinin dhe shpesh i pranishëm në mediat perëndimore, e bëri deklaratën në një intervistë për BBC. Markov pranoi se humbja e anijes ishte një pengesë për marinën ruse, por e justifikoi atë duke shpjeguar se ushtria ruse duhet të merret jo vetëm me Ukrainën, por me një koalicion vendesh ku përfshihen edhe Shtetet e Bashkuara.

Situata ekonomike në Rusi "po stabilizohet", ashtu si edhe inflacioni, me rublën që po kthehet në nivelet e paraluftës në Ukrainë.

 Kështu deklaroi presidenti Vladimir Putin, cituar nga TASS. Kreu i Kremlinit tha gjithashtu se sanksionet kanë goditur ekonominë perëndimore.

Forcat ruse po planifikojnë një operacion "flamuri i rremë" në Kherson, ku synojnë të sulmojnë dhe të akuzojnë në mënyrë të rreme ushtrinë ukrainase.

Kështu raporton zëdhënësi i administratës ushtarake rajonale të Odesës, Serhiy Bratchuk, duke nënvizuar se qëllimi i Moskës është të përdorë këtë operacion për të justifikuar një "shpëtim të qytetit" përmes një referendumi. Këtë e raporton The Kyiv Independent.

Ukraina dhe Rusia kanë dështuar të pajtohen për hapjen e korridoreve humanitare më 18 prill. Kjo është dita e dytë me radhë që korridore të tilla, që mundësojnë evakuimin e civilëve nga zonat e luftës në Ukrainë, nuk do të hapen, tha zëvendëskryeministrja ukrainase, Iryna Vereshchuk.

“Për shkaqe të sigurisë, ne kemi vendosur që sot të mos hapim korridore humanitare”, tha Vereshchuk përmes një postimi në Telegram. Ky njoftim vjen teksa është raportuar për sulme ajrore në disa pjesë të Ukrainës, përfshirë edhe në Kiev dhe Lviv.

Dy ushtarë britanikë që luftonin me Ukrainën janë shfaqur në televizionin shtetëror rus duke kërkuar që të shkëmbehen me një politikan pro-rus që mbahet nga autoritetet ukrainase.

Shaun Pinner dhe Aiden Aslin u kapën nga forcat ruse në Ukrainë.

Pasi u nxitën nga një burrë i paidentifikuar, ata të dy i kërkuan kryeministrit të Mbretërisë së Bashkuar Boris Johnson t'i sillte në shtëpi në këmbim të lirimit të politikanit Viktor Medvedchuk.

Ishte e paqartë se sa lirisht mund të flisnin.

Familja e zotit Pinner u ka bërë thirrje rrëmbyesve të tij që ta trajtojnë atë si rob lufte në përputhje me rregullat ndërkombëtare, në një deklaratë të lëshuar nga Ministria e Jashtme.

Vetëm pak minuta më parë, Shërbimi Sekret i Ukrainës publikoi një video të z. Medvedchuk duke kërkuar që të shkëmbehej me banorët e Mariupolit.

Bisedimet e paqes mes negociatorëve ukrainas dhe rusë po vazhdojnë në nivel ekspertësh dhe të mbyllura për mediat.

Kështu deklaroi zëdhënësi i Kremlinit Dmitri Peskov, duke shtuar se ecuria e bisedimeve mund të ishte edhe më e mirë.

Në fund të bisedimeve, të cilat fokusohen në situatën në Ukrainë dhe gazin natyror, nuk do të bëhen deklarata, shtoi Peskov.

Katër civilë u qëlluan për vdekje dhe një i plagosur teksa po përpiqeshin të largoheshin nga qyteti i Kreminës, në rajonin Luhansk të Ukrainës.

Këtë e ka bërë të ditur kreu i rajonit, Serhiy Haidai. Sipas Haidai, ushtria ruse hapi zjarr ndaj civilëve që u përpoqën të largoheshin nga qyteti me makinë.

Mëngjesin e sotëm rusët kanë sulmuar një qendër të shpërndarjes së ndihmave humanitare në Kharkiv. Nga ky sulm i paturp ka humbur jetën 1 person, sic raportohet deri në këto momente.

Ndërkohë janë regjistruar 6 të plagosur.

Rusët duan të shkatërrojnë Donbasin. Kjo ishte deklarata e fundit e presidentit ukrainas, Volodymyr Zelenskyt.

"Trupat ruse po përgatiten për një operacion sulmues në lindje të vendit tonë. Ai do të fillojë së shpejti. Ata duan të shkatërrojnë Donbasin," tha Zelensky .

"Ata duan të shkatërrojnë gjithçka që dikur i dha lavdi këtij rajoni industrial. Ashtu siç trupat ruse po shkatërrojnë Mariupolin, ata duan të zhdukin qytete dhe komunitete të tjera në rajonet Donetsk dhe Luhansk", vazhdoi presidenti ukrainas.

Ai si gjithmonë ka përsëritur thirrjen për dërgimin e armëve të reja në Ukrainë, duke thënë se betejat tani varen nga ata që janë armët dhe municionet.

Moska tha se gjatë natës ka bombarduar 315 struktura ushtarake gjatë natës së djeshme në të gjithë Ukrainën.

Ndër objektivat e bombarduara, saktësoi zëdhënësi i Ministrisë së Mbrojtjes Igor Konashenkov,  gjithashtu katër depo armësh.

Përveç kësaj, tre avionë ukrainas u rrëzuan: dy Mig-29 dhe një Su-25.

6 civilë u vranë dhe 8 të tjerë u plagosën, përfshirë edhe 1 fëmijë, në sulmet me raketa të forcave ruse në Lviv në Ukrainën perëndimore. Kjo u raportua nga guvernatori rajonal , Maksym Kozytsky , siç raportohet nga Ukraina 24 .

Djali 16-vjeçar i kryetarit të bashkisë së Zaporizhzhia, Oleh Buriak, u rrëmbye nga ushtarët rusë në postbllokun Vasylivka, teksa po përpiqej të evakuohej nga Melitopoli.

Këtë e bën të ditur vetë Buriak, duke shtuar se nuk e di se ku është djali i tij.

'' Djali im është rrëmbyer. I bëj thirrje komunitetit evropian dhe mbarë njerëzimit” Më ndihmoni. Le të dijë e gjithë bota”, tha kryebashkiaku.

 

Ukraina nuk do të heqë dorë nga "territori i saj" në lindje për t'i dhënë fund konfliktit të armatosur me Rusinë. Kështu deklaroi presidenti Volodymyr Zelensky në një intervistë me CNN.

Kreu i shtetit iu referua rajonit lindor të Donbasit, pjesërisht tashmë nën kontrollin rus që nga viti 2014, si dhe gadishullit jugor të Krimesë. Gjatë një interviste, Zelensky përsëriti ftesën e tij drejtuar presidentit amerikan Joe Biden për të vizituar Kievin.

 “Ai është lideri i Shteteve të Bashkuara, ndaj duhet të vijë e shohë”, tha ai.

Rezistenca në Mariupol, ngadalësoi të gjithë ofensivën ruse në Ukrainë, duke konsumuar burime që mund të ishin përdorur në fronte të tjera, kjo është analiza që i është bërë situatës së luftës nga  inteligjenca ushtarake britanike.

Ndërkohë, situata në qytetin e rrethuar prej javësh është cilësuar si “kritike”, si në planin humanitar ashtu edhe në atë ushtarak.

Dje Moska u propozoi ushtarëve ukrainas të dorëzoheshin për të shpëtuar jetën, por ata refuzuan, duke thënë se synimi i tyre është të rezistojnë.

Qyteti port është një nga objektivat kryesore të Kremlinit, mbi të gjitha sepse nëse pushtohet do t'i lejonte Moskës të hapte një kalim të drejtpërdrejtë nga toka midis Krimesë (e aneksuar ushtarakisht në 2014) dhe Donbasit, kryesisht i kontrolluar nga separatistët pro-rusë, dhe për rrjedhojë drejt Rusisë.

Një grup i të drejtave të njeriut në Krime denoncoi se rusët morën me forcë rreth 150 fëmijë nga Mariupol, 100 prej tyre të shtruar në spital, shumica e të cilëve u morën nga prindërit e tyre. 

‘Ushtria ruse mori me forcë rreth 150 fëmijë nga Mariupol dhe i transferoi në drejtimin e pushtuar Donetsk dhe Taganrog rus’, tha Olha Skrypnyk, kreu i grupit të të drejtave të njeriut në Krime.

Sipas Petro Andriushchenko, këshilltar i kryetarit të bashkisë së Mariupolit, shumica e fëmijëve, të cilët nuk janë jetimë, janë marrë pa prindërit e tyre, ndërsa për fëmijët e mbetur në qytetin e rrethuar ka një alarm shëndetësor: ‘Ata janë të uritur’.

Anija në fotografi mendohet të jetë “Moskva”, ajo që shkatërruan forcat ukrainase disa ditë më parë.

Ka qenë “OSINTtechnical”, që e ka shpërndarë fotografinë, një llogari që ndan imazhe të inteligjencës.

"Unë nuk mund ta verifikoj vërtetësinë e tij, por ky është një kryqëzor i klasës sllave dhe nuk mendoj se ka pasur një të tillë të shkatërruar më parë" të Moskës.

Moska e ka mohuar një gjë të tillë, duke thënë se ka rënë zjarr dhe s’ka ndodhur kurrsesi një sulm. Por duket se fotografitë provojnë të kundërtën, nëse ato janë të vërteta.

Katër raketa goditën rajonin e Lviv, afër kufirit të Ukrainës me Poloninë këtë mëngjes. Kështu bëri me dije guvernatori Makysm Kozytskyi, i cili ftoi civilët të qëndrojnë në strehimore. Të dërguarit e BBC raportuan se panë të paktën pesë shpërthime në pjesën perëndimore të qytetit, "një tym i zi dhe gri po ngrihet". Alarmi kundërajror ra 45 minuta para shpërthimit dhe shumë njerëz ishin në rrugë.

Lufta në Ukrainë ka arritur në atë pikë sa kur lexojmë “rusët bombarduan zona të banuara me civilë”, nuk na bënë m përshtypje.

Në një video e cila ka qarkulluar orët e fundit në internet shihe teksa raketat ruse po “kërcasin” në Kharkiv. Pas plagëve të marra në trup, një grua po merr shërbimin e nevojshëm mjekësor nga punonjësit e ambulancës, por rusët godasin sërish.

Në të majtë të saj duket një burrë i mbuluar në gjak që po rënkon nga dhimbja. 

Kaos mbizotëron në Kharkiv.

Kirill Budanov, kreu i departamentit të inteligjencës në Ministrinë e Mbrojtjes së Ukrainës, beson se përdorimi i armëve bërthamore nga Rusia nuk ka gjasa. ‘Të gjithë qetësohuni, është thjesht një kërcënim. Edhe nëse Putini ‘çmendet’ dhe përpiqet ta bëjë këtë, edhe teknikisht nuk është aq e lehtë për ta bërë. Po, ai mund të përpiqet ta bëjë, por nuk ka gjasa që ta bëjë, një element shantazhi ndaj gjithë botës dhe të gjithë e kuptuan’. Zëdhënësi i Kremlinit Dmitry Peskov tha se Rusia do të përdorë armë bërthamore vetëm në rast të një sulmi në territorin rus, por NATO vazhdon ta shohë atë si një kërcënim real.

Presidenti ukrainas Volodymyr Zelensky tha në një intervistë për CNN se ai e ka ftuar presidentin francez Emmanuel Macron të vizitojë Ukrainën për të parë vetë se forcat ruse kishin kryer "gjenocid". Macron ka hezituar të përdorë fjalën gjenocid, duke deklaruar se " nuk jam i sigurt se përshkallëzimi i retorikës i shërben kësaj kauze”.

‘E ftova të vijë kur të ketë mundësi. Do të vijë të shohë dhe jam i sigurt se do ta kuptojë’, tha Zelensky.

Zelensky ka thënë më parë se ngurrimi i Macron për të përdorur termin ishte "shumë i dhimbshëm".

Shtetet e Bashkuara, të cilat historikisht kanë hezituar të akuzojnë shtetet për gjenocid, javën e kaluar akuzuan presidentin rus Vladimir Putin për kryerjen e akteve të gjenocidit duke u përpjekur të "fshijë idenë" e një identiteti ukrainas.

Konventa e OKB-së për gjenocidin, nënshkruese e së cilës është SHBA, kërkon që vendet të ndërhyjnë pasi gjenocidi të identifikohet zyrtarisht.