Media italiane ‘Paesi Online’: Shqipëria, destinacioni i përsosur për pushime verore

Shqipëria rezulton të jetë zgjedhja ideale për verën 2024, sepse ofron një ndërthurje të bukurisë natyrore, pasurisë kulturore dhe komoditetit ekonomik, shkruhet në një artikull të botuar në revistën italiane ‘Paesi Online’.

Shqipëria, një vend i vogël i kufizuar nga deti Jon dhe deti Adriatik në Evropën Jugore, është i pasur me histori, kultura dhe bukuri natyrore. Kjo mrekulli e Ballkanit është kthyer në një destinacion të njohur turistik i cili për dekada ishte nënvlerësuar.

Për momentin, qytetet e bukura bregdetare po marrin njohjen e merituar për plazhet e tyre të pacenuara që të lënë pa frymë. Shqipëria është kthyer në destinacionin ideal për personat që kanë një buxhet të kufizuar, por nuk duan të heqin dorë nga deti me ujëra të kristalta dhe plazhet që nuk kanë asgjë për t’i pasur zili nga ato të Karaibeve.

Shqipëria: Plazhet e saj të mrekullueshme deri në Gadishullin e Karaburunit
Vendi i shqiponjave, nga veriu në jug, është plot me qytete karakteristike bregdetare dhe plazhe të mrekullueshme. Një shembull në veri të Shqipërisë është Rana e Hedhun, plazhi më i bukur në vend, ku mbizotërojnë duna të shumta mbi 200 metra të larta dhe rrethohen nga një pyll i dendur me pisha.

Në Karpen, në veri, është një tjetër plazh më pak i njohur, por edhe më pak i mbushur me vizitorë, ku mund të pushoni dhe të shijoni kuzhinën vendase në restorantet dhe baret aty pranë. 150 km në veri të Karpenit, vizitoni gadishullin e Karaburunit, ku ndodhet parku detar i Tokës së Shqiponjave dhe Shpella e mrekullueshme detare e Haxhi Alisë dhe ujëvara e saj mahnitëse.

Në pjesën më veriore të gadishullit ndodhet Kepi i Gjuhëzës, ku gjenden limane të vogla dhe shpella të mrekullueshme të formuara me kalimin e kohës në bregun shkëmbor. Gjithashtu, në gadishullin e Karaburunit është Gjiri Gramës, një liman i fshehur me rërë të bardhë shumë të imët, i rrethuar nga natyra e egër.

Deti i kristaltë dhe plazhet mahnitëse të Shqipërisë
Brigjet e Adriatikut dhe Jonit në Shqipëri ofrojnë një shumëllojshmëri plazhesh me nuanca të mrekullueshme mes qiellit dhe detit. Përgjatë bregut të Adriatikut, mund të zbuloni disa nga plazhet më të bukura dhe më të njohura , si Plazhi i Malit të Robit dhe Plazhi i Velipojës, të dyja të karakterizuara nga rëra e hollë dhe e artë. Në vazhdim, ndodhet Gjiri i Lalëzit dhe Plazhi i Durrësit që ofrojnë hapësira të mëdha rëre, ideale për shëtitje të gjata në perëndim të diellit.

Duke lëvizur drejt Bregut të Jonit, ndeshesh me lloje të ndryshme plazhesh, por vetëm plazhet e Dhërmiut dhe Ksamilit dallohen nga të gjithë për detin e pastër dhe rërën e imët. Ndërsa Plazhi i Livadhit njihet për zhavorrin e tij, ideal për ata që nuk e duan rërën.

Për një ndërthurje mes dy varieteteve, është Borshi, një plazh i gjatë mes guralecave dhe rërës që ofron mundësinë për të shijuar relaksin, me çmime më shumë se të favorshme, bare dhe ambiente, padyshim me pamje nga deti. Në bregdetin e Jonit ndodhet Plazhi i Gjipesë me rërë, i vendosur mes shkëmbinjve dhe i rrethuar nga natyra, jo shumë larg Sarandës dhe Karaburunit.

Krahas detit me ujëra të kristalta dhe rërës së imët, plazhi i Gjipesë ofron për aventurierët, Kanionin e tij për ata që dëshirojnë të eksplorojnë bimësinë madhështore. Plazhi i Potamit, me një shtrirje prej 16 kilometrash, një plazh i gjatë dhe më i qetë, ju ofron mundësinë të shijoni gatimet e peshkut dhe Plazhi i Llamanit, i rrethuar nga mure të larta shkëmbore që reflektojnë në detin blu. Së fundi, plazhi i famshëm i Porto Palermos i cili e ka marrë emrin nga kështjella e ndërtuar në gjirin e Porto Palermos, plazhi është një parajsë e vërtetë për adhuruesit e zhytjeve.

Vendet e veçanta të Shqipërisë
Për të vazhduar zbulimin e bukurive të këtij destinacioni ekonomik, një tjetër vepër e natyrës shqiptare është burimi “Syri i Kaltër”, që ndodhet në fshatin Mullinë, në jug të vendit, rrëzë Malit të Gjerë. Uji rrjedh nga shkëmbinjtë me një ngjyrë të mrekullueshme blu të errët duke formuar liqenin e tij të mrekullueshëm.

Përveç natyrës, plazheve dhe ujëvarave, mund të vizitoni Parkun Arkeologjik të Butrintit, një vend i trashëgimisë së UNESCO-s, një qytet antik ku mund të zbuloni gjetje të shumta dhe muzeun historik të Tiranës, kryeqyteti i Shqipërisë.

Vendet e Shqipërisë: çfarë duhet të shihni
Vendndodhjet e shpërndara në të gjithë territorin i japin kësaj toke një bukuri të veçantë dhe e bëjnë Shqipërinë shumë më tepër sesa thjesht një destinacion të thjeshtë turistik ekonomik.

Nisur nga Saranda, një qytet 20 kilometra larg “Syrit të Kaltër,” është një destinacion i preferuar për të rinjtë, i cili vitet e fundit ka pasur një rritje të madhe të turizmit. Qyteti, përveç plazheve të mrekullueshme, ka edhe Kalanë e e Lëkurësit dhe sinagogën e lashtë. Rreth 12 kilometra larg është Plazhi i Pulëbardhës, i mbushur me vizitotë dhe i përsosur për zhytje.

Shqipëria, me panoramën e saj unike dhe pasurinë e saj kulturore, përfaqëson një destinacion magjepsës që të lejon të zbulosh mrekulli të shumta, duke shmangur vendet turistike të  mbipopulluara dhe të shtrenjta, por pa hequr dorë nga asgjë.

Dhe ndër të tjera mund të vizitoni Apoloninë, një nga qytetet më të vjetra në Shqipëri, me mbetjet e saj historike magjepsëse. Vlora, e famshme për portin e saj natyror dhe Ishullin e Sazanit. Himara, midis Vlorës dhe Sarandës, është një nga qendrat më të mëdha turistike të zonës.

Ndërkaq vetëm 35 kilometra nga Tirana, Durrësi, qyteti i dytë më i madh i Shqipërisë, i pasur me bukuri historike dhe kulturore: vizitoni Vilën e Zogut, Muzeun Arkeologjik, Kalanë dhe Kullën Veneciane dhe gjithashtu Xhaminë e Fatihut, Amfiteatrin Romak, Xhaminë e Madhe, Banjat Romake dhe Forumin Bizantin.

Xh.K/Shqiptarja.com

TAG:
• shqiperia turistike
• turizmi