POP 5

Lajmet më të lexuara të 5 minutave të fundit

Dosje

Mbledhja e Byrosë në '80, Enveri-
Mehmetit: Lopët do hanë me llogari

Ish-drejtori i arkivave në Ministrinë e Brendshme, Kastriot Dervishi ka publikuar një material ku zbardhen diskutimet e zhvilluara në një mbledhje të Byrosë Politike në vitin 1980. 
Mbledhja e Byrosë në '80, Enveri-<br />Mehmetit: Lopët do hanë me llogari<br>
Ish-drejtori i arkivave në Ministrinë e Brendshme, Kastriot Dervishi ka publikuar një material ku zbardhen diskutimet e zhvilluara në një mbledhje të Byrosë Politike në vitin 1980. 

Në thelb të mbledhjes ishte procesi i tufëzimit. Në diskutime përfshihen Enver Hoxha, Mehmet Shehu dhe Hekuran Isai, të cilët shpalosin opsionet për rritjen e produktivitetit të bagëtive të imëta të tufëzuara. Si Enveri ashtu edhe Mehmeti bien dakord se lopët e tufëzuara do hanë me llogari. "Ashtu është, kanë ngrënë pa llogari, por tani do hanë me llogari dhe do të hanë më mirë, sikurse do të shfrytëzohen më mirë", pohon ish-lideri komunist Enver Hoxha. 

enveri mehmeti
(Diskutimet në mbledhjen e Byrose të vitit 1980)

Postimi i plotë i Kastriot Dervishit:
Vazhdojmë me çuditë e udhëheqjes së lartë komunistë në lidhje me procesin e tufëzimit dhe kufizimit të oborrit. Më 4.11.1980 Byroja Politike zhvilloi mbledhjen vendimtare që lidhej me procesin e tufëzimit. Mbledhja me temë “Mbi disa probleme të oborrit kooperativist dhe për përsosjen e drejtimit, organizimit dhe shpërndarjes së produkteve të bagëtive të imëta të tufëzuara”, u përçua nga diskutime me karakter qesharak që tregonin më shumë se çdo gjë nivelin mediokër të një klase politike në fazën më të lartë të degradimit. Në mbledhjen dalin shumë fakte, madje edhe zhvillimi i 70 mijë gjyqeve proceduese në fshat. Nga diskutimet e gjata, kam përzgjedhur disa copëza interesante:

Hekuran Isai: Kooperativa bujqësore e Jub-Sukthit...ka deri në 30 familje që marrin nga 800 deri në 1.000 lekë vetëm nga qumështi. Është njëfarë Selim Kelmendi i cili merr 1.600 lekë vetëm nga qumështi. Ka familje që shtet shet 16-20 litra qumësht në ditë në ndërmarrjen e grumbullimit, pa përmendur atë që konsumon vetë. Një fenomen tjetër që po na shfaqet në Rrethin e Durrësit është se anëtarët po na shesin qumësht me shishe nëpër familjet; që në orën 5 të mëngjesit i ke njerëzit te dera me shishet e qumështit që i shesin. Ky është problem i madh dhe mjaft shqetësues mendoj unë.

Enver Hoxha: Dhe me shishe ua shesin?

Hekuran Isai: Po, me shishe. Lënë një shishe, marrin një tjetër, njëlloj si në dyqanet e bulmetit.

Enver Hoxha: Po, po.

Hekuran Isai:Unë mendoj që bagëtia e oborreve të kooperativës të zonës fushore duhet të hiqet...
***
Enver Hoxha:…Gjithashtu në oborr, kooperativisti mund të mbajë edhe pula fushe, por jo derra, gjela deti ose pata. E para, që të mos lejojmë më spekulime me këto lloj shpendësh dhe e dyta, të mos lejojmë më të rriten në oborr të tilla shpendë që dëmtojnë kooperativën. Gjeli i detit ose pata dëmton pronën kooperativiste, kurse pula e fushës nuk e dëmton se familja mund t’i mbajë këto edhe në qymez, ose të rrethuara brenda parcelës së oborrit. Sidoqoftë, edhe sikur të dalin të kullosin në tokat e kooperativës, ato nuk i dëmtojnë bimët, siç dëmtojnë patat ose pulat e detit.

Mehmet Shehu: Për gjelat e detit apo patat duhet të nisemi nga pikëpamja që t’i prodhojnë vetëm kooperativat dhe fermat dhe jo familjet, që të mos bëhen spekulime nga ana e këtyre.

Enver Hoxha: Ashtu është, të mos lejojmë të krijohen mundësi që të bëhen spekulime nga oborri.
***
Mehmet Shehu: Ju keni mendimin që tufëzimi i lopëve të bëhet edhe në mal, edhe në fushë?

Enver Hoxha: Unë mendon që tufëzimin duhet ta bëjmë kudo, duke përfshirë edhe zonat malore, për arsye se edhe atje ka shumë punë për të bërë kooperativisti. Në qoftë se mendojmë ta angazhojmë atë me punë, bujqësia ka plot.
***
Mehmet Shehu: Lopët e përgjithësisht bagëtitë e oborreve kanë ngrënë pa llogari, kurse me tufëzimin do hanë me llogari.

Enver Hoxha: Ashtu është, kanë ngrënë pa llogari, por tani do hanë me llogari dhe do të hanë më mirë, sikurse do të shfrytëzohen më mirë.

Redaksia Online
l.q/Shqiptarja.com

  • Sondazhi i ditës:
    28 Nëntor, 09:20

    A e keni të qartë pse opozita organizon mosbindje civile?

Lajme të tjera



×

Lajmi i fundit

Festa e Pavarësisë, BE në Tiranë: 112-vjetori e gjen Shqipërinë me hapjen e negociatave për Grupkapitullin e parë

Festa e Pavarësisë, BE në Tiranë: 112-vjetori e gjen Shqipërinë me hapjen e negociatave për Grupkapitullin e parë

28 Nëntor, 09:26