Politikë

Meta jep propozimin e tij për zgjidhjen e krizës: Më 13 tetor zgjedhje vendore, të përgjithshme dhe për Presidentin (VIDEO)

Redaksia 2 Korrik 2019, 11:12 | Përditesimi: 2 Korrik 2019, 17:41

Presidenti Ilir Meta tha se 13 tetori nuk do të jetë datë vetëm për zgjedhjet vendore. 13 tetori do të jetë datë për zgjedhjet e përgjithshme parlamentare, por edhe për të bërë zgjedhjet për presidentin. Ai tha se ky është propozimi i tij për zgjidhjen e krizës politike që vijon edhe pas mbajtjes së zgjedhjeve vendore më 30 qershor.

Ai tha se do të kandidojë sërish për postin e presidentit në këto zgjedhje të 13 tetorit që ai propozon, dhe thotë se kryeministri Edi Rama mund të vë cilin kandidat të dëshirojë. "Kjo është rruga që e zgjidh këtë krizë", tha Meta në një konferencë për mediat.

"Më 13 tetor edhe zgjedhje të përgjithshme, edhe zgjedhje për Presidentin. Dhe unë do të kandidoj për president me këto kompetenca që janë, nuk kam asnjë shqetësim. Dhe Edi Rama dhe Kuvendi socialist që s’më duan mua, të vënë kandidat kë të dëshirojnë! Kjo është rruga që e zgjidh këtë krizë të tmerrshme të përfaqësimit të qytetarëve shqiptarë. Kjo është zgjidhja që unë jap dhe nuk është turp për mua si President i Republikës nëse populli shqiptar nuk më voton, që të shikoj punën time.

LEXO EDHE:
Meta jep porositë e fundit para Konventës: Të gjithë si Tedi Blushi! Ashtu bëhet opozitë

As për Edin, as për të gjithë të tjerët, sepse në fund fare edhe Churcilli fitoi luftën, por populli anglez nuk e votoi. Pastaj pasi të bëj pak pushim, e votoi sërish. Kështu është demokracia prandaj njerëzit shprehen, prandaj njerëzit duhet të kenë besim në votën e tyre. Dhe kjo është rruga e zgjidhjes së secilit vend. Ky ishte propozimi im. Në qoftë se ka ndonjë propozim zoti Rama, ta bëjë, kur të dojë! Në qoftë se ka ndonjë propozim ndonjë ambasadë që flet për dialog, por që nxit sherr në Shqipëri, le ta bëjë, ta dëgjojmë! Unë nuk pranoj asnjë propozim që dhunon parimet e shtetit të së drejtës në Shqipëri! E ftoj zotin Rama të tregohet serioz dhe i përgjegjshëm!", tha Meta.

Lajmi kryesor: