Lushnje, i lind fëmija me vrimë në
zemër, s'ka lekë për operacionin

LUSHNJE - Pandeli Muço, nga Plugu i Lushnjës, është vetëm 30 vjeç, por jeta e ka vënë përpara sprovave shumë të vështira. Dhe tashmë ndodhet në një udhëkryq të madh. Djali i tij, i cili ka vetëm 10 ditë që ka ardhur në jetë, ka dy vrima në zemër dhe gjysma e saj nuk funksionon thuajse fare.

Mjeku i njohur shqiptar, Altin Veshti, i cili operon të vegjëlit e prosalindur me defekte në zemër, nuk ia ka marrë përsipër. “Nuk kemi as mjetet e duhura dhe as kohën e duhur për të bërë një ndërhyrje, ndaj duhet të shikosh për ndonjë spital jashtë Shqipërisë”, - kështu na tha dr. Altini, tregon për “Shqiptarja.com”, babai i vogëlushit që ka probleme në zemër. Ai thotë se kanë kontaktuar me një klinikë të njohur në Turqi, i kanë dërguar epikrizën e fëmijës, dhe ata i kanë dhënë 95 % garanci për jetën. Por operacioni kushton nga 12-17 mijë euro.

“Unë nuk kam asnjë kokërr leku. Nuk di se në cilën derë duhet të trokas që të më ndihmojnë ta shpëtoj tim bir”, - thotë ai me lot në sy. Dhe drama e çiftit Muço nga Lushnja, nuk përfundon këtu. Më 20 gusht mbushet një vit nga dita kur ata humbën vajzën e tyre, 20 muajshe, e cila atëherë u thanë se vdiq nga temperatura e lartë, ndërsa tani ka dyshime që edhe ajo të ketë pasur vrimë në zemër, por mjekët nuk e kanë kuptuar. Në një intervistë për Shqiptarja.com ai rrëfen përpjekjet e dëshpëruara për të gjetur ndonjë donator apo dikaster që mund ta ndihmojë për jetën e të birit.
 
Si e morët vesh që fëmija juaj ishte sëmurë?

Fëmija lindi me datë 27 korrik, lindi me të gjitha parametrat normalë. Ndërkohë që edhe gjatë shtazanisë gjithçka ka ecur shumë mirë. Të paktën dy herë në muaj shkonim tek mjekja që e ndiqte gruan dhe asnjerë nuk na ka thënë se mund të kishte probleme.
 
Si e kuptuan mjekët që fëmija ishte sëmurë?

Mund të them se ka qenë një rastësi e keqe që u kap sëmundja e tim biri. Lindi 3100 gramë dhe e futën në inkubator. Por tubat e oksigjenit ishin të çarë dhe fëmija nuk ka thithur ajër nga tubat e inkubatorit, por me sa duket ka thithur oksigjen vetë. Si pasojë fëmija u nxi komplet dhe mjekët e Lushnjes vendosën ta nisnin direkt për Tiranë.

Gjatë transportit me autoambulancë fëmija erdhi në vete, po kur erdhi këtu në Tiranë, te materniteti i Ri, mjekët na thanë se kishin dyshime se kishte probleme me zemrën. Erdhi mjekja kardiologe që e pa dhe na tha se fëmija ka dy vrima në zemër, dhe se gjysma e saj nuk funksionon thuajse fare, pasi vena që duhet të transportojë gjakun e pastër në fakt ka gjakun e pisët, dhe e kundërta. Në momentin që gjaku që vjen nga këto dy vena që kanë ndryshuar funksionet takohet me njëri-tjetrin, në atë moment fëmija vdes.
 
Po çfarë ju rekomanduan mjekët?

Unë menjëherë shkova në QSUT te dr Altin Veshti pasi ai më thanë se është mjeku që merret me këto punë. Por ai nuk pranoi të na merrte përsipër operacionin, pasi sipas tij, raste të tilla kanë një përqindje të madhe vdekjeje. Unë i thashë se e marr rrrezikun parasysh, por ai më sugjeroi të gjej ndonjë klinikë jashtë vendit. Nuk kemi as mjetet dhe as kohën e duhur, na tha doktor Altini.
 
Po ju keni kontaktuar me ndonjë klinikë të huaj?

Po, disa të njohur të mi, i dërguan epikrizën një spitali të specializuar në Turqi. Ata thanë se e marrin përsipër dhe na japin 90-95% garanci për suksesin e operacionin. Do të bëhen dy operacioni, njëri për vrimën në zemër dhe tjetri për të rregulluar funksionete venave. Por operacioni kushton nga 12.000-17.000 euro. Dhe unë nuk kam anjë kokërr leku. Të besohet se nuk kam para as të aplikoj për pasaportat që t’i kemi gati.
 
Po tani fëmija si është?

Është në inkubator. Merr frymë në mënyrë artificiale dhe po ashtu ushqehet, por nuk e dimë se sa mund të zgjasë, pasi mjekët na kanë thënë që të gjejmë një mundësi dhe ta dërgojmë sa më shpejt jashtë.
 
Po ju i jeni drejtuar dikujt deri më tani?

Nuk dimë se ku të drejtohemi. Nuk njohim askënd.
 
Po te ministria e Shëndetësisë a keni takuar njeri?

Jo, një fëmijë tjetër që është së bashku me djalin tim ka tre javë që pret që ministria që ta çojnë jashtë dhe akoma skanë bërë gjë. Unë nuk e di a mund të durojë tre javë im bir.
 
Mjekët e Tiranës a ju kanë thënë gjë nëse kjo sëmundje mund të dallohej që në barkun e nënës?

Ata na kanë thënë se janë shumë të rrallë specialistët në vend që mund ta kapin këtë sëmundje që gjatë shtatzanisë. Tani madje ata dyshojnë se edhe vajza na ka vdekur po nga kjo sëmundje.
 
Pse iu ka vdekur një fëmijë?

Po fëmija i parë. Ishte vajzë. Më 20 gusht bën një vit që na ka vdekur.
 
Po përse vdiq?

Nuk e dimë. Papritur e kapi temperaturë e lartë që nuk i zbriste, e çuam në spital, por si pasojë e temperaturës iu paralizuan këmbët, pastaj duart, pastaj i kapi edhe kokën. Vdiq brenda pak ditësh në reanimacion. Ishte 20 muajshe. Tani në epikrizën e djalit, mjekët kanë shkruar që ndoshta edhe vajza ka pasur vrimë në zemër, por se ka kuptuar njeri. Po ta dinim këtë gjë do të ishim më të kujdesshëm në shtatzaninë e dytë. Ndoshta do të gjenim një specialist më të mirë. Por ne na është thënë gjatë gjithë kohës që nuk kishte asnjë problem, analizat dilnin të gjitha mirë...
 
Çfarë kërkoni ju?

Unë kërkoj që dikush të më ndihmojë, të paktën, të bëj të gjitha sa më takon për t’i shpëtuar jetën djalit tim. Nëse shkenca nuk e arrin dot është tjetër gjë, por mua të mos më mbetet peng se im vdiq ngaqë unë nuk kisha lekë. Ndonjë person, Ministria e Shëndetësisë, ndonëj spital privat, ndonjë shoqatë që merret më këto gjëra, ju lutem më ndihmoni ta mbaj në jetë tim bir.  
 
 QSUT, OPERACIONE TE RRALLA NE ZEMER

Që nga 2010 ndërhyrjet kirurgjikale në zemër, nga më të ndërlikuarat për fëmijët e vegjël, mund të kryhen edhe në Qendrën Spitalore Universitare “Nënë Tereza” në Tiranë.
Gjatë vitit 2010 janë realizuar rreth 83 operacione të rralla ku më i vështiri ka qene ai tek një foshnjë 9-ditëshe me peshë 2.4 kg. Synimi i mjekëve pediatër dhe kardiokirurgë për vitin e ardhshëm është realizimi i operacioneve te fëmijët që lindin me gjysmën e zemrës. Ndërhyrje e rrallë kjo që deri tani nuk është kryer në vendin tone.
 
Çdo vit, sipas statistikave, rreth 350 fëmijë evidentohen me keqformime të lindura në zemër. Nga këta, pjesa më e madhe pas ndërhyrjeve kirurgjikale vazhdojnë jetën normalisht.
 
Mjekët tregojnë se infeksionet virale që nëna kalon gjatë shtatzënisë, rrezatimet radioaktive, predispozicioni gjenetik apo sëmundja e hipertensionit mund të bëhen shkak për krijimin keqformimeve të lindura.

Ky shkrim u botua sot në Shqiptarja.com, versioni print, dt 08.08.2013
Redaksia online
(ar.sh/shqiptarja.com)