Masakra e Gërdecit, Mediu në gjykatë refuzon të pyetet si i pandehur: Do të flas i fundit, pasi të dëgjohen dëshmitarët

Prokurorët e SPAK-ut kërkuan që pyetja e tyre të bëhej përmes letërporosive, pasi sipas tyre pyetja përmes video-konferencës ishte e vështirë, për arsye teknike, por edhe për shkak të diferencës orare mes dy vendeve.

Nga ana tjetër avokatët e Mediut, por edhe avokati i familjarëve të viktimave, kërkuan pyetje përmes video konferencës. Sipas avokatëve, vetëm në këtë mënyrë pyetja e dëshmitarëve do të ishte shteruese.

GJKKO njoftoi në seancën e kaluar se nga Ministria e Drejtësisë kishte ardhur përgjigja se autoritet amerikane kanë pranuar kërkesën e autoriteteve tona për të marrë deklarimet e 5 personave mes tyre edhe Patrick Henry të kompanisë “SAC”, por kërkonte të saktësonte disa pyetje për secilin si dhe ti viheshin në dispozicion Henryt emaili që ai ka patur me ish drejtorin e”MEICO”, Ylli Pinarin. 

Autoritetet amerikane kanë lënë seancë më 12 maj dhe brenda kësaj date duhet të mbërrijë përgjigja nga Shqipëria, ndërkohë që sugjeronin se seanca mund të bëhej edhe me videokonferencë.

Ish-ministri i Mbrojtjes Fatmir Mediu refuzoi tu përgjigjej pyetjeve të prokurorë e të SPAK në cilësinë e të pandehurit. Ai tha se ishte gati të përgjigjej pasi dëshmitarët të pyeten të gjithë, edhe ata që janë jashtë vendit, me video-konferencë.

'Në seancën e kaluar prokurori kërkoj që unë të pyetem.

Që në krye të herës dua të them se:

Pavarësisht se ky proces penal kundër meje ka nisur dhe po vazhdon në kundërshtim me Kodin Penal dhe Kodin e Procedurës Penale, kam zgjedhur të respektoj intitucionin e Gjykatës dhe Prokurorisë dhe kundërshtimin ndaj kësaj paligjshmërie ta bëj në këtë sallë.

Nuk kam bërë politikë me këtë çështje dhe pse siç theksova, paligjshmëria për çdo njeri me dije minimale juridike është flagrante dhe nuk i jam shmangur apo larguar qoftë edhe një çast përballjes me drejtësinë në këto 17 vite.

Kam qenë këtu në çdo seancë për të dëgjuar me vëmendje të gjithë dëshmitarët me të cilët akuza pretendon të provojë fajësinë time.

Asnjëri prej tyre nuk ka dëshmuar qoftë edhe një fjalë të vetme kundër veprimeve të mia, madje kanë treguar qartë se Ministri nuk ka përcaktuar Gërdecin, nuk ka përcaktuar kalibrat si dhe nuk ka përgjegjësi për zbatimin e Rregullores së trajtimit të municioneve sepse ato janë çështje tërësisht ushtarake.

Ministri si autoritet civil drejtues i Ministrisë së Mbrojtjes, ka respektuar vendimet e strukturave civile dhe ushtarake të ngarkuara me ligj.

Nuk ka asnjë dëshmi që të kem, injoruar dhe ndikuar në asnjë rast vendimmarrjen e tyre.

Kam zbatuar ligjin dhe detyrat e mija si Ministër i Mbrojtjes. Kam kërkuar nga strukturat ushtarake dhe civile të raportojnë detyrat e ngarkuara me ligj në mënyrë periodike tek autoritet e tyre drejtuese dhe tek Ministri.

Nuk ka pasur asnjë raportim për moszbatim të detyrimeve ligjore apo rregullave të trajtimit të municioneve.

Do të jem këtu në çdo moment për të debatuar dhe vlerësuar çdo dokument apo fakt që kërkon të sjell prokuroria si provë në këtë proces.

Kam bindjen se vlerësimi i paanshëm dhe i  vërtetë me ekspertë i akteve të ekspertimeve ushtarake, ekonomike dhe fakti  pse ka ndodhur ngjarja, do të hidhnin dritë mbi të vërtetën e cila manipulohet qëllimisht prej 17 vitesh.

E nderuar Znj. Gjyqtare, për 17 vite unë nuk jam pyetur.

SPAK për dy vjet nuk më pyeti dhe hetoj çfarë donte, padyshim kjo është detyra e SPAK të hetojë, por mendoj se në dy vite duhet të kishte pasur vullnetin për të dëgjuar dhe të vërtetën time për të bërë drejtësi dhe për të ndryshuar edhe  veprimet e qëllimshme të ish-Prokurorëve.

Për fat të keq  kjo nuk ndodhi.

Prokuroria ka kërkuar të pyetem në fund të dëshmitarëve që ka paraqitur.

Po Znj.Gjyqtare pranoj tu përgjigjem çdo pyetje të prokurorëve  apo pyetjeve tuaja, por do ta bëj këtë në fund të këtij procesi, mbasi të jenë dëgjuar gjithë dëshmitarët e palëve dhe të jenë shqyrtuar të gjitha aktet dhe provat  shkresore.

Përndryshe  zhvillimi i  seancës së pyetjeve ndaj meje, në këtë moment të procesit do të  jetë thjeshtë  një akt formal, që nuk  i shërben aspak të vërtetës, por thjeshtë statitikës.'- tha Mediu në gjykatë.

Ish-drejtori i Logjistikës, Dashnor Caushi, ka refuzuar të japë dëshminë e tij në seancën e sotme.

Dashnor Caushi, ish-ushtarak, bashkë i pandehur i dënuar me 3 vite burg për shpërdorim detyre, nuk pranoi të fliste duke shfrytëzuar të drejtën që ia njeh ligji.

Në këto kushte prokurorët kërkuan të lexoheshin disa thënie të tij bërë në procesin e mëparshëm ku ai ishte dënuar.

SPAK ka kërkuar që një pjesë e dëshmisë së tij të administrohet si provë.

'Gjatë kësaj kohe Sokol Ngjeçi për një interes mbi projektdraftin e kalimit të municioneve. Më ka marrë në telefon edhe ministri i mbrojtjes për të më pyetur çfarë ka ndodhur me urdhërin”- lexoi SPAK.