FIFA autorizon Kosovën të luajë miqësore jashtë dhe brenda vendit por me kufizime: pa u kënduar himni dhe pa simbolet kombëtare.

Vendimi u mor tre ditë pas takimit trepalësh në selinë e FIFA-s në Zyrih ndërmjet krerëve të FIFA-s, të Federatës së Futbollit të Kosovës dhe të Federatës së Futbollit të Serbisë.

Kosova nuk ka të drejtë të luajë me shtetet e ish-Jugosllavisë.

FIFA ka lejuar një vit më parë që përfaqësueset e ekipeve të moshave të Kosovës të zhvillojnë ndeshje ndërkombëtare miqësore, ndërsa përfaqësuesja A nuk ishte lejuar pasi Serbia ishte krejtësisht kundër diçkaje të tillë, me preteksin që nuk mund të luajë një përfaqësuese e një vendi që nuk ka emblemë e flamur.

Reagimi i Blater-it

Presidenti i FIFA-s, Sepp Blatter është shprehur i lumtur për vendimin e Komisionit për Çështje Urgjente të FIFA-s, sipas të cilit, Kosova do të mund të zhvillojë ndeshje miqësore.

Ai ka vlerësuar se ky vendim është në të mirën e futbollit.

"I lumtur për vendimin e Komisionit për Çështje Urgjente të FIFA-s për Kosovën - një fitore pë zhvillimin e futbollit", ka shkruar Blatter në Twitter.


Modalitetet për Kosovën

Modalitetet për ndeshjet miqësore që përfshijnë klubet dhe kombëtaren e Kosovës janë pranuar dhe hyjnë në fuqi menjëherë:

- Anëtaret e FIFA-s janë të lejuara që të luajnë ndeshje miqësore me klubet dhe kombëtaren e Kosovës.

- Klubet dhe kombëtarja e Kosovës nuk kanë të drejtë të shfaqin simbolet kombëtare (flamujt, emblemën, etj) e as ta lëshojnë himnin kombëtar. Sidoqoftë, ato kanë të drejtë të veshin apo të shfaqin paisjet me mbishkrimin ‘Kosovo’, si dhe simbolin e një ylli të madhësisë së shkronjës ‘o’ në kuadër te emrit ‘Kosovo’.

- Klubet dhe kombëtarja e Kosovës nuk mund të luajnë ndeshje kundër klubeve apo kombëtareve të shteteve të ish-Jugosllavisë deri në njoftimin e ardhshëm.

- Ndeshjet miqësore ndërkombëtare që përfshijnë klubet dhe kombëtaren e Kosovës mund të luhen në territorin e Kosovës, por me kusht që FIFA të njoftohet 21 ditë para secilës ndeshje. Më pastaj, FIFA vetëm do ta informojë Federatën e Futbollit të Serbisë.

- Çdo shkelje e kësaj marrëveshjeje do t’i referohet FIFA-s dhe marrëveshja do të përfundojë menjëherë.