Ministrja e Arsmit, Mirela Kumbaro ka bërë të ditur se institucionet arsimore janë të hapura dhe funksionojnë normalisht, ndërsa ka vlerësuar përkushtimin e mësuesve dhe punonjësve të sistemit arsimor.

Mësimi ka nisur këtë të hënë në mbi 1400 shkollat e vendit, në të gjithë Shqipërinë. Përmes një mesazhi nga ambientet e Kumbaro njoftoi se punonjësit e institucionit kanë vijuar punën pa ndërprerje, fizikisht dhe online pavarësisht dëmtimeve në një pjesë të zyrave.

“Punonjësit e Ministrisë së Arsimit nuk kanë ndaluar asnjë ditë punë, qoftë fizikisht, qoftë online për shkak se një pjesë e zyrave të janë të dëmtuara. Gjatë fundjavës kemi qenë në komunikim pa pushim me sistemin tonë arsimor që java të rifillojë në të gjitha shkollat, ku ju presin krahëhapur mësuesit, drejtuesit, oficerët e sigurisë, punonjësit socialë. Jemi të gjithë në krye të detyrës. Dua t’u shpreh mirënjohjen time më të thellë të gjithë mësuesve për gjithë përkushtimin e dhënë dhe kohën jo vetëm për fëmijët, por për komunikimin me prindërit”, tha Kumbaro. 

Ministrja shprehu mirënjohjen për mësuesit, drejtuesit e shkollave, oficerët e sigurisë dhe punonjësit socialë, të cilët sipas saj kanë kontribuar që procesi mësimor të rifillojë në të gjitha shkollat.

“Të dashur prindër, kini besim te mësuesit. Por sidomos flisni me fëmijët tuaj. Çdo orë që ua merr dhuna, çdo minutë që shohin vandalizmat që i janë bërë qytetit tonë në rrjetet sociale, janë orë të humbura nga jeta e tyre. Koha e tyre është për edukim. Shkollat janë të hapura dhe në funksion të plotë.”

Ministrja e Arsimit u është drejtuar gjithashtu edhe studentëve, duke i ftuar ata për dialog. 

“Studentë, kemi qenë në komunikim, edhe individualisht, gjatë gjithë këtij viti në këtë detyrë ku jam, dhe dua t’ju garantoj se dera e Ministrisë është e hapur, por edhe zemra e punonjësve të Ministrisë së Arsimit është e hapur. Gjërat bëhet me zemër dhe me dëshirë për të ecur përpara. Në çdo çast jam gati të ulemi bashkë dhe të përmirësojmë gjithçka që duhet bërë”, u shpreh Ministrja e Arsimit Mirela Kumbaro.