Moti i keq/ Banorët e Torovicës apel për ndihmë: 120 familje të izoluara, kalojmë nga mali! Report Tv në Kuç të Shkodrës, banori: Dëmet në bujqësi të paimagjinueshme

Si pasojë e motit të keq, do të hapen digat e rezervuarit “Ura e Fanit” në Mirditë.  Në njoftimin e bërë nga “AYEN AS ENERGJI”, për shkak të arritjes së kuotës maksimale të nivelit të ujit, shkarkimet e ujit mund të ndikojnë në pjesën e shtratit të lumin ‘Fan i Madh’.

Më tej bëhet me dije se 30 minuta para lëshimit të ujit do të kishte një alarm akustik që do të përsëritet në mënyrë periodike sa herë që të ketë lëshime të tilla të ujit.

“Për shkak të arritjes së kuotës maksimale të nivelit të ujit, sot me datë 23.11.2022, duke filluar nga ora 16:00 do të hapen Portat e Rezevuarit të Digës "Ura e Fanit" me vendndodhje pranë fshatit Qafmollë, Mirditë.

Shkarkimet e mundshme të ujit nga Rezervuari i Digës "Ura e Fanit" do të ndikojnë tek pjesa e shtratit të lumit Fan i Madh, nga zona poshtë Digës afër fshatit Qafmollë, deri poshtë fshatit Fang Rubik, aty ku lumi Fan bashkohet me lumin Mat.

Nga shoqëria "AYEN AS ENERGY" do të lëshohet edhe një alarm akustik 30 minuta përpara lëshimit të ujit, i cili do të përsëritet vazhdimisht në mënyrë periodike përgjatë gjithë kohës së lëshimit të ujit.

Kërkojmë nga ana juaj si qytetarë,  bashkëpunim dhe mirëkuptim duke u treguar të kujdesshëm dhe vigjilentë”-thuhet në njoftim.

Ministri i Mbrojtjes, Niko Peleshi ka folur për situatën e përmbytjeve. Peleshi tha se tani kanë mbetur vetëm 24 familje të evakuuara.

“Kanë vazhduar reshjet me një intensitet mesatar në veri të vendit, problematika është ende prezentë edhe pse ¾ e sipërfaqes tashmë është liruar. Tashmë janë të evakuuara vetëm 24 familje nga 52 gjithsej, 83 persona nga 318 banorë që ishin në fillim. Po monitorojmë situatën edhe në jug, në Lumin Vjosë. Pritet të ketë në Shushicë dhe Lumin e Drinos”, tha Peleshi.

Për Report TV ka folur edhe deputetja e PD-së, Lindita Metaliaj e cila u shpreh iu drejtua qeverisë për banorët e izoluar në fshatin Torovicë t’i vërë gishtin kokës dhe të shpallë gjendjen e emergjencës së fatkeqësisë natyrore. Deputetja demokrate u shpreh se zona është totalisht e bllokuar e se qytetarët nuk kanë asnjë ndihmë.

“Situata është më e rëndë seç duket. Jemi në ditën e 4 kjo zonë është totalisht e bllokuar. Qytetarët janë pa asnjë lloj mbështetje, kanë nevojë për ushqime dhe ilaçe. Moti është ftohur. Dhe ditën e djeshme, për të kryer ritet e fundit mortore të një zonje, ishte e nevojshme të vinin forcat e ushtrisë. Unë shpresoj që shteti t’i vërë gishtin kokës dhe të shohë banorët dhe të shpallë gjendjen e emergjencës së fatkeqësisë natyrore. Ata kanë nevojë më shumë se kurrë sot për shtetin dhe institucionet vendore dhe qendrore.”- tha deputetja e PD-së, Lindita Metaliaj.

Situata në Torovicë të Lezhës është mjaft problematike. Report Tv ka shkuar në zonë ku 124 familje janë të izoluara dhe nuk kanë kontakt me të tjerët për shkak të bllokimit të rrugës që i lidh me aksin kryesor Lezhë-Torovicë. Në pamundësi për të lëvizur, banorët e fshatit kalojnë nga mali për t’u pajisur me ushqime dhe medikamentet e nevojshme. Një banor i pyetur nga gazetari Elvis Hila dhe moderatorët Migena Sotiri dhe Nertil Agalliu u shpreh se bën 220 metra rrugë për të dalë nga zona e izoluar.

Report Tv mëson se 200 pako do të jepen për banorët e zonës si ndihmë nga emergjencat civile. Problemi i bllokimit të rrugës që lidh aksin kryesor lidhet me amortizimin e hidrovorit në zonë. Për shkak të vjetërsimit të tij, hidrovori nuk arrin dot të bëjë hidratimin, kjo edhe për shkak se ka rënë niveli i tokës në 2 metra. Kjo gjë është kërkuar prej kohësh nga banorët, por ende nuk ka një zgjidhje. Ditën e sotme nuk do të ketë forca ushtrie pasi nuk ka patur emergjencë por banorët kërkojnë zgjidhje.

“Ka 7 ditë që jemi përmbytur, nuk kemi ku të marrim ushqimet. Duhet t’i bie nga mali, ju e shihni vetë. Mua më bëri përshtypje Rama dhe kryebashkiaku që tha se nuk ka probleme në zonën e Lezhës, desha t’i komentoja por ju i shihni vetë tani.

Unë sot kam kaluar nga mali, dje shkova nga mali për të shkuar në Shkodër, është një metër ujë. 220 metra është rruga. Për ushqimet këtu i keni, ushqimet e kafshëve i keni në ujë.

Kemi nevojë edhe për bukën tonë, për kafshët dhe për nxënësit për fëmijët, nuk po shkojnë në shkollë. Vit për vit, prej 7 vitesh ndodh e njëjta gjë. Ja fiks 124 familje që janë të izoluara.”- tha banori për Report Tv.

Report Tv shkoi sot në Kuç të shkdorës ku gazetari i Report Tv Ergys Kavaja intervistoi së bashku me moderatorët Migena Sotiri dhe Nertil Agaliu banorin Ahmet Meti. Banori u shpreh se qeveria duhet të vërë dorën në zemër e t’i shikojë. Meti më tej shton se kjo përmbytje pavarësisht se u ndodh çdo vit,  i kapi në befasi, gjë që i kufizoi për t’i bërë ballë përmbytjeve. Edhe pse aktualisht në Shkodër nuk ka shtëpi nën ujë, banori thotë se dëmet në bujqësi janë të papërshkrueshme.

“Të vënë dorën në zemër dhe t’i shohin vetë. Sikur të ishte një përmbytje e parapritur do i bënim ballë por s’na premtoi koha të bënim asgjë.

Shumë, familje janë përmbytur por dëmet në bujqësi janë të papërshkrueshme. Bagëtia nën ujë, çdo gjë. Duhet të jemi realist.”- tha Ahmet Meti.

Situata në Shkodër krahasuar me ditën e djeshme nuk ka një përmirësim në sipërfaqen në hektarët e prekur së paku nuk ka banesa të përmbytura. Reshjet e ditës së sotme nuk pritet që të ndikojnë në dëme shumë të mëdha.

Erërat e forta gjatë natës kanë sjellë probleme në qytetin e Vlorës. Fotot që shihni tregojnë fushat e sportit ku nga era janë prishur. Probleme ka patur edhe në disa pemë të cilat nga era kanë rënë në pyllin e Sodës dhe në Lungomare.  

Situata nga moti i keq ka prekur edhe qarkun e Korçës ku disa fshatra kanë mbetur pa energji elektrike. Probleme me energjinë ka pasur në disa fshatra të Kolonjës, Pogradecit, në fshatrat e njësisë administrative Lekas në Korçë, në fshatrat e Devollit dhe Maliqit. Si pasojë e stuhive të shumta, gjatë këtyre ditëve ka pasur probleme të shumta për shkak të rrjetit të amortizuar në zonat e thella malore.

Stuhia ka rrëzuar degët e pemëve mbi tela.

Situata në Kukës pavarësisht reshjeve të dendura dhe erës së fortë është paraqitur pa problematika shumë të mëdha. Rrugët kryesore të qarkut Kukës janë lehtësisht të qarkullueshme ndërsa ka pasur rënie intertesh dhe gurësh si dhe bllokime tumbinosh nga subjektet kontraktore, po punohet për pastrimin e tyre.

Problematik mbetet ende rezervuari i fshatit Zherkë i njësisë administrative Bytyq të Bashkisë Tropojë.

Furnizimi me energji elektrike është normal përveç njësisë adimistrative Grykë-Çajë, Kalis dhe Arrën bashkia Kukës. Furnizimi me ujë të pijshëm është normal.