Mrekullia, doktorët në SHBA
kurojnë fëmijën e lindur me HIV

TIRANE- Mjekët në SHBA thonë se kanë arritur të kurojnë me sukses një fëmijë të lindur me virusin HIV. Kjo është hera e parë që prej dokumentimit të sëmundjes me HIV/ AIDS.

Doktorët besojnë se vogëlushi i cili aktualisht është 2 vjeç e gjysëm nuk ka më nevojë për mjekim kundër HIV, bën një jetë normale, dhe nuk ka gjasa që të infektojë të tjerët.

Megjithëse stafi mjekësor dhe shkencëtarët ende janë të paqartë se përse trajtimi mjekësor ishte i efektshëm, suksesi i papritur ka rritur shpresat që terapia mund të ndihmojë doktorët të çrrënjosë virusin nga fëmijët e porsalindur. Vogëlushi është mjekuar sapo ka lindur.
 
Doktorët nuk kanë bërë publike emrin apo nëse fëmija është djalë apo vajzë me qëllim të ruajë indentitetin e pacientit por kanë thënë se fëmija ka lindur dhe jeton në shtetin e Missisipit. Detajet janë zbuluar të dielën në një konferencë mjekësore në Atlanta.

Doktor Hannah Gay, e cila u kujdes për fëmijën në Qendrën universitare të Missisipit i tha "the Guardian" se kemi të bëjmë me rastin e parë kur një kurë vepron në një fëmijë të infektuar me HIV. Një pacient është kuruar tërësisht nga virusi HIV kur analizat tregojnë se virusi është negativ, por ka mundësi që një sasi e vogël e këtij virusi të mund të mbesë në trupin e pacientit.

Tani, pas të paktën 1 vit nga përfundimi i kurës, analizat më të sofistikuara tregojnë se në gjakun e fëmijës nuk ka më virus”- thotë Gay.

Ne presim që ky fëmijë të ketë shanse të mëdha për një jetë të gjatë e të shëndetshme. Ne shpresojmë që ky mjekim të ketë të njëjtin rezultat në shumë fëmijë të tjerë” - tha ajo.

Në Afrikë janë rreth 387 500 fëmijë nën moshën 14 vjeç që mjekohen kundër HIV. Në Britaninë e Madhe dhe në Irlandë numri i fëmijëve me HIV është 1200. Në Shqipëri numri në total i të prekurve nga virusi është 555: 70% (390 raste) janë meshkuj 30% (165 raste) janë femra, 5% e rasteve janë diagnostikuar në moshë fëminore 0-15 vjeç

(sg/shqiptarja.com)