Mblidhet Asambleja e Akademisë së Shkencave, Zhupa: Gjinushi e drejton në mënyrë të paligjshme, e ka kthyer në institucion të politizuar

TIRANË- Ditën e sotme është mbledhur Asambleja e Akademisë së Shkencave. Në mbledhjen e organizuar, akademiku Skënder Gjinushi prezantoi arritjet e Akademisë për vitin 2022 si edhe programin e punës për vitin 2023.

Teksa mbahej mbledhja, në oborrin e Akademisë së Shkencave ishte e pranishme deputetja demokrate Ina Zhupa, e cila tha se mbledhja po zhvillohet në mungesë legjitimiteti, pasi edhe ajo duhej të ishte e pranishme si anëtare në Komisionin e Edukimit.

Zhupa hodhi sërish akuza ndaj Gjinushit duke thënë se e drejton në mënyrë të paligjshme Akademinë e Shkencave pasi nuk është i dekretuar nga ish-Presidenti Ilir Meta. Arsyeja se pse nuk është dekretuar ka qenë posti i kryetarit të partisë në kohën kur u zgjodh për atë post. Zhupa tha se Gjinushi e ka kthyer Akademinë në e Shkencave në institucion të politizuar.

DEKLARATË E DEPUTETES INA ZHUPA NGA AKADEMIA E SHKENCAVE

Ndodhemi këtu, siç ju e dini, në oborrin e Akademisë së Shkencave, i cili duhet të ishte në fakt institucioni që prodhonte lajme pozitive. Institucioni që prodhonte shkencë, institucioni që fliste për zhvillimet e vendit, zhvillimet ekonomike, për zhvillimet sociale, ashtu siç jepte mundësinë për të ecur përpara edhe në kulturën e albanologjisë, gjuhësisë, në gjithçka që lidhet me identitetin e historisë shqiptare.

E kundërta ndodh prapa këtyre mureve sot, ku është duke u zhvilluar mbledhja e asamblesë së akademikëve, që në një rast normal unë do të isha duke e ndjekur këtë mbledhje për shkak të funksioneve të mia si deputete në Komisionin e Edukimit, por është duke u zhvilluar në kushtet e një mungese legjitimiteti.

Akademikët këtu janë përballë një kryetari i cili vazhdon e mban postin në mënyrë të paligjshme. Vazhdon dhe e mban postin të padekretuar nga Presidenti i Republikës. Është një kryetar i cili sot është në Gjykatën Kushtetuese, për cilësitë e tij si kryetar, dhe nga ana tjetër pres që kjo asamble sot e akademikëve të marri në shqyrtim edhe ligjin me porosi, që ka porositur Skënder Gjinushi, për dhënien e një mandati të dytë vetes së tij në krye të akademisë.

Pra, edhe pse e mban mandatin e tij sot që flasim në mënyrë të paligjshme, ka bërë një ligj me porosi nga dy deputetë socialistë për të tejzgjatur edhe një mandat tjetër për veten, nënkryetarin dhe sekretarin e akademisë.

Unë pres që akademikët të jenë të shqetësuar. Ata akademikë të ndershëm, ata akademikë që realisht e meritojnë këtë emër të rëndësishëm. Vetëm ne kemi mbetur sot të shqetësuar që kemi në krye ende Skendër Gjinushin si përfaqësues të Akademisë së Shkencave në grupin e punës dhe në ligjin e shkencës.

Përfaqëson Akademinë e Shkencave si kryeenciklopedist, si kryehistorian në projektin e historisë, si kryegjuhëtar në projektin e fjalorit.

I ka marrë të gjitha vetë, ku në cilësitë e tij njihet për Caruan-ën e Shkencës, njeriun që vetëm plagjiaturist. Plagjiaturon nga ata autorë të cilët nuk ekzistojnë.

Kjo situatë në Akademinë e Shkencave bëhet edhe më e vështirë për faktin se edhe sot keni në rend dite shtimin e anëtarëve të asamblesë Akademisë së Shkencave, dhe z.Gjinushi ka arritur në këto vite, në paligjshmërinë e vetë, të bënte anëtarë të rinj të Akademisë së Shkencave, njerëz që e përkrahin atë, ose njerëz të ish-PS, siç e thotë edhe investigimi i BIRN.

Ish-deputetët e PS janë tashmë akademikë të Asamblesë së Përgjithshme të Akademisë së Shkencave. Një nga akademiket e mban këtë titull sot sepse ka bërë një ligj anti-kushtetues, që e lejonte Gjinushin që të vazhdonte pa dekret në krye të Akademisë.

Mos u çudisni që në mandatin e radhës të Skënder Gjinushit, të kemi akademik edhe Petro Koçin, për shkak se po bën ligjin me porosi për t’i zgjatur dhe për t’i dhënë mandatin e dytë Skënder Gjinushit.

Kjo ishte arsyeja pse unë e mendova të rëndësishme sot, në ditën që mblidhet Asambleja e Akademisë së Shkencave, ne të kërkonim akademikët më shumë shkencë, më shumë ligjshmëri, reflektim mbi ato që kërkon vendi, zërin e akademisë kur bëhet fjalën për koncensionet e Akademisë Kulturore, siç ishte rasti i Butrintit dhe për problemet që ka ky vend, dhe jo kapjen e një akademisë nga një person dhe përdorimin e këtij posti për qëllime të veta personale dhe dhënien parti borxh Edi Ramës për qëllime të tija elektorale.

SI.E./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Mendoni se komisionet hetimore për Shëndetësinë e TIMS do kenë rezultat?



×

Lajmi i fundit

Berisha me zë Gazi!

Berisha me zë Gazi!