Samiti i OKB-së për klimën/ Lula da Silva: Brazili është kthyer, do bëjmë gjithçka për të patur zero shpyllëzime

“Brazili është kthyer”, u ka thënë presidenti i sapozgjedhur Luiz Inácio Lula da Silva turmave të tërbuara në samitin e OKB-së për klimën COP27 në Egjipt.

Duke hyrë në një dhomë me mbështetës që thërrisnin emrin e tij, Lula da Silva premtoi të rivendoste pyllin tropikal të Amazonës dhe të ndiqte ata që konsiderohen si “kriminelët e klimës”.

Numra të mëdhenj gazetarësh u mblodhën për ta parë të fliste, duke e bërë atë një nga ‘superyjet’ e këtij samiti.

Vetëm dy javë pas fitores së ngushtë të zgjedhjeve, Lula po bën paraqitjen e tij të parë në skenën ndërkombëtare, duke takuar liderë nga SHBA, Kina dhe BE në konferencën për klimën.

"Ne duhet të ndalojmë këtë nxitim drejt humnerës. Nuk ka siguri klimatike për botën pa një Amazonë të mbrojtur. Ne do të bëjmë gjithçka që duhet për të patur zero shpyllëzime dhe degradim të biomeve tona" tha ai, duke shtuar se ndryshimi i klimës do të kishte përparësinë më të lartë për qeverinë e tij.

Ndërsa nuk ka dyshim se presidenti i Brazilit është plot ambicie kur bëhet fjalë për trajtimin e ndryshimeve klimatike, analistët thonë se sfida do të jetë realizimi i këtyre premtimeve. Brazili është thellësisht i ndarë për kthimin e Lulës në pushtet dhe puna e tij për të bashkuar vendin nuk do të jetë e lehtë.

Presidenti tha në samit se Brazili do të provonte se ishte e mundur të gjenerohej pasuri pa shkatërruar mjedisin, duke thënë se ishte e pamundur të ndahej lufta kundër ngrohjes globale nga varfëria.

Liderët e kombeve po takohen në Sharm el-Sheikh për të diskutuar trajtimin e ndryshimeve klimatike.

B.V/Shqiptarja.com

TAG:
• OKB
• COP27
• ndryshimi i klimes
• Brazil