Moti i keq/ Banorët e Torovicës apel për ndihmë: 120 familje të izoluara, kalojmë nga mali! Report Tv në Kuç të Shkodrës, banori: Dëmet në bujqësi të paimagjinueshme

Të izoluar dhe me dëme bujqësore të papërshkrueshme, kjo ka qenë situata nga moti i keq në sytë e banorëve në dy qarqet ende problematike të Lezhës dhe Shkodër. Qytetarët i bënë apel qeverisë se kanë nevojë për bazë ushqimore për vete dhe gjënë e gjallë.

Report Tv shkoi sot në Kuç të Shkodrës, aty ku dëmet janë kryesisht bujqësore por mjaft të mëdha. Reshjet e dendura të shiut kanë bërë që tokat me të mbjella ‘të notojnë’ në ujë si dhe në humbjen e gjësë së gjallë. Por problemi më i madh për të banorin e intervistuar nga gazetari Ergys Kavaja së bashku me moderatorët Migena Sotiri dhe Nertil Agalliu është fakti se kjo përmbytje edhe pse i prek çdo vit, kësaj radhe i kapi në befasi. 

Kjo është çfarë mbeti pas nga përmbytja në fshatin Kuç të Njësisë Guri i Zi në Shkodër. Investimi i shume viteve ka shkuar dem ne familjen Meti. Uji që dy ditë më parë arriti në 70 cm ka marrë para gjithçka.

Orenditë shtëpiake kane dalë të gjitha jashtë funksionit, ndërkohë që familja u evakuua për shkak të pritjeve të mëdha të lumit Kir dhe lumit Drin.

Ahmet Meti është përmbytur edhe para 12 vitesh, por thekson se këto përmbytje nuk ishin në përmasat e 2010-ës.

Meti u bëri thirrje qeverisë dhe institucioneve përkatëse të vënë dorën në zemër e të shohin gjendjen në të cilën ndodhen.

Report Tv shkoi gjithashtu në Torovicë të Lezhës, një qark edhe ky mjaft problematik. Në fushën e Torovicës aktualisht ndodhen nën ujë rreth 500 hektarë tokë bujqësore, çka bën të pamundur që banorët të dalin nga fshati.

Një banor tha se 124 familje janë të ngujuar në fshatin Torovicë. Ky problem e ka zanafillën prej disa kohësh tashmë, për shkak të bllokimit të rrugës që i lidh me aksin kryesor Lezhë-Torovicë. Në pamundësi për të lëvizur, banorët e fshatit kalojnë nga mali për t’u pajisur me ushqime dhe medikamentet e nevojshme.

Problemi i bllokimit të rrugës që lidh aksin kryesor lidhet me amortizimin e hidrovorit në zonë. Për shkak të vjetërsimit të tij, hidrovori nuk arrin dot të bëjë hidratimin, kjo edhe për shkak se ka rënë niveli i tokës në 2 metra. Kjo gjë është kërkuar prej kohësh nga banorët, por ende nuk ka një zgjidhje. Ditën e sotme nuk do të ketë forca ushtrie pasi nuk ka pasur emergjencë por banorët kërkojnë zgjidhje. Report Tv mëson se 200 pako do të jepen për banorët e zonës si ndihmë nga emergjencat civile.

Ndër të tjera, edhe deputetja demokrate Lindita Metaliaj u shpreh se qeveria duhet t’i vërë gishtin kokës dhe sa më shpejt të shpallë gjendjen e emergjencës së fatkeqësisë natyrore.

Situata sipas qarqeve:

Shkodër: 16 familje, në total 70 persona janë evakuuar ndërsa 43 janë akomoduar në konvikte. Sipërfaqja e përmbytur bujqësore është 1435 hektarë tokë, më e lartë se dita e djeshme.

Lezhë: Për shkak të përmbytjeve disa rrugë në qarkun e Lezhës janë të pa kalueshme. Rruga që lidh fshatin Blinisht me fshatrat e tjerë përreth në zonën e Zadrimës, është e pakalueshme dhe mjetet e vogla nuk mund të qarkullojnë. Edhe në rrugën anës malit në Torovicë, kalimi mjeteve bëhet me vështirësi.  Në fshatin Kakarriq, vazhdon të ketë prezencë uji në 4 banesa ndërsa janë 1300 hektarë tokë të përmbytur.

Korçë: Situata nga moti i keq ka prekur edhe qarkun e Korçës ku disa fshatra kanë mbetur pa energji elektrike. Probleme me energjinë ka pasur në disa fshatra të Kolonjës, Pogradecit, në fshatrat e njësisë administrative Lekas në Korçë, në fshatrat e Devollit dhe Maliqit. Si pasojë e stuhive të shumta, gjatë këtyre ditëve ka pasur probleme të shumta për shkak të rrjetit të amortizuar në zonat e thella malore. Nga reshjet e shiut në fshatin Qafzez të bashkisë Kolonjë 3 shtëpi rrezikuan të përmbyteshin nga një përrua që përshkon mesin e fshatit. Aktualisht po punohet duke ndërhyrë me fadromë për pastrimin e përroit.

Kukës: Situata në Kukës pavarësisht reshjeve të dendura dhe erës së fortë është paraqitur pa problematika shumë të mëdha. Rrugët kryesore të qarkut Kukës janë lehtësisht të qarkullueshme ndërsa ka pasur rënie intertesh dhe gurësh si dhe bllokime tumbinosh nga subjektet kontraktore, po punohet për pastrimin e tyre. Problematik mbetet ende rezervuari i fshatit Zherkë i njësisë administrative Bytyq të Bashkisë Tropojë.

Vlorë: Erërat e forta gjatë natës kanë sjellë probleme në qytetin e Vlorës. Probleme ka patur në disa pemë të cilat nga era kanë rënë në pyllin e Sodës dhe në Lungomare.  

Gjirokastër: Pak më shume se katër vite nga rreshkitja e një masivi dheu në lagjen “Kodra e shtufit” në Gjirokastër që përmbyti banesat e një pallati, reshjet e dendura të ditëve të fundit rishfaqën sërish problematika në këtë zonë. Reshjet e një nate më parë shkaktuan rrëshqitjen e një segmenti rrugor në këtë lagje duke rishfaqur sërish panikun e ripërtëritjes së situatës problematike. Specialisti i shërbimit gjeologjik Adem Draçi që monitoroi nga afër situatën, pohoi se gjendja nuk është e rrezikshme për banesat pranë, ndërsa do të kryhet studimi për ndërhyrjet e duhura për stabilizimin e rrugës, përgjegjësi që do të merret përsipër nga Bashkia Gjirokastër. Sipas tij shkak mbeten ndërtimet pa kriter në një zonë problematike.

Rendit zhvillimet sipas orarit:

Të Fundit Të Parat

G.MO/Shqiptarja.com

TAG:
• moti i keq