Ka nisur puna për ndryshimet në sektorin e shëndetësisë. Report Tv mëson se Urdhri i infermierëve ka filluar takimet me stafin e ministrisë së Shëndetësisë për të shpalosur ndryshimet që do të ndërmerren. Ndërkohë që ditën e mërkurë do të ketë një mbledhje përfundimtare mes tyre në sallën e Kishës Ortodokse.
Misioni i Urdhrit të Infermierit është ruajtja e standardeve shëndetësore. Në fokusin e takimeve janë krijimi i portalit të infermierëve për Shqipërinë, si dhe stimulimi i infermierëve rezidentë në zonat rurale. Edhe kryeministri Edi Rama paralajmëroi gjatë mbledhjes së fundit të Asamblesë së Përgjithshme të Partisë Socialiste se shumë shpejt të gjithë infermierët do t’i nënshtrohen një testimi, për të provuar njohuritë e tyre profesionale.
Kreu i qeverisë u shpreh i prerë se nuk do të ketë më infermier që i emërojnë partitë politike, por në bazë të pikëve do të përzgjidhen. 16 mijë infermierët e licensuar në të gjithë Shqipërinë pritet të kenë një portal për t’iu drejtuar për të gjetur vend pune, njësoj siç është edhe portali “Mësues për Shqipërinë”.
Redaksia Online
A.Gj/Shqiptarja.com