Më 17 nëntor Shqipëria do të çelë grup-kapitullin e fundit të Integrimit me Bashkimin Evropian, “Bujqësia dhe Kohezioni”. Për kryeministrin Rama shpejtësia me të cilën ka ecur Shqipëria, duke çelur të gjithë grupkapitujt brenda 12 muajve është rekord në  procesin e integrimit për vendet kandidate.

“Shqipëria e arriti të pamendueshmen, të gjithë kapitujt e negociatave të hapur brenda 12 muajsh - rekord absolut në procesin e integrimeve europiane. Asgjë nuk na dal dot drejt majës së Shqipërisë 2030 në BE. Askush nuk na ndal dot drejt objektivit madhor të mbylljes së negociatave brenda 2027.

Sepse përtej vështirësive, pengesave, dëmtimeve të pashmangshme apo baltës së pandashme, në ngjitjen e kësaj të përpjete historike, ne po e rrisim e forcojmë muaj pas muaji Shqipërinë, me një ekonomi që po rritet; me pensionet që po rriten; me pagën minimale që po rritet; me pagat e tjera që po rriten; me investimet e brendshme e të huaja që po rriten; me mbështetjen për më të dobëtit e për të sëmurët me kancer që po rritet; me investimet e brendshme e të huaja që po rriten; pa rritur asnjë taksë dhe duke përmirësuar hap pas hapi punën e institucioneve të shtetit. Shqipëria punon dhe fiton përditë e më shumë respekt”, shkruan Rama.

Shqipëria ka hapur deri më tani 5 nga 6 grupkapituj, Themeloret, Marrëdhëniet me Jashtë, Tregun e Brendshëm si dhe Konkurrueshmëria dhe Rritja gjithëpërfshirëse si dhe Axhendën e Gjelbër. 

Më 19 korrik të 2022-shit Shqipëria u ul në konferencën e parë ndërqeveritare me BE-në duke çelur zyrtarisht negociatat. Më 15 tetor 2024-ës, nën drejtimin e presidencës hungareze, në Luksemburg do të mbahej konferenca e dytë ndërqeveritare ku Shqipëria çeli negociatat për grupkapitullin e parë dhe më të rëndësishëm, të ashtuquajturin “Themeloret”.

2 muaj më pas në 17 dhjetor të 2024-ës, sërish nën drejtimin e presidencën hungareze nisën bisedimet për grupkapitullin e dytë, atë të marrëdhënieve me jashtë. Ndërsa në prill dhe maj të 2025-s, Shqipëria çeli dy grupkapitujt e radhës, atë të “Tregut të brendshëm” dhe “Konkurrueshmëria e rritja gjithëpërfshirëse”.

Më 15 shtator, Shqipëria u ul në konferencën e gjashtë ndërqeveritare ku çeli zyrtarisht bisedime për grupkapitullin e “Axhendës së Gjelbër”, ndërsa ajo e radhës konferenca e shtatë do të jetë e fundit, për t’i hapur rrugën mbylljes së 6 grupkapitujve, me ambicien për ta përfunduar këtë proces teknik deri në vitin 2027. Shqipëria do të kalojë më pas në një proces të gjatë politik, për të marrë dritën jeshilë nga 27 parlamentet e vendeve të Bashkimit Evropian. s

Brukseli është optimist se brenda 2030-ës Shqipëria do të realizojë integrimin në union, ndërsa vetë kryeministri Edi Rama e ka shpallur anëtarësimin në BE prioritet të mandatit të katërt qeverisës.

Rendit zhvillimet sipas orarit:
Ora 14:39
Takimi me ambasadorët e vendeve të BE, Rama publikon pamjet nga tryeza e diskutimeve: Bashkëbisedim për Raportin e Progresit

 

Kryeministri Edi Rama priti sot në Kryeministri ambasadorët e vendeve të Bashkimit Europian.

Përmes një postimi në rrjetin e tij social Facebook, Rama ka ndarë me ndjekësit pamjet nga tryeza e diskutimeve me ambasadorët e BE-së.

Kreu i qeverisë bën me dije se biseda është përqëndruar lidhur me Progresin e BE-së për Shqipërinë

“Sot me ambasadorët e vendeve të Bashkimit Europian, të ardhur edhe nga kryeqytetet fqinje për bashkëbisedimin e përvitshëm pas daljes së Raportit të Progresit të BE për Shqipërinë”, shkruan Rama.

Xh.K/Shqiptarja.com

Ora 11:20
Një javë pas progres-raportit të Bashkimit Evropian/ Rama pret në takim Gonzaton dhe ambasadorët e vendeve të BE-së

Kryeministri Edi Rama priti në një takim ambasadorë të vendeve të BE-së të akredituar në Tiranë, mes të cilëve edhe kreun e delegacionit të BE-së, Silvio Gonzato. Burime për Report Tv kanë bërë me dije se në takim ishte e pranishme dhe Ministrja e Jashtme, Elisa Spiropali. 

Ky takim organizohet një javë pas publikimit të progres raportit të Shqipërisë drejt anëtarësimit në BE. Fokusi i diskutimeve mbetet tek rruga drejt familjes së madhe evropiane.

Në progres Raport vlerësohet progresi i shpejtë që ka bërë vendi ynë në fushën e integrimit, ndërsa qeveria shqiptare pret që më 17 nëntor të çelë edhe të hapë bisedimet për 5 kapitujt e përfshirë në Klasterin 5 – “Bujqësia, Kohezioni dhe Burimet”.

K.B/Shqiptarja.com