TIRANË- Presidenti Ilir Meta i ka dhënë dekoratën e Flamurit Kombëtar Avni Rustemit. Në arsyetimin e dhënë nga kreu i shtetit, thuhet se vlerëson Rustemin pasi asgjësoi "armikun kryesor të brendshëm, që mbante peng procesin e rivendosjes se Pavarësisë e të sovranitetit të shtetit shqiptar ".

Kjo dekoratë duket se nuk është aspak e rastësishme, duket se është një mesazh shumë i qartë për zhvillimet aktuale në vend. Meta jo pak herë ka sulmuar kryeministrin Edi Rama se po mban vend demokracinë në vend, duke e shndërruar atë në një diktaturë. Më herët, në një deklaratë për mediat që ka pasur, Meta është shprehur se nuk është "politikan i racës së Nikola Gruevskit, por i racës së Avni Rustemit"

"Me rastin e 125-vjetorit të lindjes, në vlerësim dhe mirënjohje të thellë për aktin e Tij të lartë patriotik, që kreu 100 vjet më parë, duke asgjësuar armikun kryesor të brendshëm, që mbante peng procesin e rivendosjes se Pavarësisë e të sovranitetit të shtetit shqiptar të shpallur nga Ismail Qemali, kam sot nderin dhe privilegjin të vlerësoj Heroin e Popullit, Avni Rustemi, me Dekoratën e Flamurit Kombëtar, më të lartën e Republikës.

Akti i tij burrëror dhe mbrojtja dinjitoze e çështjes shqiptare në gjyqin historik të Parisit, patën një jehonë të gjerë ndërkombëtare dhe u bënë burim frymëzimi për qëndresën mbarë shqiptare kundër pushtuesve të huaj dhe bashkëpunëtorëve të tyre, gjë që u manifestua në Luftën Kombëtare të Vlorës", shkruan Meta.