Komisioni Hetimor për ‘TIMS’/ Berisha në listën e dëshmitarëve, Gjylameti: Bëra ironi! Salianji: Vetë e kërkuat! Caktohen 4 ekspertët

TIRANË-  Një mbledhje procedurale që parashikonte caktimin e 4 ekspertëve për Komisionin Hetimor të TIMS, zgjati 2 orë me debate e akuza mes opozitës dhe mazhorancës. Një deklaratë e Blerina Gjylametit në mbledhjen e parë, ku kërkonte që Sali Berisha të futej në listën e dëshmitarëve, prodhoi akuza mes palëve pasi kryetari Ervin Salianji e kishte pasqyruar këtë kërkesë në planin paraprak të hetimit. Përpos Berishës që ndodhet në arrest shtëpie për aferën 'Partizani', listës së dëshmitarëve i është shtuar edhe Lulzim Basha e Gazment Bardhi.

Vetë deputetja socialiste insistoi në mbledhje që deklarata e saj ka qenë ironi dhe se nuk duhej të shtohej në listë Berisha, pasi nuk e kanë thirrur. Nga ana tjetër zëvendëskryetari socialist Toni Gogu me ironi tha se Salianji ka ëndërr të bëhet gjyqtar i Berishës dhe ta nxjerrë atë nga ballkoni, por kjo nuk është objekt hetimi për komisionin.

“Të marrësh ironinë për të vërtetë retorikën, dhe më pas të ndërtosh një fabul të tërë për të nxjerrë Romeon nga ballkoni është e tepërt. Institucionin do hetojmë, jo individin. Si thirren dëshmitarët? Kush e mori vendimin që ke vendosur emrat atje?”, tha Gjylameti.

LEXO EDHE:
'Të rezistojmë, të ngremë krye', Salianji letër nga burgu, kërkon drejtësi për Martin Canin: Asgjë nuk vjen vetë! Aq më keq po t’ia lësh në dorë kryeministrit

“Unë e kuptoj që juve në ëndrrën tuaj doni të bëheni gjyqtar i Berishës, mbase doni të t’i jepni edhe pafajësi, por ky komision nuk e ka në veprimtari këtë gjë”, tha Toni Gogu.

“Nëse ju doni të nxirrni Berishën, nuk është as ëndërr as qëllimi im dhe t’iu them të vërtetën Gjylameti unë e besoj që Berisha është Romeo, po aq sa ju jeni Zhulieta”, u përgjigj Salianji.

Akuzave se ka shkelur ligjin, kryetari Salianji iu përgjigj se ka pasqyruar në planin e hetimit kërkesat e kolegëve të mazhorancës për gjithëpërfshirje, duke theksuar se plani paraprak i hetimit është kompetencë e kryetarit.

"Plani është siç e kam deklaruar, me propozimet tuaj për thirrjen dëshmitar të Berishës, Bardhit e Bashës, apo cilindo që duhet të vijë japë llogari. Nëse ju merrni një akt dhe thoni përse se keni korrigjuar se na tërheqin veshin të partia, ca të bëj unë këtu. Nuk është faji im që u tërheq veshin vëllai i madh Edi", u shpreh Salianji. 

Ndërkohë, Salianji i bëri thirrje Policisë së Shtetit dhe institucioneve të tjera që mos të bëjnë falsifikime për proces-verbale apo protokolle që do jenë objekt i këtij Komisioni Hetimor.

“Kam një thirrje për institucionet, sidomos për Policinë që të mos falsifikojë proces-verbale apo protokolle apo akte të tjera, që do jenë objekt i këtij Komisioni Hetimor. Unë besoj se një kontribut do ketë edhe nga PS, se dihet se ata e duan shumë reformën në drejtësi”, tha ai.

Deputetja Lindita Metaliaj nga ana tjetër thotë se drejtori i Drejtorisë së Sigurimit të Informacionit të Klasifikuar është larguar nga detyra.

“A është e vërtetë që ka dhënë dorëheqjen apo është detyruar të japë dorëheqjen drejtori i Drejtorisë së Sigurimit të Informacionit të Klasifikuar (DSIK). Keni 12 vite që vidhni, që talleni me qytetarët. Nuk ju lejojmë që në këtë komision të talleni me qytetarët. Mos të bëhemi qesharakë”, tha Metaliaj.

Në fund u miratuan 4 ekspertët që do asistojnë që do të ndihmojnë punën e Komisionit Hetimor për TIMS. Dy ekspertët e propozuar nga mazhoranca janë Dritan Jahaj dhe Vjosa Bodo Mujo, ndërsa nga opozita Kreshnik Myftari dhe Henri Bici.

Rendit zhvillimet sipas orarit:

Të Fundit Të Parat

SI.E./Shqiptarja.com

TAG:
• TIMS
• ervin salianji
• komisioni hetimor per Tims
• Ervin Muça
• dosja partizani