MAQEDONI- Një helikopter i policisë së Maqedonisë është rrëzuar, si pasojë e një përplasjeje me një antenë radioje në afërsi të një zone industriale në Strumicë. Si pasojë, kanë humbur jetën katër persona, që ishin pjesë e ekuipazhit.

Të aksidentuarit, mësohet se  ishin pjestarë të policisë kufitare. Ngjarja ka ndodhur rreth orës 22:00 në periferi të qytetit të Strumicës, e cila ndodhet në pjesën lindore të vendit. Ministria e Punëve të Brendshme bën të ditur se në këtë fatkeqësi kanë humbur jetën personat të cilët ishin pjesë e ekuipazhit, ndërkohë që dyshohet edhe për viktima të tjera. 

Dëshmitarët theksuan se shkak  i rënies së helikopterit ka qënë përplasja me një antenë të Radios Maqedonase, me një gjatësi prej 140 metrave. 

Pas përplasjes, helikopteri ka përfunduar i copëtuar në disa pjesë në zonën përreth. Në vendngjarje kanë mbërritur forca të shumta policie dhe zjarrfikësish si dhe zyrtarë të lartë të qeverisë Maqedonase.

Lajmi është konfirmuar nga kryetari i Komunës, Zoran Zaev ndërsa sot do të ketë një deklaratë mbi informacione më të detajuara rreth ngjarjes. 

Redaksia Online
(d.a/Shqiptarja.com)