Kosova mbyll kufijtë për 14 ditë...por të gjithë shqiptarët mund të kthehen në atdhe

TIRANË - Policia kufitare shqiptare dha detaje pas vendimit të qeverisë së Kosovës për të bllokuar kufijtë, pas dy rasteve të para të infektuar me koronavirus. Kufijtë do të qëndrojnë mbyllur për 14 ditë për arsye të parandalimit të COVID-19. Duke filluar prej orës 10:00 të datës 14 mars 2020 nuk do lejohet asnjë automjet dhe asnjë person të hyjnë në Kosovë dhe anasjelltas.

Të vetmit që do të lejohen të hyjnë në Kosovë, janë kosovarët që ndodhen në Shqipëri dhe duan të kthehen në Kosovë, si dhe do lejohen të hyjnë në Shqipëri, shqiptarët që janë në Kosovë dhe duan të kthehen në Shqipëri.

Po ashtu. do të lejohen ambulancat, lëvizja e mallrave dhe makinave qeveritare.

Ky vendim i palës kosovare është marrë për të gjithë kufirin e Kosovës, jo vetëm për kufirin me Shqipërinë.

"Policia Kufitare kërkon mirëkuptimin e qytetarëve që të anullojnë lëvizjet e planifikuara dhe ata që ndodhen duke lëvizur në drejtim të Morinës, të kthehen mbrapa, pasi nuk do lejohen të kalojnë", thuhet në njoftimin e policisë shqiptare.

Në pikën kufitare të Morinës nuk janë lejuar të kalojnë njerëzit që nuk kanë arsye. Mes tyre ishin edhe dy të rinj nga Librazhdi që jetojnë jashtë vendit dhe prej 8 ditësh ndodhen në Shqipëri. Ata kanë prerë biletën për të ikur me avion nga Prishtina, por thonë se fillimisht nuk i kanë lënë të kalojnë kufirin në Morinë. Me maska dhe me doreza në duar. ata qëndruan në pritje deri në gjetjen e një zgjidhjeje.

Kujtojmë se një vit më parë për shkak të ditës së verës rruga e Kombit dhe dogana e Morinës ka pasur fluks lëvizjesh të automjeteve.

G.M./Shqiptarja.com

TAG:
• policia kufitare
• Koronavirus
• koronavirusi ne shqiperi