SHKUP- Në Maqedoni prej mesnatës së 3 marsit ka nisur fushata zgjedhore për zgjedhjet lokale të 24 marsit.

Fushata për promovimin e kandidatëve për kryetarë komunash dhe këshilltarë komunal për zgjedhjet në 80 komuna dhe Qytetin e Shkupit do të zgjas 20 ditë. Më 23 mars, një ditë para zgjedhjeve është heshtja zgjedhore.

Numri i kandidatëve për kryetarë komunash dhe këshilltarë akoma nuk është përfundimtare, për shkak se me ndryshimet e reja të kodit zgjedhor dhe ndërprerjen e bojkotit të zgjedhjeve nga opozita maqedonase, Parlamenti të shtunën ka shtyer afatin për dorëzimin e listave nga opozita deri më 8 mars.

Të drejtën e votës do ta kenë 1.743.403 qytetarë në mbarë vendin. Votuesit do të votojnë për partitë dhe kandidatët sipas numrit rendor të përcaktuar në listën e votimit nga ana e Komisionit Shtetëror të Zgjedhjeve (KSHZ), ndërsa numrat e rij do të plotësohen me listat e kandidatëve të opozitës maqedonase.

Partitë politike prej sot do të nisin takimet intensive me qytetarët, ndërsa në mbrëmje janë paraparë tubimet e para qendrore nëpër komuna. BDI, PDSH dhe RDK janë siglat e partive që garojnë nëpër komunat e vendit. Shqiptarët garojnë në këto zgjedhje në rreth 38 komuna me lista këshilltarësh dhe kandidatë për kryetarë komunash.

(sg/shqiptarja.com)