Operacionet në Aeroportin Ndërkombëtar “Nënë Tereza”, në Tiranë, i janë rikthyer normalitetit këtë të premte, pas anulimeve të fluturimeve dhe vonesave të shkaktuara nga reshjet një ditë më parë.

Duke iu përgjigjur interesit të mediave, “TIA” bën me dije se gjatë ditës së sotme vonesat e fluturimeve kanë qenë sporadike dhe kanë pasur të bëjnë me fluturimet drejt Stambollit dhe Romës.

“Është e qartë se kushtet e këqija të motit kanë ndikuar në operacionet e TIA-s, me disa fluturime të anuluara dhe dy prej tyre të devijuara. Megjithatë, së bashku me shoqëritë ajrore dhe  strukturat e Aviacionit Civil është arritur që fluturimet të kthehen në normalitet me sukses”, thuhet në një njoftim për shtyp.

Dy avionët e kompanive “Pegasus” dhe “Blue Panorama”, të cilët mbrëmjen e djeshme u detyruan të devijonin për në Bari për shkak të reshjeve, u ulën në kryeqytetin shqiptar në orët 02:50 dhe 09:35 të së premtes.

Ndërkohë, pasagjerëve që zbresin në aeroport TIA u ka sugjeruar që të ndjekin njoftimet e institucioneve zyrtare, ndërsa u ka këshilluar të bëjnë kujdes në zgjedhjen e rrugëve ku do të kalojnë. 

G.F. / Shqiptarja.com