Ministria e Punëve të Brendshme e Maqedonisë njoftoi se mbrëmë, rreth orës 21:00 ka patur një shpërthim, pesë deri 10 metra larg ndërtesës së qeverisë së Republikës së Maqedonisë dhe shtoi se nga shpërthimi nuk ka patur viktima apo dëme materiale.
"Rreth orës 21:00, Ministria e Punëve të Brendshme mori njoftimin se ishte dëgjuar një shpërthim në afërsi të ndërtesës së qeverisë në drejtim të përmendores '13 Nëntori", tha kjo ministri.
"Ekipe të Sektorit për Antiterrorizëm dhe të Çminimit dolën menjëherë në terren. Nga ekspertiza e kryer është gjetur vendi i shpërthimit, pesë deri 10 metra larg ndërtesës së qeverisë. Nga shpërthimi nuk është shkaktuar asnjë dëm", shtoi ajo.
Nga vendi i ngjarjes janë marrë mbetjet për ekspertizë./ atsh/