Marrëveshja me Italinë për emigrantët, Rama: S'bëhet fjalë për kampe përqëndrimi, ne respektojmë dinjitetin e njerëzve! Nuk do të vijnë vetëm meshkuj

Kryeministri Edi Rama ka dhënë një intervistë për emisionin "Dritto e Rovescio" në Rete4 ku ka folur sërish për marrëveshjen Shqipëri-Itali për pritjen e emigrantëve afrikanë në 2 qendra të vendit deri në shqyrtimin e kërkesave të tyre për azil në Itali.

Duke folur në një lidhje ‘skype’ nga Parisi ku ndodhet për konferencën e donatorëve në ndihmë të Gazës, Rama tha se nuk mendonte se një çështje e tillë do të bëhej kaq e madhe, duke shtuar se në emigrantëve që do të strehohen në 2 qendra në Shqipëri do t’u garantohet dinjiteti njerëzor.

Kryeministrin kujtoi se qendra si ato që do të krijohen në Shqipëri, ekzistojnë edhe në vende të tjera si Greqia që është në BE por askush nuk e ka bërë të madhe këtë gjë.

“Nuk mendoj se dikush ka ngritur alarmin për kampet e përqendrimit apo Guantanamo. Ajo me Italinë është një marrëveshje e bërë me shumë kujdes dhe respekt për ata persona që do të jenë më pas objekt i këtij operacioni. Nuk duam të bëjmë diçka që nuk respekton dinjitetin e këtyre njerëzve – shtoi Rama “Ne kemi qenë shumë të kujdesshëm me numrat, metodologjine qe do te ndiqet”.

Kryeministri shqiptar më pas sqaroi se në qendra nuk do të ketë “vetëm meshkuj”, pasi përjashtimi prek vetëm të miturit dhe gratë shtatzëna dhe shpjegoi se “ekspertë italianë dhe shqiptarë kanë punuar për marrëveshjen nga të gjitha këndvështrimet dhe gjithashtu nga këndvështrimi i së drejtës ndërkombëtare.

Në bazë të marrëveshjes, Italia do të financojë dy qendra për të menaxhuar emigrantët pa leje qendrimi. Këto struktura fillimisht do të presin jo më shumë se 3 mijë persona që do të qëndrojnë aty kohën e nevojshme për të shqyrtuar kërkesat për azil. Do të qarkullojnë në vit deri në 36 mijë persona, natyrisht jo njëkohësisht, pasi kapaciteti maksimal i dy qendrave do të mbetet deri në 3000 persona në muaj. 

B.V/B.K/Shqiptarja.com

TAG:
• edi rama
• itali
• giorgia meloni