Meta: Berisha të veprojë si
Nano të bëjë rotacion paqëso

TIRANE - Kryetari i LSI Ilir Meta është shprehur se Berisha duhet të pranojë humbjen dhe të bëjë një rotacion paqësor pushteti ashtu sikurse bëri Fatos Nano më 2005. I ftuar mbrëmë (17 maj) në emisionin “Tonight Ilva Tare” ai ka folur për koalicionin me Edi Ramën dhe besimin se do fitojë me diferencë 200 mijë vota opozita.

Meta është prononcuar për kompromisin e mbetur pezull, propozuar nga LSI-ja si Berishës dhe Ramës, për të cilin ai u shpreh:

"Problemi është që unë nuk po arrij të kuptoj kryeministrin Berisha, i cili për një kohë të gjatë është angazhuar për miratimin e tre ligjeve, dhe tani që LSI-ja dhe unë personalisht kemi propozuar një kompromis që këto tre ligje të miratohen tani pa u mbyllur ky sesion parlamentar, dhe të hyjnë në fuqi në shtator, bën sikur nuk e dëgjon këtë dhe thotë o më votoni kështu siç dua unë, ose hajde të bëjmë referendum në shtator. Kur këtu kemi të bëjmë më një çështje madhore për vendin, nuk është se kemi të bëjmë me një raport personal ose një debat të karakterit të ngushtë partiak."


META: S'E KUPTOJ BERISHËN PSE S'I VOTON MË 3 LIGJET

Z. Meta keni akuzuar qeverinë shumë këto kohët e fundit. Këto ditë që kaluat në opozitë ka këto probleme qeveria?

Jo nuk është tamam kështu. Por, absolutisht që këto janë probleme reale, janë probleme konkrete dhe janë probleme në rritje. Dhe të gjitha këto, së bashku edhe me disa shqetësime të tjera, ku themelore ka qenë një çekuilibrim i balancave politike dhe një përqendrim i tepruar i pushteteve në duart e kryetarit të PD, që është dhe kryeministër. Pra, në kompleks, të gjitha këto kanë sjellë dhe pozicionin e ri të LSI.

Cilin pushtet morri Berisha pa votën tuaj?

Lidhur me këtë pyetje, unë mund t’u them se LSI që ditën që ka bërë një marrëveshje me PD, është angazhuar për të respektuar në maksimumin e mundshëm këtë marrëveshje, pa pasur asnjë paragjykim për të gjetur një sebep, apo një çështje për të prishur marrëveshjen. Dhe pa asnjë diskutim që nëse jo marrëveshje funksionoi katër vite, pavarësisht nga vështirësitë e saj të dukshme apo të padukshme, mendoj se në radhë të parë kjo është një meritë e LSI. Natyrisht që nuk mund të lë pa meritë dhe vetë z. Berisha personalisht. Por në fund të ditës mund të them që nëse LSI i bëri gjithë përpjekjet e saj për një president konsesual dhe për këtë besoj se dëshmitarë janë të gjithë ata që kanë ndjekur këto zhvillime, kur kjo ishte çështja kyç edhe përsa i takon raportit midis pushteteve në vend, edhe përsa i takon mundësive për të rritur ose pakësuar hapësirën e bashkëpunimit midis mazhorancës dhe opozitës. Është e qartë që për arsye dhe për faktorë që nuk vareshin vetëm nga LSI, por edhe nga mënyra se si u soll lidershipi i PS, që duhet të kishin qenë sipas mendimit tim më bashkëpunuese dhe më realist, por edhe për shkak të një përpjekje të PD për të pasur këtë institucion, si të thuash për të pasur një ndikim të sajin, solli një moment të tillë, i cili në fakt natyrisht që do të sillte më vonë edhe përfundimin normal të një marrëveshje katërvjeçare. Që do të thotë se, LSI duke votuar për presidentin i cili u propozua nga vetë PD, njëkohësisht dhe në emër të një stabiliteti të rrethanave, po tu kthehemi përpara një viti zhvillimeve, padyshim që kjo përgjegjësi që morri atëherë shoqërohet tani dhe me një përgjegjësi tjetër më të madhe.

A mund ta kishit kushtëzuar më shumë z. Berisha, qoftë dhe në zgjedhjen e presidentit, qoftë dhe në vendime të tjera në ato që ju i quani uzurpim të pushteteve?

Nuk është problemi i kushtëzimit. Por, në politikë gjërat nuk zhvillohen si në laborator ku mund t'i kontrollosh disa procese. Gjithmonë, të gjithë ata që janë jashtë politikës kanë aftësinë dhe është shumë e lehtë të ngresh kritika, por në fund fare politika është produkt i rrethanave dhe i mundësive konkrete. Duhet të kemi parasysh që LSI kapitur një përfaqësim modest në parlament, dhe natyrisht ka pasur dhe një përgjegjësi gjithmonë për të vënë në balancë stabilitetin dhe pasojat e mungesës së stabilitetit të vendit.

Meqë jemi te përgjegjësitë, a mban LSI-a përgjegjësi për qeverisjen në këto katër vitet e fundit?

Patjetër që LSI i mban këto përgjegjësi, që mund të mbajë për ato pozicione dhe për atë peshë reale që ka pasur në qeverinë apo qeverisjen e vendit. Por, duhet të jemi të qartë që LSI nuk ka pasur lidershipin e qeverisë. Ka bërë përpjekjet e saj më të mira dhe më konstruktive. Dhe në këtë drejtim ne jemi të hapur për të mbajtur çdo përgjegjësi dhe përgjegjësia do lexohet të vota.

Kur jeni të hapur keni ndonjë përgjegjësi konkrete që mund ta ndani?

Nuk e besoj. Ndoshta një defekt i marrëveshjes bërë me PD, ka qenë fakti që përgjegjësitë mund të kishin qenë më të qarta, më të ndara sipas sektorëve. Është e vërtetë që dikur LSI mund të ketë pasur ministri, është po kaq e vërtetë që Drejtori shumë të rëndësishme kanë qenë drejtuar nga përfaqësues po themi të PD, e kështu me radhë. Por, kjo nuk është një arsye për tu shmangur nga këto përgjegjësi që ne mund të marrim dhe që i kemi marrë.

A mendoni se mund t’ju penalizojnë me votën e 23 qershorit?

Jo, sepse unë mendoj që qytetarët shqiptarë në radhë të parë, do ta vlerësojnë LSI-në për guximin e saj për të marrë vendime të rëndësishme, në radhë të parë në interesin e përgjithshëm të vendit. Dhe unë mendoj se koalicioni me PD-në, pas zgjedhjeve të vitit 2009 ishte një përgjegjësi, ishte një kosto, ishte thyerja e një tabuje por ishte zgjidhja e vetme për ato momente, e cila ndoshta nuk u kuptua shumë dhe nga mbështetësit tanë fillimisht, por që më pas pati një mirëkuptim sepse sidoqoftë solli një stabilitet, solli një qetësi, solli liberalizim e vizave, pavarësisht nga vështirësitë e tjera.

Ka një ministri aktuale që ka qenë shumë direkte me sulmet apo në deklarimin e aferave korruptive nga drejtimi i LSI nga MSH, e kam fjalën për ministrin Kosova. Ju si e vlerësoni dhe si i gjykoni komentet e tij?

Unë këtë nuk e vlerësoj fare si shqetësim, sepse e di që ai ka pasur një problem personal me ish ministrin, dhe janë të dy të një fushe, në fushën e mjekësisë kështu që nuk ja vlen të hyjmë në këto çështje. Është personale, fare banale.

S’ka të bëjë me një qëndrim të PD ndaj LSI?

Absolutisht. PD i ka të gjitha letrat aty. Ka prokurorinë, i ka gjykatat, i ka të tëra. Ne në momentin që kemi marrë një vendim politik, mendojmë se i shërbyem vendit në radhë të parë. Nuk kemi pasur asnjë shqetësim dhe nuk kemi asnjë shqetësim nga institucioni i SHIK, i prokurorisë i të gjithëve, nuk kemi asnjë shqetësim.

Z. Meta si është të kalosh nga qeveria në opozitë brenda natës?

Unë nuk mendoj se për një politikan me një përvojë, jo të pakët si puna ime dhe në funksione të ndryshme, kjo përbën ndonjë ngjarje të rëndësishme. Absolutisht. E rëndësishme është kudo që je të japësh kontribut pozitiv dhe ti shërbesh perspektivës kryesore që duhet të ketë vendi. Dhe besoj se fakti që ne kemi menduar dhe kemi gjykuar që me këtë vendim ne i bëjmë një shërbim pozitiv vendit veç se na bën të ndihemi më mirë.

Si e komentoni deklaratën e z. Berisha që thotë se ju një ditë silleni si qeveritar, një ditë si opozitar?

Kjo natyrisht që është një gjetje interesante, sepse ndërkohë gjërat janë bardh e zi, dhe të luftohet për vdekje unë mendoj që Shqipëria e ka kaluar këtë fazë, Shqipëria është në një fazë tjetër, shumë më të emancipuar të politikës dhe roli i LSI është i tillë që ti shërbejë këtë emancipimi. Gurë-gurë bëhet murë, por gurë- gurë bëhet dhe urë, dhe ne kemi qenë dhe jemi për ura bashkëpunimi. Ndoshta doktori e ka të vështirë që të kuptojë qëndrimet tona, të cilat një ditë i duken kritike, një ditë i duken si konstruktive, por ajo që dua të them unë është që nuk është kjo çështja kryesore e shqiptarëve, se çfarë thotë Meta sot e çfarë thotë Meta nesër. Problemi është që unë nuk po arrij të kuptoj kryeministrin Berisha, i cili për një kohë të gjatë është angazhuar për miratimin e tre ligjeve, dhe tani që LSI-ja dhe unë personalisht kemi propozuar një kompromis që këto tre ligje të miratohen tani pa u mbyllur ky sesion parlamentar, dhe të hyjnë në fuqi në shtator, bën sikur nuk e dëgjon këtë dhe thotë o më votoni kështu siç dua unë, ose hajde të bëjmë referendum në shtator. Kur këtu kemi të bëjmë më një çështje madhore për vendin, nuk është se kemi të bëjmë me një raport personal ose një debat të karakterit të ngushtë partiak.

Ju thatë që mbaroi marrëveshja, ndërsa Berisha deklaroi sot se u ndërpre marrëveshja nga LSI-ja.

Nuk ka as prishje, as ndërprerje, por ka përfundim të një marrëveshje.

Për të shkaktuar qeveri teknike? Për të shkuar në zgjedhje me një qeveri teknike? Për të rrëzuar qeverinë?

Kjo është hera e parë që kemi një qëndrim të tillë nga ana e kryeministrit Berisha, që në fakt nuk është në koherencë me qëndrimet e mëparshme. Sepse edhe përpara se të mbyllej kjo marrëveshje, në një konferencë shtypi ku është pyetur për LSI-në, Berisha ka thënë se ajo është në interesin e tyre më të mirë se si do të vendosin, dhe unë i mirëkuptoj për këtë gjë. Dhe ky ka qenë një qëndrim shumë parimor dhe i arsyeshëm. Lidhur me momentin e përfundimit të kësaj marrëveshje, unë ja kam bërë të qarta z. Berisha të gjitha arsyet pse e konsideroj të përfunduar, sepse ne duhet të merrnim pozicion për zgjedhjet e ardhshme. Ashtu sikurse i kam bërë të qartë që ne nuk synonim që të votojmë kundër qeverisë së z. Berisha, për arsye sepse nuk shkonte që për një kohë kaq të shkurtër të ishim në qeveri dhe nuk ka qenë asnjëherë ky synimi i LSI-së, por e vërteta është se nuk ka qenë asnjëherë as synimi i z. Rama, dhe ai asnjëherë nuk ka kërkuar këtë gjë. Përkundrazi, qëllimi ynë ka qenë të përfundojmë një marrëveshje, të dalim në opozitë, dhe të vazhdojmë përpara me qëllim që të ecim më shpejt. Njëkohësisht, ne ishim të vendosur për të vazhduar bashkëpunimin në nivelin vendor siç ka qenë, dhe e kemi respektuar këtë marrëveshje deri në një ditë përpara se të hiqej në mënyrë të paligjshme dhe të dhunshme anëtari i KQZ-së që ishte propozuar nga Lëvizja Socialiste për Integrim. Pra nuk kemi pasur asnjë qëllim destruktiv, aq më tepër nuk kemi ideuar asnjë lloj komploti të cilin z. Berisha e shpartalloi.

A ishte parimore që ju të merrnit anëtarin në KQZ duke qenë pjesë e mazhorancës dhe pastaj të braktisnit mazhorancën në kohën që ishte formatuar KQZ?

Së pari nuk kemi kërkuar asnjëherë ne që të jemi anëtarë në KQZ. Ka qenë vetë z. Berisha i cili më ka thirrur dhe më ka thënë që anëtari në KQZ ju takon juve për tu propozuar. Ne duhet të kemi parasysh që anëtarët e KQZ-së vërtet propozohen nga partitë por propozohen me disa kushte të qarta në mënyrë që ata të garantojnë një funksionim të pavarur dhe me integritet. Pra nuk janë përfaqësues partish. Absolutisht që nëse z. Berisha do më kishte thënë mua në takimin e 1 prillit që kjo çëhstje prish balancën kjo mund të ishte zgjidhur në një mënyrë më njerëzore, pa qenë e nevojshme të krijohej kjo gjullurdi. Unë kam mendimin që edhe z. Berisha nuk e ka pasur këtë ide për këtë veprim që bëri por më pas natyrisht elementë jo shumë konstruktiv pranë tij e kanë nxitur për të treguar këtë forcë që “ne e ndryshojmë KQZ-në”, për të demonstruar një forcë të panevojshme e cila natyrisht ka sjellë pasoja tepër negative për besueshmërinë e KQZ-së.

Ka elementë destruktivë që e ndikojnë z. Berisha?

Mendoj se ai ka qenë i përmbajtur dhe i mirëkuptuar për të gjitha zhvillimet dhe absolutisht mendoj se trauma që krijoi me KQZ-në ishte e panevojshme. Unë nuk e kuptoj se çfarë do t’i bënte opozita këtij në rast se do të ishte raporti 4 me 3. Si mund t’i marrë zgjedhjet opozita në tavolinë.

Ata dyshonin se këtu ka një puç nga ana juaj me aleancën me PS-në?

Këtu ka një paragjykim. Aleanca me Partinë Socialiste është vendosur në ditët e fundit të marsit. Varianti ynë kryesor ka qenë për të krijuar një pol të tretë dhe për të vijuar qëndrimin në qeveri deri në zgjedhje. Por për arsye të ndryshme, edhe të mosgjetjes së gatishmërive të disa faktorëve për ta krijuar këtë pol, vendosëm që kjo ishte zgjidhja më e mira. Mendoj se ka qenë edhe zgjidhja më e drejtë dhe më e moralshme.

META: BERISHA TE VEPROJE SI NANO, ROTACION PAQESOR

Z. Berisha u mor gjatë sot me ju gjatë konferencës për shtyp. Ndoshta ka kuriozitet për të ditur marrëdhënien ruaj aktuale me Kryeministrin Berisha. E keni vlerësuar si politikan, a keni folur apo komunikuar me të pas largimit nga qeveria?

Jo, nuk ka pasur mundësi që të flas nga afër. Megjithatë unë jam i hapur në çdo kohë për të folur për çështje të rëndësishme që kanë të bëjnë me integrimit e vendit, aq më tepër për miratimin e tre ligjeve.

Z. Meta, pse zgjodhët 1 prillin për të ikur nga qeveria?
Nuk është se kam zgjedhur 1 prillin, ishte një rastësi. Ka qenë në çështje e rrethanave, sepse unë për 2-3 ditë nuk kam qenë në Tiranë edhe e kishim lënë për t’u takuar, rastisi të ishte datë 1 prill dhe asgjë tjetër.

Rastisi të ishte dita e gënjeshtrave, po për ftesën për debat ç’mund ta na thoni? Për çfarë e keni ftuar Kryeministrin Berisha?
Unë nuk e di se kur e kam ftuar. Në fakt e unë e kam ftuar të ulemi për të përcaktuar modalitetet për miratimin e tre ligjeve. Nuk kam ndonjë merak të madh për të bërë ndonjë debat me z. Berisha.

Po në rast se z. Berisha propozon një debat televiziv?
Për mua do të ishte një kënaqësi. Do të mërzitet pak vajza ime e vogël, por nuk ka asnjë probleme për mua.

Meqë ra fjala, Era e ka pranuar aleancën me z. Rama sepse kam përshtypjen që është shumë e afeksionuar me z. Berisha?
Jo, është pak e vështirë, por s’ka problem. Nuk kam folur këto kohë për këtë çështje por shumë e kënaqur nuk ka qenë.

Nuk është e moralshme, nuk ka më moral opozita pas bashkimi mes PS dhe LSI tha z. Berisha...

Tani morali është rotacioni dhe ndryshimi. Meqenëse sot vura re që kishte përmendur edhe z. Nano dhe kishte thënë fjalë të mira, mendoj se ka ardhur koha që të ndjekë shembullin pozitiv të z. Nano. Pra për t’i shërbyer një rotacioni demokratik, paqësor edhe një dorëzimi shembullor të pushtetit në mënyrë më demokratike dhe më civile.

Rotacion z. Meta e thënë nga ju se si tingëllon. Çfarë do të thotë tamam? Deri para dy muajsh ju ishit në pushtet, ishit në qeveri, çfarë do të thotë rotacion për ju?

Rotacioni është diçka shumë më e madhe dhe është domosdoshmëri gjithmonë për një ndryshim, për një këndvështrim të ri, për një qasje të re e kështu me radhë. Kohët e fundit ka edhe disa ngjarje interesante. Për shembull mbretëresha e Holandës, mund të rrinte sa të donte sepse monarkia ka rregullat e saj, por ajo e gjykoi në një moment të caktuar se duhet bërë një lloj rotacioni. Papa Benedikti mund të qëndronte sa të donte, por edhe ai dha një shembull pas tetë vjetësh. Pra është nevoja për të çliruar energji, për një këndvështrim të ri të problemeve dhe për t’u ulur me këmbë në tokë.

Ngjyra blu e xhaketës suaj, është për t’i bërë diversion PD-së apo është thjesht shije personale?

Jo, nuk ka lidhje. Unë jam pak tip konservator në veshje, më pëlqen diçka dhe ndihem mirë me të. Ngjyra blu nuk ka lidhje me uraganin blu, ka lidhje me pëlqimin tim. Këto janë ngjyrat e mia të preferuara: bluja, e kuqja dhe e bardha.

Po ngjyra lejla e PS-së së fundmi a ju pëlqen?
Nuk është diçka që nuk më pëlqen, por ndoshta nuk është shumë e përshtatshme për të ardhur në emisionin tuaj.

Sa u penalizua anëtarësia e LSI-së nga heqja e të punësuarve për shkak të prishjes së koalicionit me PD-në? A ka pakënaqësi të mbështetësve të LSI-së për faktin se u desh të largoheshin dhe të lini vendet e punës?

Besoj se kjo vjen për shkak të mosnjohjes së karakterit të anëtarëve dhe simpatizantëve të LSI-së, të cilët e kanë treguar këtë duke u bashkuar me LSI-në në momente të vështira. LSI u krijua si një forcë opozitare në vitin 2004 dhe ka qëndruar fortë në politikën shqiptare, pavarësisht nga zgjedhjet e padrejta dhe në 2005-në dhe në 2009-n. Absolutisht që për çdo njeri është problematike të humbasë vendin e punës, sepse ka familje, ka fëmijë për të rritur, për të arsimuar dhe jeta është bërë gjithnjë e më e vështirë. Unë besoj se ata e kuptojnë që përkatësia e tyre në LSI dhe angazhimi i tyre në LSI është shumë me i rëndësishëm se sa një interes i çastit që cenohet në mënyrë të padrejtë dhe shikojnë në një perspektivë shumë më të mirë dhe shumë më afatgjatë për vendin dhe për veten e tyre.

A do t’i riktheni në vendet e punës pas 23 qershorit nëse fitoni zgjedhjet?

Natyrisht, gjithçka që ka ndodhur në mënyrë të padrejtë do të vendoset në vendin e vet.

Marrëdhënia me Ramën si po ju shkon?

Ne kemi një raport me Partinë Socialiste. Natyrisht edhe me kryetarin e saj si përfaqësues i PS-së. Është një raport në funksion të një qëllimi të përbashkët, një raport korrekt.

Si u përtyp në bazë bashkimi juaj me Partinë Socialiste?

Shumë më shpejt seç mund të ishte menduar fillimisht. Natyrisht 2-3 ditët e para pati një hutim sepse ishte diçka e papritur. Përgjithësisht strukturat tona kishin filluar përgatitjet me kohë për të dalë më vetë në këto zgjedhje. Por mirëkuptimi ka qenë i jashtëzakonshëm dhe shumë i shpejtë.

A ka tani një bashkëpunim të sinqertë dhe real në bazë?

Unë mendoj se të gjithë ata që janë sot në opozitë kanë një konsensus dhe mirëkuptim të përgjithshëm. Për sa i takon raporteve të individëve këto janë shumë të parëndësishme aktualisht dhe mund t’i konsideroj tërësisht të tejkaluara. Tani fokusi është që të maksimalizojmë votat. PS votat e saja. LSI votat e saja. Kjo në funksion të qëllimit të përbashkët.

Jeni shprehur se ky bashkëpunim është parimor por nuk ju kemi parë ende në krah të z. Rama në fushatë. Do të dilni?

Ne kemi bërë disa aktivitete të përbashkëta sikurse është edhe ai i Shkodrës. Do të kemi edhe raste të tjera por këtu duhet të kemi parasysh që në këto zgjedhje votohet për partitë dhe jo për koalicionet, pavarësisht se vota e çdo force politike shkon për koalicionin.

Çfarë marrëveshjeje keni ju me Partinë Socialiste?

Marrëveshja që kemi ne me PS-në është ajo publike. Mendoj se parimet nuk të lejojnë asnjëherë që të gabosh. Për perspektivën gjithçka do të vendoset në bazë të votës, në bazë të rezultateve, në mënyrën më konstruktive.

E keni përcaktuar pozicionin tuaj se ku do të jeni pas 23 qershorit?

Pozicioni është kryetar i LSI-së dhe jam shumë kënaqur me këtë pozicion. Për sa i takon raporteve PS-LSI në të ardhmen këto do të përcaktohen nga vota e qytetarëve shqiptarë.

Nëse rezultati do të ishte i njëjtë me 2009 do ti bashkonit votat tuaja me Berishën?

Këtë herë ka një dallim sepse ne jemi pjesë e një koalicioni. Pra nuk jemi një koalicion më vetë. Duke hyrë në një koalicion me PS-në ne jemi të përcaktuar për të marrë çdo vendim në bashkëpunim edhe për të ardhmen. Nuk ekziston asnjë mundësi, teorike apo praktike, që të ketë një rezultat të tillë apo të përafërt. Diferenca do të jetë të paktën 200 mijë vota.

Cili është komenti juaj në lidhje me deklaratën e z. Berisha lidhur me ngjalat?

Mendoj që kjo është një retorikë që i shërben z. Berisha për të mobilizuar partinë, militantët, për të shtrënguar radhët. Është e drejtë e tij për të zgjedhur këtë mënyrë të shprehuri pro jam i bindur që thellë ai si doktor nuk kërkon që dikujt t’i ngeli hala në fyt sepse nuk është humane. Nga ana politike ky nuk është një shqetësim i madh për mua sepse hala nuk ka ngjala, hala ka peshku. Por është e rëndësishme që ne të bashkëpunojmë për të miratuar vërtet këto tre ligje sepse është e rëndësishme që vendi të marrë statusin kandidat brenda këtij viti. Përndryshe, sikurse e ka paralajmëruar edhe komisioneri Fule, pastaj çështja e statusit mund të kalojë në kalendat greke sepse të gjitha këto “halat”, “ngjalat” dhe me radhë shkojnë e vijnë. Por, vendi nuk duhet të humbasë më tej trenin e radhës për në Bruksel.

Sa i përket ngjarjes së 21 janarit, ju personalisht a ndjeheni përgjegjës për pjesën e 4 viktimave?

Mua më vjen shumë keq për këtë pyetje që është tërësisht absurde sepse unë kam dhënë dorëheqjen ditë papara se të ndodhte kjo ngjarje dhe së dyti kjo është një çështje e drejtësisë e cila duhet t’i shkojë deri në fund pa ndërhyrjen e politikës, as të qeverisë, as të opozitës dhe as dikujt tjetër.

Ka ndryshuar diçka në qëndrimin tuaj tashmë që jeni në opozitë për atë ngjarje?

Për mua asnjëherë nuk mund të ndryshojë asnjë qëndrim për çdo ngjarje të dhunshme ndaj institucioneve. Për tragjedinë lidhur me katër viktimat patjetër që drejtësia duhet të thotë fjalën e saj pa asnjë ndërhyrje, as të qeverisë, as të opozitës, dhe nga askush tjetër?

Z. Meta i qëndroni deklaratës se video Meta-Prifti ishte një montazh nga z. Rama në një shtet fqinj, madje kishit informacione nga shërbimet sekrete të vendeve mike se kishin interesa për destabilizimin e Shqipërisë ?

Kjo është një çështje që i takon së kaluarës dhe nuk përbën asnjë lloj kurioziteti për mua.

Jeni penduar për deklaratën që ngjarja e 21 janarit mund të hetohet edhe nga arkeologët e cila nuk është pritur edhe nga analistët?
Ky është një trillim i disa gazetave të lidhura me Bashkinë e Tiranës. Dua ta them këtë gjë për të qenë i sinqertë edhe me ju, sepse qëndrimi im ka qenë lidhur me të kaluarën. Nuk ka qenë lidhur me ngjarjen e 21 janarit. Këto janë historitë se çfarë ka thënë PS-ja për ju dhe çfarë keni thënë ju etj., etj. Qëndrimi ka qenë shumë i qartë. Me këtë le të merren analistët, le të merren historianët dhe arkeologët. Ndërsa për këtë çështje qëndrimi ka qenë dhe është ky: për 21 janarin drejtësia të thotë fjalën e saj. Të thotë fjalën e saj pa ndikimin e qeverisë, pa ndikimin e opozitës, pa ndikimin e asnjë aktori politik.

Meqë përmendët Bashkinë e Tiranës, si janë marrëdhëniet tuaja me z. Basha?

Jemi në mungesë komunikimi që nga 31 marsi. Kjo nuk do të thotë se nuk komunikojmë dhe nuk mirëkuptohemi.

Është e vërtetë që në 31 mars keni qëndruar gjatë me z. Basha për t’ju bindur që të mos largoheshit nga qeveria?

Kjo nuk ka lidhje me bindjen sepse kjo nuk është një gjë që varej nga z. Basha apo nga dikush tjetër. Kjo është një çështje që varej nga një tërësi faktorësh dhe rrethanash shumë të rëndësishme. Madje koha është një faktor shumë më i fuqishëm se të gjithë ne që merremi me politikë.

Votat e këshillit bashkiak që ka LSI i keni marrë kur ishit në koalicion me z. Berisha. A po bëni trafik votash tani që i bashkuat me Ramën?

Ne nuk kemi marrë vota se kemi qenë në koalicion me Partinë Demokratike. Kemi marrë votat e LSI-së dhe ato vota që kemi marrë në Tiranë në 8 maj si LSI do të duken shumë pak nga ato që do të marrim më 23 qershor.

Jeni takuar me z. Prifti pas historisë së videos dhe gjyqit ?

Unë nuk jam nga ata politikanë të cilët mbajnë qëndrime ekstreme dhe që nxisin urrejtje qoftë edhe për arsye të drejta pasi mendoj që politika është gjithmonë mundësia për të shikuar drejt së ardhmes. Unë kam pasur edhe një rast, më duket se e kam thënë edhe një herë tjetër, që jam takuar pasi një mik i përbashkët, ka kërkuar për t’u takuar dhe kaq. Kjo çështje ka dy-tre vite.

A keni një komunikim me z. Prifti? A ka një marrëdhënie të normalizuar mes jush?

Jo nuk kam asnjë komunikim dhe nuk kam arsye se përse të kem.

A keni ndërhyrë ju tek z. Rama që z. Prifti të mos jetë kandidat i Partisë Socialiste në Fier?

Absolutisht unë nuk ndërhyj tek Partia Socialiste për askënd dhe nuk është detyra ime. Ashtu sikurse nuk pranoj që Partia Socialiste të ndërhyjë për listat e Lëvizjes Socialiste për Integrim.

Në këtë klimë që është aktualisht në KQZ, vetëm me katër anëtarë, a ka garanci procesi zgjedhor i 23 qershorit?

Ka garanci për shkak të angazhimit të opozitës, për shkak të angazhimit ndërkombëtar. Nuk ka garanci për shkak të KQZ-së dhe të qëndrimit të z. Berisha për të rivendosur besimin dhe konsensusin për KQZ-në, pra për ti kthyer pavarësinë dhe kredibilitetin dhe integritetin këtij institucioni. Ndaj unë do ta ftoja që të reflektojë, ti shikojë këto çështje bashkë, edhe çështjen e rikompozimit të KQZ-së dhe të rikthimit të saj në normalitet, me besueshmëri të plotë. Dhe njëkohësisht edhe çështjen e tre ligjeve, për miratimin e tyre këto ditë që kanë mbetur deri në përfundimin e Parlamentit dhe hyrjen në fuqi të tyre në shtator. Nuk e kuptoj se pse nuk është dakord me këtë propozim sepse ai pretendon se do të fitojë bindshëm.

Edhe sot Kryeministri Berisha bëri thirrje që të dërgoni emrat e anëtarëve të rinj të KQZ-së.

Kjo nuk është një çështje plotësimi emrash. Dëgjova edhe një akuzë sikur këto tre ish anëtarë të KQZ-së kanë bërë diçka të imponuar. Unë nuk e besoj aspak këtë gjë. Dhe kjo nuk është çështje emrash, është çështje të integritetit të institucionit dhe do të ishte shumë e vështirë për të gjetur njerëz me integritet.

Në këto kushte kur KQZ-ja nuk ka integritet, nuk është legjitime, a është e ligjshme kërkesa juaj për të zëvendësuar anëtarin e PBDNJ-së në KZAZ, dalë nga kjo KQZ?

Kjo nuk ka lidhje me këtë çështje sepse ka një dallim thelbësor midis KQZ-së dhe KZAZ-së sepse anëtarët e KQZ-së kanë një mandat 6-vjeçar, ndërsa KZAZ-të, Komisionet e Qendrave të Votimit dhe Numërimit janë karakter i balancimit politik sepse janë në funksion të zgjedhjeve të radhës. Kështu që nuk ka lidhje midis këtyre dy çështjeve.

Si do të ankoheni për zgjedhjet në kushtet kur KQZ-ja është e paplotësuar?

Ne nuk kemi ndërmend ti ankohemi kujt për zgjedhjet. Ne do ti mbrojmë zgjedhjet deri në fund dhe do ti fitojmë ato pa asnjë diskutim. Fitoren e kemi më shumë se të sigurt. Nuk ka asnjë forcë që të ndikojë në ndryshimin e një diference tepër bindëse.

A ka të drejtë z. Berisha kur thotë se kjo që bëni ju, mosdërgimi i emrave të anëtarëve të rinj të KQZ-së, është një alibi për dështimin tuaj në zgjedhje?

Absolutisht kjo gjë nuk mund të ndodhë, përkundrazi. Ai donte ta mbante KQZ-në kështu. Opozita i ka marrë të gjitha masat për të mbrojtur votat dhe për të mbrojtur fitoren e saj. Kohë më parë u tha se do të bojkotohej, do të kërkonte shtyrjen e zgjedhjeve dhe këto nuk ndodhën. Dhe siç nuk ndodhën këto nuk do të ndodhin as këto të tjerat.

Po çfarë do të ndodhë nëse humbësi nuk pranon humbjen, cilido qoftë ai? Do të kemi një dejavu të 2009-ës dhe çfarë kostoje do të ketë kjo për Shqipërinë?

Unë jam i bindur se do të ketë një rrotacion paqësor dhe demokratik dhe jam i bindur që doktori do të ndjekë shembullin e Nanos në kuptimin e pranimit të rezultatit pavarësisht se do të bëjë të gjitha përpjekjet e tij deri në fund për të mobilizuar anëtarët, militantët, aleatët. Pasi do të luftojë deri në fund madje ndonjëherë mendoj se është i vetmi që lufton për fitoren e Partisë Demokratike në këto zgjedhje. Vetë demokratët e kanë kuptuar se ka ardhur koha për një rrotacion, për një ndryshim.


BRAHO NE LISTAT E PS-SE, ESHTE ME SOCIALIST SE VETE SOCIALISTET

Çfarë rezultati do të ketë Lëvizja Socialiste për Integrim në 23 qershor?

Nuk është kjo më e rëndësishmja. E rëndësishme është që roli i LSI-së do të jetë shumë i rëndësishëm në fitoren e opozitës dhe të Aleancës për Shqipërinë Evropiane. LSI do të jetë një garanci që vendi të vazhdojë të ketë stabilitet dhe ta forcojë stabilitetin por edhe të ketë një frymë më të gjerë bashkëpunimi dhe konsensusi për të ardhmen për të gjitha reformat që duhen përmbushur edhe në interes të Bashkimit Evropian edhe në interes të një zhvillimi ekonomik më të qëndrueshëm.

Në 2009-ën keni thënë se do të merrni 40 mandate ndërkohë që keni marrë vetëm 4.

Mendoj se ishin të mjaftueshëm edhe në ato kushte për të bërë një diferencë të rëndësishme por absolutisht që LSI është në një situatë shumë më të mirë sesa në zgjedhjet vendore të 8 Majit. Ajo që ju them me bindje është se rezultati i saj do të jetë një surprizë në të gjithë vendin, por sidomos në kryeqytet, në të gjithë Qarkun e Tiranës dhe kështu do të jetë.

Mbetemi pak tek listat. Emri i Spartak Brahos në listat e Partisë Socialiste u komentua gjerësisht edhe nga media, edhe nga opinioni publik. Përse ndodhi kjo gjë? Përse u bë kjo zgjedhje?

Është më shumë si individuale sesa si politike pasi dihet që z. Braho është më socialist se gjithë socialistët, kështu që nuk mendoj se ka ndonjë arsye për të bërë ndonjë koment të mëtejshëm.

A ka emra të tjerë të LSI-së në listat Partisë Socialiste?

Jo, nuk kemi prezantuar asnjë emër.

A keni ndikuar ju në moskandidimin e z. Agron Duka në qytetin e Durrësit për Partinë Socialiste?

Kjo është krejt e pavërtetë. Unë ju thashë që nuk ndërhyj, nuk kam ndërhyrë dhe nuk kam ndërmend të ndërhyj në çështje që kanë të bëjnë me vendimet e Partisë Socialiste, që mund të konsiderohen si çështje të saj të brendshme. Ashtu sikurse mund të them se argumenti i dhënë për këtë rast nuk më është dukur bindës. Ky është një vlerësim i imi personal.

Z. Rama ka thënë në këtë studio se fakti që ishin dy kunetër brenda një qarku përbën një problem.
Ky është një këndvështrim i tij dhe është vendimmarrja e tij dhe e partisë, gjë që nuk më duket shumë bindëse sepse çdokush prej tyre ka kontributet e veta dhe nuk shikoj një lidhje të drejtpërdrejt në këtë rast, nga këndvështrimi im.

Po dëm a mund të shkaktojë kandidimi i z. Duka në Durrës me Partinë Republikane koalicionit të majtë?
Pa dëm kjo punë nuk është por besojmë që të jetë sa më i kufizuar.

Moskandidimi i z. Malaj në listën e PS-së dhe dalja e tij si i pavarur, a është një tjetër dëm që mund të shkaktohet Partisë Socialiste dhe koalicionit të majtë?
Natyrisht që është një sfidë, është një vështirësi, një problem por shpresoj që të ketë edhe një reflektim, një dialog sepse mendoj se z. Malaj sidoqoftë është socialist, është me kontribute të hershme në Partinë Socialiste. Nuk mendoj se ka kohë për të ndërtuar ura.

Kjo do të thotë se po negocioni me z. Malaj?
Jo, nuk po negocioj dhe nuk është detyra ime të negocioj.

Keni sinjale që mund të tërhiqet nga kandidimi?
Nuk e thashë këtë gjë absolutisht dhe nuk dua të spekuloj apo të bëj diversione. Por, unë besoj se të gjithë, përfshirë edhe z. Malaj janë të bindur për domosdoshmërinë e rrotacionit dhe maksimizimin e energjive në këtë drejtim.

Një tjetër çështje që vihet re është rikthimi në krah të z. Malaj për ta mbështetur i z. Nano. Si e gjykoni ju këtë rikthim të tij?
Lidhur me mesazhin e z. Nano në këto zgjedhje, unë mendoj se mesazhi i tij kryesor ka qenë dhe mbetet ai i përkrahjes së rrotacionit, një mesazh i dhënë qartë në një emision televiziv. Dhe jam i bindur që z. Nano si një politikan me eksperiencë e kupton rëndësinë e rrotacionit për të gjithë vendin dhe është koha që z. Berisha të ndjekë shembullin e tij për një dorëzim paqësor, demokratik, civil të pushtetit.

A jeni ju në komunikim me z. Nano?
Nuk mund të them se jam në komunikim por nuk jemi edhe në moskomunikim. Në politikë ka edhe disa komunikime të cilat nuk ndodhin në mënyrë të drejtpërdrejtë.

A mund të shkaktojnë dëm tre deputetët e Partisë Socialiste që janë pjesë tashmë e listët e Partisë Demokratike, e kam fjalën për z. Islami, z. Dogjani dhe z. Kadeli?
Kjo është një zgjedhje e tyre. Unë mendoj se problemi është tek e djathta sepse anëtarët e PD-së duhet të japin të paktën 100 mijë vota për 10 deputetë që nuk do të jenë të tyret. Gjë që përbën një pasiguri dhe një kosto për të ardhmen e kësaj force politike. Nuk dua të gjykoj këtu sepse më duket sikur hy sërish në një çështje të brendshme të Partisë Socialiste apo qoftë edhe një çështje të brendshme të Partisë Demokratike.

Për të mbetur sërish te listat, nga përshtypja që ju është krijuar ju personalisht, jo vetëm për votat e LSI-së, por dhe për listat sidomos të partive të mëdha. Kush luajti më mirë me listat, z. Berisha apo z. Rama?
Nuk do të jenë listat përcaktuese në rezultatin e zgjedhjeve. Jo se nuk kanë rëndësi emrat, individët. Kanë rëndësinë e tyre. Por, duhet të theksoj përsëri diçka tjetër, që është më e rëndësishme në gjithë elementët, në gjithë faktorët të cilat do ndikojnë në rezultat, është faktori kohë. Është faktori më i fuqishëm, i cili është një faktor që kërkon një ndryshim dhe që do të ketë ndikim më të rëndësishëm në këtë fushatë. Natyrisht, mënyra sesi bëhet fushata, programi, listat, të gjitha kanë ndikimet e tyre por unë mendoj që ky është një faktor shumë i fuqishëm që në çdo rast ndikon për një diferencë të qartë.

Sa e realizueshme dhe si ju duket ideja e z. Rama që ministrat të lënë mandatin e deputetit a është një taktikë për të qetësuar të pakënaqurit dhe a është e realizueshme?

Ky është një parim i shëndetshëm demokratik, sepse praktikisht edhe ministra, dhe deputetë është diçka që nuk funksionon në mënyrë efikase. Së dyti, ka një parim të ndarjes së ekzekutivit nga legjislativi dhe në kushtet e këtij kodi që ne kemi, ku deputetët janë me shumë deputetë të zgjedhur për shkak të partisë, dhe nuk janë deputetë mazhoritar siç ka qenë përpara me zona, ky është një parim jo vetëm i shëndetshëm demokratik por dhe plotësisht i moralshëm.

Edhe LSI nuk duket se pati prurje të mëdha të reja, ndonjë rifreskim të figurave që po garojnë në 23 qershor?

Mendoj që kemi figura shumë të mira. Figura shumë të reja edhe që do të japin një ndikim tepër pozitiv në rritjen e rezultatit të LSI. Mjafton të them që 4 në shtatë të parët në Tiranë i takojnë Lëvizjes Rinore për Integrim, është një tregues i vullnetit tonë për të sjellë një frymë ndryshimi edhe brenda LSI-së.

Ku dallon oferta juaj zgjedhore nga ajo e Partisë Socialiste ?

Mendoj se në radhë të parë ajo që i bashkon ofertat tona është një mënyre e re qeverisjeje, qoftë edhe parimi i ndarjes së ekzekutivit nga Parlamenti është një element i ri dhe i shëndetshëm i zhvillimit të demokracisë dhe i rritjes së kontrollit të Parlamentit ndaj qeverisë. Së dyti, mendoj se një dallim thelbësor midis dy koalicioneve është se Partia Demokratike premton për qëndrim të mëtejshëm të të gjithë pushteteve në vend. Natyrisht që kjo do të ketë efektet e saj edhe në të gjithë zhvillimin ekonomik dhe social të vendit. Pra, do të sjellë një ngushtim të frymëmarrjes ekonomike dhe me pasoja sociale ndërsa opozita premton një alternativë shumë bashkëpunuese midis institucioneve dhe një qeverisjeje më përfshirëse. Në këtë drejtim unë mendoj se mundësitë dhe perspektiva për çdo qytetar në këtë vend për të ecur më shpejt është shumë e madhe sesa në rastin e vazhdimit të së njëjtës status-quo apo të vazhdimit të një stanjacioni politik apo ekonomik dhe shoqëror. Ajo që dallon LSI-në më shumë se çdo forcë tjetër politike është përqendrimi kryesor tek punësimi dhe vështrimi i të gjithë elementëve të tjerë dhe i politikës së taksave dhe i çdo politike tjetër ekonomike apo edhe sociale në funksion të punësimit. Ne nuk jemi bërë pjesë e debateve të tilla “taksë e sheshtë” “taksë progresive” apo elementë të tjerë. Jo se nuk kemi dashur të hyjmë në këtë debat por sepse çdo politikë ekonomike, çdo politikë fiskale në Shqipëri sidomos sot në këtë situatë të një trysnie të madhe të krizës financiare –ekonomike, rajonale, evropiane etj. Kjo duhet parë në funksion të punësimit. Për këtë arsye edhe në programin tonë ne kemi një plan të punësimit të cilin do ta laburojmë edhe më konkretisht në ditët e ardhshme ku çdo gjë, edhe arsimi është në funksion të punësimit, por edhe politika e taksave në funksion të punësimit, por edhe të gjitha politikat ekonomike apo edhe sociale janë në këtë funksion në mënyrë që ne të arrijmë jo vetëm të mbrojmë vendet aktuale të punës por edhe të shtojmë vende të reja sidomos në ata sektorë ku me pak investim mund të arrihet një rritje e intensitetit të nivelit të punësimit. Këtu kam parasysh biznesin fason, biznesin e call-center dhe biznesin e shërbimeve në përgjithësi. Por, edhe diçka që i ka munguar Shqipërisë dhe ka qenë një mungesë e madhe që ka të bëjë me krijimin e zonave të lira apo të parqeve industriale sepse në këtë kohë, si kriza italiane apo kriza të tjera në vende të zhvilluara të Evropës ku kemi një rritje të taksave në mënyrë të ndjeshme dhe në këtë kohë kur kemi edhe një largim të investitorëve për shkak të krizës në vendet arabe, sidomos në Tunizi dhe vende të tjera të investitorëve perëndimorë të cilët duan të transferojnë fabrikat e tyre, bizneset e tyre. Shqipëria është një vend ideal, duke ruajtur këtë tatim-fitimi dhe disa avantazhe të tjera. Për të t’i tërhequr ata kërkojnë lehtësi dhe nuk kërkojnë një vend ku dalin 10 pronarë dhe të hyjnë në debate me ta, e kështu me radhë. Këto do t’i marrë përsipër qeveria, do t’i marrë përsipër shteti dhe ne jemi shumë të qartë në gjithë platformën tonë realizimi i së cilës mund të sjellë një rritje të jashtëzakonshme të punësimit.

Çfarë do të bëni për ta përmirësuar dhe ndryshuar klimën e biznesit në Shqipëri për të thithur investimet e huaja?

Pa asnjë diskutim ka shumë gjëra që duhen përmirësuar dhe mbi të gjitha mendoj që edhe zbatimi i ligjit për gjykatën Administrative do të ishte një kontribut i rëndësishëm për të rritur besimin tek biznesi, tek investitorët dhe të kontradiktave që ata mund të kenë me shtetin, me administratën publike shtetërore. Ajo që është më e rëndësishmja është luftimi i burokracisë. Prandaj kur flasim për një park industrial, kur flasim për një zonë të lirë ekonomike kjo kërkon vendime të forta të shpejta. Në 8 vite në Shqipëri është folur shumë për zhvillimin e turizmit por është e vështirë të gjesh sot në Shqipëri një fshat apo një resort turistik, i cili ka ka filluar dhe ka përfunduar gjatë këtyre dy mandateve të kryeministrit Berisha. Pra, tregon që nuk ka disa prioritete të qarta dhe ka munguar një vendimmarrje efikase e cila i hap rrugë dhe u çel perspektiva këtyre investimeve të rëndësishme.

Cili do të jetë qëndrimi i LSI-së për taksën progresive?

Qëndrimi i LSI-së është ky dhe është shumë i qartë. Ne si bosht kryesor të të gjithë programit tonë kemi punësimin. Në këtë drejtim absolutisht që politikat e taksës duhet të jenë në funksion të punësimit. Në mënyrë të qartë ne jemi shprehur se Shqipëria nuk duhet të rrisë tatimin e fitimit mbi nivelin 10%. Kështu do të humbiste një avantazh në raport me vendet e tjera të rajonit. Të gjitha vendet e rajonit e kanë 10% ose më pak. Një investitor i9 rëndësishëm strategjik ndikohet nga të gjithë këto elementë për të investuar në një vend. Për sa i përket çështjes tjetër e cila ka të bëjë me taksën të ardhurat mendoj se është një çështje që duhet parë. Deri në një nivel të caktuar, që për mendimin tim duhet të jetë deri në 35 mijë lekë, tatimi duhet të jetë zero. Nga 35 mijë deri në 50 mijë tatimi duhet të jetë 10% por mbi diferencën dhe jo për të gjithë vlerën. Për sa i takon pagave të tjera mund të përshkallëzohet deri në një nivel të caktuar. Këto janë çështje që do diskutohen. Qëndrimi ynë si LSI është që tatimi mbi fitimin nuk duhet rritur sepse ne duhet tog japim një pozitiv për investitorët e huaj. Investitorët na duhen që të hapen vende të reja pune. Penalizmi më i madh i qytetarëve është që t’i lesh pa punë. Gjithë instrumentet ekonomikë dhe fiskalë të jenë në funksion të rritjes së punësimit.

Dy sloganet e PS-së dhe LSI-së sikur nuk shkojnë shumë me njëri-tjetrin apo jo?

Natyrisht që ne jemi në një koalicion dhe jo në një parti. Kanë dallimet e tyre sepse kanë këndvështrime të ndryshme. Unë mendoj se slogani ynë është tepër i gjetur për vetë pozicionin që LSI ka pasur dhe vazhdon të ketë. Ky slogan është anonçuar përpara se të bënim koalicionin me PS-në dhe nuk kemi ndërmend ta ndërrojmë sepse ne nuk mohojmë çdo gjë që është bërë por absolutisht që Shqipëria nuk mund të ecë me këtë ritëm. Shqipëria nuk mund të kënaqët me këtë stanjacion dhe me problemet që vijnë duke u rritur dhe nuk vijnë duke u pakësuar. Këtu kam parasysh problemet ekonomike dhe sociale.

Ju keni deklaruar se shiritat e inaugurimit janë më të gjatë se vetë rrugët. A mund të sulmohet kjo qeveri për rrugët?

Kur kam udhëtuar për të vajtur në Gjirokastër, nga Memaliaj në Tepelenë, ka qenë një situatë shumë dramatike. Një gjendje shumë e mjeruar e rrugës dhe e infrastrukturës dhe sigurisht që kjo nuk është e vetmja. Unë nuk jam nga ata që mohon një punë. Çdo punë e mirë është një arritje për Shqipërinë, pavarësisht se e ka bërë Berisha, e ka bërë Rama, e ka bërë Nano e kështu me radhë. Rëndësi ka të gjithë të bëjnë punë sa më të mira. Madje në qoftë se ju e mbani mend unë kam qenë në tunelin e Kalimashit, para zgjedhjeve në 2009 në shkurt dhe kam thëne edhe që për inat të Berishës nuk mund t’i biem Kosovës nga Maqedonia. Pra, shyqyr që po bëhet ky investim madhorë. Por duhet të jemi me këmbë në tokë, aktualisht gjendja e infrastrukturës lë shumë për të dëshiruar. Pra ka një falsitet. Duke u mbështetur në vepra kryesisht, të cilat ishin të mandatit të kaluar, 2005-2009, ku është bërë gati 70-80 % e investimeve të infrastrukturës së përmirësuar. Nga 2005 e këtej ka një falsitet për të paraqitur një progres të jashtëzakonshëm, ndërkohë që praktikisht për këtë Partia Demokratike u votua në vitin 2009, dhe nuk mori pak, mori 70 mandate. Tani jemi në një situatë tjetër, ku nuk mund të themi që nuk është bërë kjo rrugë apo që nuk mund të bëhet tuneli i Elbasanit e kështu me radhë. Unë para tre ditëve dola në media tek rruga Kombëtare Berat-Çorovodë, e cila ka ngelur prej katër vitesh për katër kilometra. Pavarësisht nga ndërhyrjet e mia, pavarësisht nga ndërhyrjet e deputetit të qarkut të Beratit z. Naço, pavarësisht se janë vënë fonde çdo ditë dhe asnjëherë fondet nuk janë vënë në atë rrugë, por as kjo nuk është e vetmja gjë. Shikoni rrugën për të hyrë në Berat do të çuditeni. Ne në dhjetor vumë edhe veton si grup parlamentar i LSI-së. Meqë Kryeministri po shkon shpesh unë do t’i lutesha të kuptonte që asnjë lek nga ato 5 milionë euro që u vunë në buxhet me insistimin tonë në dhjetor nuk është hedhur për të rikonstruktuar rrugën Lushnje-Berat. Para dy ditësh pashë se si në këtë rrugë nacionale në hyrje t qytetit të Beratit gropat ishin mbushur jo me asfalt, por me dhe të kuq. As në një rrugë komune të largët kjo gjë nuk ndodh. Pale të shikosh rrugën tjetër Berat-Fier. Është një rrugë që shkon për në Roskovec, dhe jo vetëm kaq. Po të shikosh edhe gjendjen e rrugës së Kosovës, një investim madhor i padiskutueshëm, por më shumë probleme në mirëmbajtjen e saj, lë shumë për të dëshiruar. Pra është tepruar dhe po teprohet. Nuk po themi që nuk është bërë, nuk po themi që nuk ka bërë FSHZH-ja e kështu me radhë, por është diçka e tejkaluar. PD-ja u votua një herë për rrugët, u votua një herë për zhvillimet pozitive që bëri në infrastrukturë. Tani nuk besoj se e kam tepruar aq shumë kur kam thënë se më të gjatë janë shiritat se sa rrugët e shtruara. Të mos harrojmë, se dhe për rrugët e shtruara në vitet 2008, 2009, por edhe për vepra të tjera publike si ujësjellësit, ka akoma kompani që akoma nuk kanë marrë paratë nga qeveria. Ndërkohë që kompanitë në mirëbesim kanë marrë kredi nga bankat dhe vazhdojnë të paguajnë këstet dhe është rritur niveli i kredive të këqija. Pra është e teprua e gjithë kjo paraqitje euforike e këtij bumi të paparë sepse jemi të gjithë dëshmitarë që në këto 2-3 vitet e fundit buxheti i shtetit është rishikuar. Por është rishikuar në drejtim negativ. Janë reduktuar investimet në vend që ato të rriteshin, siç ka ndodhur nga vit 2005 deri në vitin 2009.

Ka një perceptim negativ që Shqipëria mund të përballet me skenarin Papandreu për shkak të gjendjes së keqe të financave të shtetit. A mendoni se është kështu?

Unë nuk e besoj dhe jam i bindur që të gjithë ne së bashku nuk do ta lejojmë një situatë të tillë. Vendi ka vështirësi, pas asnjë diskutim, euforia e qeverisë nuk ndihmon për t’i përballur problemet me përgjegjshmëri dhe me transparencë në raport dhe me qytetarët. Sepse në rast se do të krijojmë pritshmëritë që gjendja është shumë e mirë dhe nesër detyrohesh të marrësh vendime të forta, atëherë natyrisht që do të ketë edhe reagime të forta sociale. Mendoj që situata është plotësisht e menaxhueshme dhe e kontrollueshme, natyrisht që do të kërkojë edhe bashkëpunim dhe konsultim me partnerët tanë ndërkombëtarë në këtë fushë. Me FMN, BB, me BERZH-in dhe me shumë institucione të tjera, por unë mendoj që situata do të jetë nën kontroll, pavarësisht se do të kërkojë reforma të cilat do të kenë kostot e tyre.

Cila do të jetë marrëdhënie juaj me gjyqësorin në të ardhmen? A do të ketë jë pan reformash apo vetëm ndryshim të titullarëve?

Besoj se angazhimi ynë do të jetë për të konsoliduar pavarësinë e drejtësisë dhe mendoj se rotacioni do t’i shërbejë këtij qëllimi. Le të marrim parasysh thelbin e propozimit tonë, që tre ligjet të votohen tani dhe të hyjnë në fuqi në muajin shtator. Një ligj shumë i rëndësishëm në ligjin për Gjykatën e Lartë, i cili parashikon shtimin e disa vendeve në këtë gjykatë për krijuar kolegjin administrativ në funksion të ligjit për e Gjykatën Administrative, duke qenë se praktikisht ne kemi një mazhorancë që ka një marrëdhënie të ngushtë me presidentin dhe kjo është normale deri diku edhe njerëzore, sepse presidenti ndjen një detyrim të madh ndaj partisë që e ka propozuar në këtë post, por në rast se ne sot do të miratonim këtë ligj dhe do të hynte në fuqi, atëherë brenda natës do të mbusheshin këto vende me individë të cilët që si kriter kryesor do të kishin besueshmërinë ndaj lidershipit të PD-së. Por meqenëse gjërat do të jenë më ndryshe, dhe shpresojmë që ligji të miratohet tani, në shtator ky është proces që do të ndodhë përmes një bashkëpunimi midis parlamentit të ri dhe presidentit Nishani, gjë që do të ndikojë për të krijuar një balancë e cila dot jetë në funksion të pavarësisë gjyqësore.

Pra, në një farë mënyre ju e justifikoni z. Rama që nuk ka miratuar tre ligjet deri më sot?

Kjo çështje nuk është për të justifikuar z. Rama, por absolutisht që disa raste të fundit të emërimeve në poste të rëndësishme në gjykatat më të larta të vendit të bëra ndoshta edhe me panikun e asaj që po shkojmë drejt humbjes së pushtetit, nuk kanë lënë shijen më të mirë të mundshme dhe sigurisht që krijojnë një bazë objektive për të pasur një pretendim të tillë dhe për të kërkuar një kompromis të tillë, që është në interes të vendit.

Z. Meta, pse duhet t’iu votojnë ju si LSI shqiptarë më 23 qershor?

Sepse ne gjithmonë i shërbejmë të ardhmes së vendit dhe interesit më të përgjithshëm publik dhe këtë do të vazhdojmë në të ardhmen.

Si e shikoni fushatën e prisni të jetë agresive me gjuhën politike që përshkallëzohet ditë-ditës?

E shoh me uljet e ngritjet e saj. Ne jemi një vend anëtar i NATO-s. Pavarësisht nga vështirësitë dhe pengesat që t cilët vijnë edhe për shkak të natyrave të politikanëve më shumë, do të ecim para drejt Evropë dhe do të jemi më shpejt.


Redaksia online
(ar.sh/sg/shqiptarja.com)

TAG:
• kqz