Plagosen me armë dy të rinj serbë në Kosovë, arrestohet pjesëtari i FSK-së! Kurti: Dënoj sulmin! Petkoviç: Përpjekje për të vrarë fëmijë të pafajshëm

Shefi i misionit të EULEX-it, Lars-Gunnar Wigemark ka thënë se “EULEX-i dënon sulmin e pakuptimtë të sotëm kundër një të riu dhe një djali në Shtërpcë dhe u uron shërim të shpejtë”

Përmes një postimi Wigemark ka thënë se EULEX-i dënon “sulmin e pakuptimtë të sotëm kundër një të riu dhe një djali në Shtërpcë dhe u uron shërim të shpejtë”.

“Mendimet tona janë me familjet e tyre dhe komunitetin lokal. Në të njëjtën kohë, ne përgëzojmë policinë e Kosovës për reagimin e shpejtë dhe arrestimin e një të dyshuari”, ka shkruar shefi i misionit të EULEX-it.

“EULEX-i dënon sulmin e pakuptimtë të sotëm kundër një të riu dhe një djali në Shtërpcë dhe u uron shërim të shpejtë. Mendimet tona janë me familjet e tyre dhe komunitetin lokal. Në të njëjtën kohë, ne përgëzojmë @Kosovo_Police për reagimin e shpejtë dhe arrestimin e një të dyshuari”, thuhet në postimin e shefit të misionit të EULEX-it, Lars-Gunnar Wigemark në Twitter.

Drejtori i të ashtuquajturës zyrë për Kosovën, Petar Petkoviç, ka deklaruar se ka kontaktuar me familjet e të lënduarve në Shtërpcë dhe ka kërkuar nga institucionet e Kosovës që të takohet me të rinjtë e lënduar.

Ndonëse e pakonfirmuar nga Policia e Kosovës se incidenti ishte i motivuar etnikisht, Petkoviç ka thënë se dy të rinjtë serbë u qëlluan vetëm pse ishin të veshur me rroba serbe.

“Milloshi dhe Stefani u qëlluan vetëm sepse ishin të veshur me rroba të Krishtlindjes dhe sepse kishin emër dhe mbiemër serb”, ka thënë Petkoviç.

Ai ka deklaruar se dikush dëshironte ta përgjakte Krishtlindjen. Ndryshe, Petkoviç është duke qëndruar në Zubin Potok, ku bashkë me serbë e prijës fetarë, po e shënojnë Krishtlindjen Ortodokse që festohet sonte. 

Banorët serbë të Shtërpcës kanë bllokuar rrugët, pasi dy persona u plagosën sot gjatë ditës. Ata kanë bllokuar fillimisht rrugët me vetura. Ndërkohë, Indeksonline raporton se në rrugë janë vendosur edhe drunj dhe janë ndezur zjarre duke djegur goma. Sipas mediave në Kosovë përveç rrugës që të çon për në Prevallë, banorët e Shtërpcës kanë bllokuar edhe rrugët për në Brezovicë, ato kryesore dhe rrugët alternative.

Mbrëmjen e sotme një ngjarje e rëndë ndodhi në fshatin Drajkovc të Shtërpcës ku dy persona 11 dhe 21 vjeçar shtetas serb janë plagosur nga i dyshuari Azem Kurtaj. Ky i fundit i ka qëlluar dy të rinjtë teksa ka qenë në një automjet në lëvizje dhe më pas është larguar nga vendi i ngjarjes. Indeksonline ka kontaktuar me të dyshuarin i cila ka thënë se ndihet i pafajshëm për rastin që po ndërlidhet emri i tij. 

Nicholas Abbott, ambasadori britanik në Kosovë, ka reaguar pas plagosjes së dy personave në Shtërpcë.

Ai shprehu shqetësimin për sulmin ndaj dy të rinjve serbë të Kosovës dhe tha se mirëpret reagimin e shpejtë të Policisë së Kosovës për arrestimin e të dyshuarit.

Isha i shqetësuar kur dëgjova për një sulm ndaj dy të rinjve serbë të Kosovës dhe mirëpres arrestimin e shpejtë të një të dyshuari.

I uroj shërim të shpejtë.

Komisioneri Evropian për Politikë të Fqinjësisë dhe Zgjerim, Oliver Varhelji, ka reaguar në lidhje me plagosjen e dy djemve serbë në Shtërpce. Përmes një postimi të bërë në “Twitter”, ai thotë se pret një hetim të plotë nga autoritetet.

‘Jam i tronditur nga sulmi ndaj dy fëmijëve në Shtërpac. Nuk mund të ketë asnjë justifikim për asnjë dhunë’, nënvizoi Varhelji teksa u uroi të plagosurve shërim të shpejtë.

Kreu i AAK-së, Ramush Haradinaj ka reaguar për plagosjen e dy të rinjve serbë. Haradinaj shkruan se ky është një akt i papranueshëm, ndërsa u bën thirrje autoriteteve që të zbardhin ngjarjen.

“Plagosja e dy të rinjve në Shtërpcë, është një akt i papranueshëm dhe i dënueshëm! Të plagosurve u uroj shërim të shpejtë. Njëkohësisht kërkoj nga organet ligjzbatuese në Kosovë që sa më parë ta informojnë opinionin publik për rrethanat në të cilat ndodhi ngjarja si dhe për motivet e saj.

Gjithashtu, apeloj te familjarët dhe serbët lokalë që të mos bijnë pre e propagandës që këtij incidenti t’i japin konotacion politik! T’i japim kohë drejtësisë që t’i zbardhë rrethanat dhe motivet e kësaj ngjarjeje!” ka shkruan Haradinaj.

Kryeprokurori i Prokurorisë Themelore në Ferizaj, Shkuri Jasharaj, në një prononcim dhënë për Nacionalen, ka konfirmuar se rrugët që çojnë në Shtërrpcë janë të bllokuara, e se për pak pritet të filloj intervistimi i të dyshuarit.

“Rrugët janë të bllokuara, në dy anët. Nuk mund të shkohet në Shtërrpcë, pasi janë bllokuar rrugët, në dy anët. I dyshuari tashmë është në stacion, dhe pritet për pak të fillojë intervistimi i tij.” ka thënë Jasharaj.

Ai ka konfirmuar se mosha e të plagosurve është 11 dhe 21 vjeç.

“Mosha u ngatërrua njëherë, por zyrtare është se ata janë 11 dhe 21 vjeçar.”, ka thënë kryeprokurori.

Kujtojmë se i dyshuar kryesor deri tash për aktin është një pjestar i FSK-së.

Ministri i Mbrojtjes se Kosovës, Armend Mehaj ka bërë të ditur se një pjesëtarë i Forcës së Sigurisë së Kosovës është i përfshirë në sulmin që ka ndodhur në Shtërpcë.

Mehaj përmes një postimi në Facebook, ka bërë të ditur se për të njëjtin do të trajtohet sipas rregullores dhe ligjeve që ka në fuqi Ministria e Mbrojtjes dhe FSK-ja.

“Të dashur qytetarë, tani u njoftova se në rastin që ka ndodhur në Shtërpcë është përfshirë një pjesëtar i Forcës së Sigurisë së Kosovës. Me rastin janë duke u marrë organet e sigurisë dhe drejtësisë. I njëjti do ta trajtohet edhe sipas rregulloreve dhe ligjeve që kemi në fuqi në Ministrinë e Mbrojtjes dhe Forcës së Sigurisë”, ka shkruar ai.

Më tej Mehaj iu ka uruar shërim të shpejtë të plagosurve.

“Shpreh keqardhjen më të thellë për atë që ka ndodhur në Shtërpcë. Të plagosurve, u uroj shërim sa më të shpejtë. Raste si kjo janë të izoluara, por si të tilla nuk guxojnë të ndodhin. Ministria e Mbrojtës dhe Forca e Sigurisë së Kosovës mbeten të përkushtuar për t'i shërbyer qytetarëve tanë pa dallim”, ka përfunduar Mehaj.

Lista Serbe ka dënuar ashpër sulmin që ka ndodhur në komunën e Shtërpcës, ku dy djem kanë mbetur të plagosur.

“Lista Serbe dënon ashpër tentativën e vrasjes së djemve serbë në fshatin Gotovushë dhe kërkon që urgjentisht të gjenden dhe të ndëshkohen përgjegjësit e këtij krimi brutal dhe të tmerrshëm. Në ditën e Krishtlindjes, kur fëmijët serbë po ktheheshin nga Badnjaku, pranë tyre u ndal një automjet me dy shqiptarë, të cilët i kërcënuan dhe më pas u përpoqën t'i vrisnin duke i qëlluar. Me atë rast u plagosën të dy djemtë”, thuhet në njoftim.

Kryeministri i Kosovës Albin Kurti ka reaguar në lidhje me plagosjen e 2 serbëve në Kosovë ditën e sotme. Kurti thotë se e dënon sulmin ndaj qytetarëve dhe se ndihet i brengosur. Kurti thotë se siguron qytetarët se Policia e Kosovës është e angazhuar maksimalisht në kryerjen e detyrave të saj me qëllim të mbrojtjes së jetës dhe pronës së të gjithëve pa dallim.

'E dënoj ashpër sulmin ndaj dy qytetarëve të Kosovës në Shtërpcë. Thellësisht i brengosur për plagosjen e tyre. Sipas informatave, të rinjtë 11 dhe 21 vjeçar janë jashtë rrezikut për jetë dhe ju dëshiroj shërim të shpejtë. Policia e Kosovës veçse ka arrestuar të dyshuarin i cili pa asnjë mëdyshje duhet dhe do të përballet me organet e drejtësisë. Njësitet relevante do të vazhdojnë hetimet deri në zbardhjen e të gjitha rrethanave të këtij akti të papranueshëm dhe të dënueshëm.  Dua të siguroj të gjithë qytetarët se Policia e Kosovës është e angazhuar maksimalisht në kryerjen e detyrave të saj me qëllim të mbrojtjes së jetës dhe pronës së të gjithëve pa dallim.'- shkruan Kurti.

Një ngjarje e rëndë në Shterpcë ka ndodhur gjatë ditës, ku kanë mbetur të plagosur dy qytetarë serbë të Kosovës.

Ndaj kësaj ngjarje ka reaguar edhe e ashtuquajtura Zyra për Kosovën në Qeverinë e Serbisë, që drejtohet nga Petar Petkoviç, e cila ka thënë se është një tentativë për të vrarë fëmijët e pafajshëm serbë.

“Ata kanë marrë plagë me armë zjarri, njëri djalë është qëlluar në dorë dhe tjetri në shpatull dhe vetëm për fat të tyre nuk kanë pësuar lëndime apo rrezik për jetën. Në këto momente po transportohen për në Qendrën Spitalore Klinike në Graçanicë, ku do të kenë kujdesin më të mirë të mundshëm. Është një tentativë evidente për të vrarë fëmijët e pafajshëm serbë të cilët janë shqetësuar vetëm për shkak se kanë veshur pemën e Krishtlindjes dhe kështu kanë treguar qartë se janë serbë”, thuhet në njoftim, transmeton Kosovaonline.

Madje, në komunikatën e tyre, kjo zyrë thotë se ky sulm është pasojë e drejtpërdrejtë e politikës anti-serbe të kryeminsitrit Albin Kurti.

“Ky lloj sulmi është pasojë e drejtpërdrejtë e politikës antiserbe të Albin Kurtit, i cili me sjelljen dhe veprimet e tij inkurajon të gjithë ata që duan gjak serb, edhe në Krishtlindje. Kërkojmë reagim urgjent dhe të vendosur nga bashkësia ndërkombëtare dhe Zyra për Kosovë dhe Metohi do t'u ofrojë familjeve dhe të lënduarve të gjithë ndihmën e nevojshme”, thuhet në njoftim.

Një ngjarje e rëndë ka ndodhur sot në komunën e Shtërpcës, që është lokalitet i banuar me shumicë serbe. Dy persona kanë mbetur të plagosur si pasojë e të shtënave me armë zjarri. E Policia e Kosovës tashmë ka njoftuar se ka arrestuar të dyshuarin për sulm ndaj dy të rinjve serbë në Shtërpcë.

“I dyshuari është duke u shoqëruar në Policinë Rajonale të Ferizajt, përkatësisht Sektorin Rajonal të Hetimeve, për veprime tjera hetimore”, thuhet në njoftim.

Qytetarët serb të komunës së Shtërpcës, kanë bllokuar rrugët në Gutovushë, duke kërkuar arrestimin e menjëhershëm të personit i cili ka plagosur dy serbë sot gjatë ditës.

Një 11-vjeçarë dhe një 31-vjeçarë, janë plagosur sot, nga një person i cili kishte shtënë nga një makinë në lëvizje. Sipas banorëve, bllokada do të zgjasë deri në kapjen e autorit.

Mediumi serb në Kosovë, Kosovoonlinë raporton se situata është mjaft e tensionuar. Të pranishëm janë pjesëtarë të policisë së Kosovës, ndërsa një automjet i KFOR-it me pjesëtarë polakë është parkuar pak më larg nga bllokada. 

Sipas qytetarëve, rruga për në Shtërpce ka mbetur e bllokuar, raporotojnë mediat në Kosovë.