Lejet e dhëna për shfrytëzimin e materialeve inerte në basenin e Shkumbinit lidhen drejtpërdrejt me situatën e rrugës Librazhd-Prrenjas që prej 5 ditësh ka izoluar juglindjen, thotë gjeologu Arlis Arlikaj në “Studio Live” në Report Tv.

Sipas të dhënave, të cilat janë pasqyruar edhe në hulumtimin e Report Tv, 3 prej kompanive kanë leje për të marrë e nxjerrë 1 milionë metër kub inerte nga lumi Shkumbin.

“Me këtë sasi mund të mbushen 400 pishina olimpike dhe kanë leje deri në vitin 2027. Në rast se kjo gjë nuk ndalet tani, lumi do të shkatërrohet përfundimisht”, thotë inxhinieri i mjedisit.

Alikaj shpjegon se pikërisht marrja e këtyre inerteve ka bërë që lumi të gërryejë shtratin e vet duke shkaktuar prishjen e rrugës.

“Dëmtimi i rrugës është përfundimisht si pasojë e gërryerjes së shtratit të lumit. Shtrati i lumit nuk është thjesht rërë, por bazament i gjithë luginës dhe quhet erozion regresiv. Makineritë që heqin 1 milionë metër kub inerte, shkakton boshllëk të madh në lartësinë e shtratit dhe më pas lumi tenton të mbushë këtë gropë duke gërryer me forcë muret anësore dhe kjo ka sjellë degradimin e infrastrukturës lokale”, thotë gjeologu.

Situata është paralajmëruar prej vitesh, vijon ai sepse “lejet janë dhënë pa llogaritur kostot mjedisore”. Sa për shpresën se gjendja mund të përmirësohet, kjo varet nga rigjenerimi i lumit, i cili për shkak të dëmtimit, mund të dojë edhe 5 vite. Alikaj nuk e fshehu as zhgënjimin për reagimin e ARRSH-së që ia atribuoi fajin reshjeve.

“Rigjenerimi mund të marrë vite dhe mund të jetë për 5 vjet. Realiteti është që kjo masakër mjedisore që i është bërë lumit Shkumbin nuk është në atë stad që mund të rigjenerohet vetë sepse s’ka marrë gurë e zhavorr, por inerte, sedimentin e lumit. Isha pak i zhgënjyer nga reagimi i ARRSH-së që ia hidhte fajin reshjeve të shiut sepse e dimë që ishte propagandë e pastër. Një zgjidhje mund të jetë rruga Egnatia që është 2000-vjeçare, por do të marrë kohë dhe s’mund të ndërhyhet sepse është e mbrojtur nga UNESCO. Mbetet interesante se kush do ta mbajë përgjegjësinë dhe çfarë zgjidhjeje do t’i japin kësaj pyetjeje sepse askush nuk mban përgjegjësi për këtë babëzi dhe masakër mjedisore që i është bërë lumit”, tha Alikaj.

Sipas tij, zgjidhja e vetme është që të ndalen menjëherë lejet mjedisore.

“Të ndalen lejet mjedisore për këto kompani sepse vijojnë ende deri në vitin 2027. Nëse ndalen, lumi nuk shkatërrohet përfundimisht sepse ai do të rregullojë shtratin e tij. Në këtë mënyrë ka shpresë nga ana gjeologjike dhe gjeomorfologjike që rrugët që kanë qenë më përpara të krijojnë nyje, të gjejnë zgjidhje alternative dhe të ulet periudha e pritjes”, përfundoi inxhinieri.

Rendit zhvillimet sipas orarit:
Ora 17:45
Shembja e rrugës Librazhd-Prrenjas shqetëson bizneset, Muço për Report Tv: Produktet mungojnë, rriten kostot! Alternativa janë furnizimet nga RMV e Greqia

Rruga e shembur në Librazhd nuk po shton vetëm koston e kohës për qytetarët. Për ata që duan të shkojnë në Korçë, rrugët alternative e bëjnë kohën e udhëtimit 5-8 orë. Njëkohësisht, tashmë është shtuar kostoja financiare për rrugën Gramsh-Maliq sepse çmimi i biletave të minibusëve është rritur me 300 lekë.

Bileta tani kushton 1000 lekë duke e bërë tepër të kushtueshëm për qytetarët një udhëtim vajtje-ardhje. Si të mos mjaftonte kjo, tani vështirësohet edhe furnizimi ushqimor. Në një lidhje direkte me “Studio Live” në Report Tv, Bujar Muço nga Shoqata e Biznesit të Vogël në Korçë, shpjegon se do të krijohet një ngërç për lëvizjen e mallrave nga dhe drejt qytetit.

Ai thotë se fermerët e kanë të vështirë të shesin produktet, ndërsa furnizimet nga qytetet e tjera po ashtu do të jenë të vështira. Kjo do të rrisë direkt koston e tyre për konsumatorët dhe bizneset, ndërsa rrugë alternative për furnizimin do të jenë RMV e Greqia.

“Në këtë stinë, pjesa më e madhe e furnizimeve me fruta e perime vijnë nga Lushnja, Tirana apo importet e jashtme. Bllokimi i rrugës ka sjellë një pauzë të madhe sepse ka mugnesë të produkteve dhe kosto të shtuar të tyre kundrejt konsumatorit. Duke u bllokuar kjo rrugë, është e pamundur të hyjnë në formë tjetër. Edhe rrugët alternative, është e pamundur të furnizohet me rrugë të mëdha ky treg kaq i madh sa qarku i Korçës, me orë të gjata e kosto të madhe. Mënyrë për t’u furnizuar ka mbetur nga Maqedonia ose Greqia. Është 5 apo 6-fish i çdo produkti dhe ka ndikuar në çmimet e tyre karshi konsumatorit. Kemi mungesë të produkteve bujqësore të dimrit me qepë, patate, hudhër apo mollë që janë të magazinuara dhe makinat e mëdha e kanë të pamundur të furnizojnë. Është një problem i madh në kurriz të bizneseve dhe konsumatorëve”, tha Muço.

Më tej, Muço shtoi se të njëjtat vështirësi do të shfaqen edhe për sektorë të tjerë biznesi.

“Do të ketë mungesë të karburantit. Dihet që karburanti vjen me kamionë nga Durrësi. Nuk e di sa rezerva ka, por besoj se duhet të jenë në limitet e fundit. Fasoneritë që furnizohen me lëndë të parë, të gjithë sektorët do të kenë vështirësi dhe dëme ekonomike të pallogaritshme. Duhet gjetur zgjidhje nga institucionet përgjegjëse”, përmbylli Muço.

 

 

 

 

P.J/Shqiptarja.com