Shqipëria është në një rrugë të qartë drejt Bashkimi Europian dhe e fokusuar tek reformat dhe sundimi i ligjit.

Ky ishte mesazhi që Ministri i Jashtëm Ferit Hoxha përcolli sot në një takim në Bruksel me Komisioneren për Zgjerimin në Komisioni Europian, Marta Kos, ku në fokus ishte ecuria e negociatave të Shqipërisë me Bashkimi Europian.

Përmes një postimi online, Hoxha e cilësoi takimin si një shkëmbim të vlefshëm dhe të drejtpërdrejtë, duke nënvizuar se procesi i negociatave për Shqipërinë po ecën në mënyrë dinamike dhe të avancuar.

Në mesazhin e tij, kryediplomati shqiptar e bëri të qartë se rruga e Shqipërisë drejt BE-së është e vendosur dhe mbështetet te angazhimet e forta, reformat e vazhdueshme dhe rezultatet konkrete.

Një tjetër pikë e diskutuar ishte edhe zbatimi i Agjendës së Reformave në kuadër të Planit të Rritjes së BE-së, që sipas Hoxhës shkon paralelisht me procesin e integrimit dhe sjell përfitime të prekshme për qytetarët.

Nga ana e saj, Komisionerja Marta Kos vlerësoi progresin e arritur nga Shqipëria dhe theksoi rëndësinë e vazhdimit të reformave, duke rikonfirmuar se procesi i zgjerimit mbetet një proces i bazuar në meritë.

Postimi i plotë i Ministrit Hoxha pas takimit me Komisioneren Kos 

“Si gjithmonë, është kënaqësi e veçantë të kem një shkëmbim të thelluar dhe me përmbajtje me Komisioneren për Zgjerimin, Marta Kos. Duke u mbështetur në një proces negociatash të avancuar dhe dinamik për Shqipërinë, theksuam rëndësinë e ruajtjes së ritmit dhe ecjes përpara me qëndrueshmëri dhe fokus. Është thënë shumë herë, por mbetet thelbësore: një proces zgjerimi i besueshëm dhe i bazuar në merita varet nga vendime në kohë, që ruajnë besimin dhe e mbajnë procesin të parashikueshëm, të orientuar drejt së ardhmes dhe efektiv.

Zgjedhja e Shqipërisë është e qartë: rruga drejt BE-së bazohet në angazhime të forta, reforma të vazhdueshme dhe rezultate konkrete. Diskutuam gjithashtu zbatimin e Agjendës së Reformave në kuadër të Planit të Rritjes, i cili në rastin e Shqipërisë plotëson procesin e anëtarësimit në BE dhe sjell përfitime të prekshme për qytetarët. Përafrimi i vazhdueshëm me standardet e BE-së, forcimi i shtetit të së drejtës dhe i një sistemi drejtësie të pavarur dhe profesional, si dhe progresi i qëndrueshëm në të gjitha kapitujt e negociatave mbeten prioritetet tona të përditshme. Theksuam gjithashtu rolin kyç të një komunikimi të qartë dhe të qëndrueshëm, si për përfitimet ashtu edhe për përgjegjësitë e procesit të zgjerimit — thelbësor për forcimin e mbështetjes publike dhe për rritjen e transparencës dhe përfshirjes.”