Meta mund të shpërndajë Parlamentin? Socialistët: Nuk ka shans

Pas deklaratës së Presidentit Meta, se mund të shpërndante Parlamentin, kanë reaguar edhe aktorët politik të mazhorancës. Sipas deputetit Ulsi Manja Presidenti nuk ka asnjë shans që ta bëjë një gjë të tillë.

“Kushtetuta flet qartë çfarë kompetencash ka Presidenti, çfarë ka Kuvendi, ju lutem mos u merrni me absurditete të tilla. Është populli ai që vendos për sovranin. Nuk ka asnjë shans”, tha Ulsi Manja.

Ndërsa ministri për Diasporën, Pandeli Majko uroi që mosmarrëveshjet të mos pështjellohen.

“Ka disa nene të Kushtetutës që duhen vlerësuar. Nuk besoj që sherri politik në Shqipëri duhet të precipitojë në këto histori. Shqipëria ka të nevojshme në këtë situatë stabilitetin politik dhe vendosjen e dialogut mes palëve”, u shpreh ai.

Reagimet e mazhorancës erdhën pas mbylljes të seancës së posaçme ku u miratua një rezolutë që e konsideron antikushtetues veprimin e Metës për të dekretuar Marsida Xhaferllarin si anëtare të Gjykatës Kushtetuese. Mazhorancë në vend të Marsida Xhaferllarit, njeh Arta Vorpsi që në renditjen e Këshillit të Emërimeve në Drejtësi është vlerësuar si e para me pikë për t’u zgjedhur në Gjykatën Kushtetuese.

Ndërkohë pak më parë Meta deklaroi se:  Askush të mos guxojë të përdhosë Gjykatën Kushtetuese, është institucioni më i rëndësishëm i këtij vendi. Parlamenti me një dekret të shpërndahet, qeveria me një mocion mosbesimi rrëzohet, Presidenti përsëri shkarkohet nga Gjykata Kushtetuese e Shqipërisë. 

TAG:
• gjykata kushtetuese
• Ilir Meta
• kuvendi
• ULSI MANJA
• marsida xhaferrllari
• Arta Vorpsi