Meta paralajmëron referendum për ndryshimin e Kushtetutës?! "Në momentin e duhur do t'i drejtohem popullit" (VIDEO)

TIRANË - Presidenti Ilir Meta lë të kuptuar se shumë shpejt mund të kërkojë referendum popullor për ndryshimin e Kushtetutës. Duke e quajtur Kushtetutën mbi çdo institucion tjetër në Shqipëri, kreu i shtetit tha se nuk mund të lejojë asnjë përpjekje për të kapur sistemin e drejtësisë. Meta mori shembull betimin e tij me dorën mbi kushtetutë para parlamentit kur u zgjodh president, për të thënë se betimi në Kushtetutë nuk mund të konsiderohet thjesht ceremonial dhe formal. Po ashtu, Meta kujtoi 22 nëntorin, ditën kur u votua me referendum kushtetuta, duke paralajmëruar se "në momentin e duhur presidenti do t'i drejtohet popullit dhe gjithë botës siç tha ai, për të mbrojtur demokracinë".

Deklarata e presidentit Ilir Meta në përgjigje të interesit të gazetarëve pasi mori pjesë në Forumin rajonal për barazinë gjinore

Pyetje: Mirëmëngjes zoti President! Sot në Gjykatën Kushtetuese është paraqitur, si anëtarja që ka marrë dekretin tuaj, ashtu edhe ajo qëështë betuar përpara noterit. A keni një koment se si do të zgjidhet kjo krizë?

Presidenti Meta: Është tërësisht e zgjidhur. Për të gjithë ata që dinë të lexojnë Kushtetutën dhe meqenëse po afron 22 nëntori, dita kur populli shqiptar votoi me referendum Kushtetutën, dhe këto parime të Kushtetutës që janë edhe sot të sanksionuara, pavarësisht nga deformimet e pandershme që janë bërë me pabesindaj popullit shqiptar gjatë këtyre 21 viteve, kam një paralajmërim të fundit për të gjithë ata, të cilët mendojnë se betimi i Ilir Metës me dorën mbi Kushtetutë si President i Republikës së Shqipërisë, ka qenë një proces formal apo ceremonial:

Kushtetuta e Republikës së Shqipërisë, ka vetëm një garant të padiskutueshëm dhe të pacenueshëm në integritetin e vet, qëështë Gjykata Kushtetuese e Republikës së Shqipërisë! Përpjekjet për të dhunuar Kushtetutën, për të kapur përfundimisht të gjithë sistemin e drejtësisë në Republikën e Shqipërisë me kapjen e Gjykatës Kushtetuese, janë të dështuara, janë të vdekura!

Askush të mos guxojë të përdhosë Gjykatën Kushtetuese të Republikës së Shqipërisë! Është institucioni më i rëndësishëm i këtij vendi. Parlamenti me një dekret shpërndahet! Qeveria me një mocion mosbesimi rrëzohet! Presidenti, me një “impeachment” nga një parlament, jo nga ky, përsëri shkarkohet nga Gjykata Kushtetuese e Republikës së Shqipërisë.

E nëse dikush mendon se angazhimet e mia kanë qenë ceremoniale, do t’i bëj të qartë se në fund fare kjo është Kushtetutë që mbron popullin e Shqipërisë, dhe do të jetë detyrë e Presidentit të Shqipërisë dhe e popullit të Shqipërisë që t’i tregojnë vendin kësaj bande uzurpatore dhe të gjithë shërbëtorëve e skllevërve të tyre, kudo ku janë.

Pyetje:Zoti President, a do të arrihet (a keni kompetencë) deri aty për të shpërndarë Parlamentin apo jo?

Presidenti Meta: Besoj se jam shumë i qartë. Secili të shikojë detyrën e vet, të zbatojë kompetencat e veta! Veprimet nga Presidenti do të vazhdojnë të jenë institucionale. Dhe në momentin e duhur Presidenti do t’i drejtohet popullit dhegjithë botës për të mbrojtur demokracinë për interesin e popullit shqiptar, që është dhunuar në mënyrën më barbare, sidomos në këto dy vite kur u la qëllimisht edhe pa Gjykatë Kushtetuese.

Ju faleminderit dhe i uroj edhe një herë punë të mbarë gjithë anëtarëve më të rinj të Gjykatës Kushtetuese!

Krijimi i Gjykatës Kushtetuese është futur në ngërç. Presidenti Ilir Meta dekretoi jashtë afatit të përcaktuar me ligj (30 ditë), Marsida Xhaferllarin si anëtare në Gjykatën Kushtetuese, teksa në të njëjtin vend ishte zgjedhur më herët Arta Vorpsi. Kuvendi i Shqipërisë ka ndërmarrë një rezolutë kundër këtij dekreti për ta konsideruar "nul".

Një ditë më parë në një intervistë televizive Meta i dha shuplakë të fortë edhe opozitës, tashmë joparlamentare, kur tha se "PD dhe LSI janë më shumë pranë qeverisë se sa Presidentit. Me ato akte e veprime që kanë bërë deri tani, siç është dhe djegia e mandateve, e dëshmon këtë. PD dhe LSI i kanë lënë rrugë të hapur kapjes së institucioneve nga Rama. PD dhe LSI e kanë lënë Presidentin e ekspozuar ndaj një bande. Por unë do flas dhe me popullin dhe ta dijnë mirë se unë nuk jam i vetëm. Unë kam popullin dhe do flas me ta. Një deklaratë bëra në Pogradec dhe doli në 1 mijë media ndërkombëtare, ndaj e them që e dinë mirë ata kur flet Ilir Meta dhe i drejtohet popullit".

G.M.//Shqiptarja.com

TAG:
• gjykata kushtetuese
• Ilir Meta
• Kushtetuta
• referendum