Corriere della Sera i ka kushtuar një artikull Yll Limanit dhe koncertit të tij që do të mbahet më 3 tetor në Bergamo, duke sjellë një përmbledhje të historisë së këngëtarit shqiptar, suksesit, stilit që e karakterizon dhe çfarë përfaqëson ai për të rinjtë e brezit të tij.

Artikulli i plotë:

Yll Limani do të debutojë në Itali me një koncert në ChorusLife Arena më 3 tetor, i cili përfaqëson të vetmen datë italiane të turneut të tij.

Këngëtari nga Kosova është sot një nga emrat më të spikatur të skenës së re pop shqiptare. Djali i një artisti, babai i tij ishte pjesë e një grupi të njohur shqiptar në vitet ’80, Limani, i lindur në vitin 1994, ka lindur në Kosovë në një familje shqiptare dhe sot është ndër artistët më të ndjekur në Evropën Juglindore, duke udhëhequr dhe frymëzuar një brez të ri muzikantësh.

Karriera e tij nis me paraqitjen në sezonin e parë të The Voice of Albania në vitin 2011, e ndjekur nga pjesëmarrja në Festivali i Këngës 2016 (i krahasueshëm me Festivalin e Sanremos për nga rëndësia dhe tradita), ku u rendit i treti. Rritja e tij ka qenë e vazhdueshme: sot ai ka 700 mijë dëgjues mujorë në Spotify, ndërsa këngët e tij më të njohura arrijnë miliona transmetime. ‘Malli’, për shembull, bashkëpunim me Dhurata Dorën, ka më shumë se 30 milionë transmetime.

Stili i tij muzikor vlerësohet për zërin melodik dhe aftësinë për të ndërthurur zhanre të ndryshme. Në fillim të karrierës, ai i bëri të njohura aftësitë e tij vokale përmes baladave romantike, për t’iu afruar më pas tingujve më pop dhe R&B. Turneu ‘Thirrëm Sot ose Nesër’, i cili mban emrin e albumit të tij të fundit, do ta çojë, së bashku me grupin e tij, në Maqedoninë e Veriut dhe Gjermani, ku është shfaqur tashmë disa herë. Për më tepër, do të jetë hera e parë që do të performojë në Britaninë e Madhe, me një ndalesë në Londër, si dhe në Itali, në Bergamo, qytete që korrespondojnë me komunitete të mëdha shqipfolëse. Më pas, turneu do të kapërcejë kufijtë e Evropës për të mbërritur në Shtetet e Bashkuara: më 5 dhjetor, Limani do të jetë në New York.

Me këtë turne, Yll Limani hap një kapitull të ri në evoluimin e tij artistik, duke vazhduar të ndikojë në skenën muzikore shqiptare. Ajo që e bën të vlerësuar si në vendlindje, ashtu edhe jashtë saj, është aftësia për të ndërthurur tingujt pop me melodi më tipike tradicionale, duke ruajtur një lidhje të fortë me origjinën e tij.

Së fundmi, ai ka marrë pjesë në protestat që për disa ditë kanë përfshirë Prishtinën, kryeqytetin e Kosovës, duke u rreshtuar krah protestuesve kundër vendimeve të Gjykatës së Hagës në proceset ndaj ish-krerëve të Ushtrisë Çlirimtare të Kosovës, të lidhura me luftën e fundit të viteve ’90.

Për qytetarët e Kosovës dhe Shqipërisë, muzika e Yll Limanit përfaqëson një lidhje kulturore dhe një zë që arrin të dëgjohet edhe përtej kufijve.