Meta tjetër apel opozitës: Zgjedhjet me 13 tetor, askush të mos gjejë justifikime dhe alibi nëse nuk reflekton

TIRANË-  Ndonëse 13 tetori nuk është njohur nga opozita dhe mazhoranca, presidenti Ilir Meta vijon thirrjet që partitë politike ta njohin atë si datë zgjedhjesh. Përmes një deklarate të bërë një vit më parë Meta i ka bërë thirrje partive politike që të nisin përgatitjet për realizimin e zgjedhjeve në 13 tetor që Shqipëria të mund të çelë negociatat në 18 tetor dhe të arrihet marrëveshja për reformën zgjedhore. Ai shprehet se askush nuk duhet të gjejë justifikime dhe alibi nëse nuk reflekton, duke nënkuptuar qëndrimin e liderit demokrat Lulzim Basha i cili vijon bojktotin pa afat të institucioneve.

Kreu i shtetit deklaron se duhet shfrytëzuar urgjent gatishmëria e drejtuesve të OSBE-së për të ndihmuar në tejkalimin e kësaj krize.

"Të dashur miq! 
Po ju rikujtoj qëndrimin tim publik në 27 qershor 2018, një ditë pasi ishin bërë të njohura konkluzionet e Këshillit për Çështjet e Përgjithshme mbi negociatat e anëtarësimit të Shqipërisë me Bashkimin Europian!

Jo vetëm që u shpërdorua një vit pa bashkëpunim, përqendrim e përgjegjësi, por gjithçka u përkeqësua vetëm në interes të luftës për pushtet.

Ndërkohë kanë kaluar më shumë se dy muaj nga dita kur u dhashë mundësi të dy palëve për të realizuar zgjedhje vendore gjithëpërfshirëse.

Ende kemi mundësi t'i shfrytëzojmë këto ditë, për të realizuar zgjedhje në 13 tetor 2019, si një detyrim, jo vetëm ligjor, por edhe si domosdoshmëri për të mos i mbajtur zero shanset që Shqipëria t'i çelë negociatat për anëtarësim me BE në 18 tetor 2019.

Askush të mos lodhet të gjejë justifikime dhe alibi nëse nuk reflekton. Çdo gjë mund të lobohet në BE, por jo injorimi i kritereve të Kopenhagenit. Zgjedhjet e lira e të ndershme janë pjesë e tyre dhe të paevitueshme.

Ndaj duhet shfrytëzuar urgjent gatishmëria e drejtuesve të OSBE-së për të ndihmuar në tejkalimin e kësaj krize duke e pranuar këtë gatishmëri tani, me qëllim që jo vetëm të realizohen zgjedhjet vendore në 13 tetor 2019, por edhe të arrihet marrëveshja për refomën zgjedhore sa më parë, në mënyrë që vendi ynë të ketë mundësi të çelë negociatat në 18 tetor 2019.

- 27 qershor 2018 - 
Ashtu siç kaloi një ditë, do kalojë dhe një vit

Konkluzionet e djeshme të Këshillit për Çështjet e Përgjithshme mbi negociatat e anëtarësimit të Shqipërisë me Bashkimin Evropian duhen mirëpritur me realizëm dhe përgjegjshmëri.

Ne të gjithë duhet ta vlerësojmë dhe çmojmë vullnetin pozitiv me të cilin si Komisioni Evropian ashtu edhe të gjitha vendet anëtare, e mirëpresin procesin e integrimit të Shqipërisë dhe gjithë rajonit në BE.

Kjo qasje duhet të na nxisë për një lexim të drejtë dhe realist të sfidave serioze që kemi përpara, veçanërisht në fushën e sundimit të ligjit.

Një vit kalon shpejt, ashtu si nga dje kaloi një ditë.

Provimi ynë i qershorit të ardhshëm do të jetë shumë i vështirë e kërkues pasi edhe vetë Bashkimi Europian do të ketë provimin e tij zgjedhor në të njëjtën kohë.

Ndaj, i ftoj të gjithë për përqendrim, përgjegjësi dhe bashkëpunim", shkruan Meta.

Afati i fundit për t'u regjistruar në zgjedhjet e 13 tetorit ishte pikërisht data 4 gusht, kur LSI, PR dhe PAA paraqitën një kërkesë për regjsitrim pranë Komisionit Qendror të Zgjedhjeve. Megjithatë lideri demokrat Lulzim Basha, pak ditë më parë tha se kërkesa e partive aleate për t'u regjistruar në zgjedhje është bërë për të detyruar KQZ të nisë përgatitjen e zgjedhjeve, duke rrëzuar kështu deklaratat e tyre se do të marrin pjesën në zgjedhje.

/b.ha./Shqiptarja.com

TAG:
• Ilir Meta
• Presidenti i Republikës