SHBA-të po përgatiten të sekuestrojnë më shumë anije që transportojnë naftë venezueliane pas sekuestrimit të një cisterne gjatë kësaj jave. Sipas disa burimeve për Reuters kjo rrit presionin mbi Presidentin e Venezuelës, Nicolas Maduro.

Sekuestrimi ishte ndalimi i parë i një ngarkese nafte nga Venezuela, e cila ka qenë nën sanksione të SHBA-së që nga viti 2019. Kjo situatë u shënua ndërsa SHBA-të po ekzekutojnë një grumbullim ushtarak në shkallë të gjerë në në jug të Karaibeve dhe ndërsa Presidenti i SHBA-së Donald Trump shtyn për rrëzimin e Maduros.

Veprimi i fundit i SHBA-së i ka vënë në gatishmëri pronarët e anijeve, operatorët dhe agjencitë detare të përfshira në transportin e naftës bruto venezueliane.

Ndërhyrje të mëtejshme të drejtpërdrejta nga SHBA-të priten në javët në vijim, duke synuar anijet që transportojnë naftë venezueliane, të cilat mund të kenë transportuar edhe naftë nga vende të tjera të synuara nga sanksionet e SHBA-së, siç është Irani.

Qeveria e Venezuelës këtë javë tha se sekuestrimi i SHBA-së përbënte një "vjedhje".

E pyetur nëse administrata Trump planifikoi konfiskime të mëtejshme anijesh, zëdhënësja e Shtëpisë së Bardhë, Karoline Leavitt, u tha gazetarëve se nuk do të fliste për veprimet e ardhshme, por theksoi se SHBA-të do të vazhdonin të zbatonin politikat e sanksioneve të presidentit.

“Nuk do të rrimë duarkryq dhe të shohim anijet e sanksionuara të lundrojnë në det me naftë të tregut të zi, të ardhurat nga e cila do të nxisin narkoterorrorizmin e regjimeve mashtruese dhe të paligjshme në të gjithë botën”, tha ajo.

Një reduktim ose ndalim i eksporteve të naftës venezueliane, gjeneratori kryesor i të ardhurave për qeverinë venezueliane, do të tendoste financat e qeverisë Maduro.