Në Bruksel sot bisedohet për
pikëkalime Jarinje, Bërnjakë

Në kuadër të dialogut në mes të Prishtinës dhe Beogradit dje në Bruksel u arrit marrëveshja për njohjen reciproke të diplomave universitare. Përparim është shënuar dhe përfaqësimin e Kosovës në takime ndërkombëtare.

Kjo temë si dhe çështja e menaxhimi të integruar të kufinjve do të jetë në agjendën e ditës së dytë të dialogut që po zhvillohet në ndërtesën e Këshillit të BE-së në Bruksel. Vazhdimi i dialogut mes Beogradit dhe Prishtinës shënoi përparim sa i përket njohjes së diplomave universitare. Të dy palët arritën një marrëveshje për pranimin e diplomave të cilat nuk do të përmbajnë simbolet e statusit. Pjesa më e madhe e diskutimeve në ditën e parë të raundit të shtatë të dialogut iu kushtua çështjes së përfaqësimit të Kosovës në forumet rajonale. Ndërkohë që Prishtina nga njëra anë insiston në përfaqësimin e saj të barabartë, Beogradi këmbëngul që të ketë një asimetri të qartë në mes të Prishtinës dhe pjesëmarrësve të tjerë.

PALËT VAZHDOJNË NË “LINJËN E TYRE TË VJETËR"

Kur flitet për menaxhimin e integruar të kufijve, ai sipas kreut të delegacionit të Prishtinës, Edita Tahiri është një model evropian që parashikon një marrëveshje midis dy shteteve për të bashkëpunuar në menaxhimin e kufijve shtetërorë, në përputhje me Kushtetutën e Kosovës dhe si i tillë ai është i pranueshëm për Prishtinën. Megjithatë, Borislav Stefanoviq, i cili i prin delegacionit të Beogradit tha se sa i përket kësaj çështjeje, është e qartë se vështirë se do të ketë afrim të qëndrimeve:
"Për ne, vija administrative në asnjë mënyrë nuk mund të fitojë karakteristikat e kufirit shtetëror dhe as kalimet administrative nuk mund të jenë kalime kufitare. Prishtina kërkon simbolet e veta, gurin e saj të kufirit, kontrollin e hyrje-daljeve... Qëndrimet tona janë këtu të qarta, ne nuk mund t'i pranojmë këto dhe para nesh kemi negociata të vështira".

PROBLEM MBETET EDHE APLIKIMI I MARRËVESHJEVE
Delegacioni i Prishtinës thekson se shtetësia se Kosovës është realitet dhe problemi qëndron vetëm se si do ta pranojë këtë Serbia. Në të njëjtën kohë Edita Tahiri tha se nga pesë marrëveshjet e arritura në dialog deri tani aplikohet vetëm marrëveshja që ka të bëjë me lëvizjen e lirë të mallrave. Përgjegjësia për "zvarritjen dhe shmangies së përgjegjësisë" për zbatimin e marrëveshjeve hidhet kryesisht në Beograd.

"Sfida e tanishme është se si Serbia të aplikojë marrëveshjet e arritura. BE po vëzhgon me kujdes situatën dhe të gjithë i dinë përgjegjësitë e veta. Serbia duhet të konfirmojë gatishmërinë për zbatimin e marrëveshjeve, çka varet më shumë nga vullneti politik i autoriteteve në Beograd se nga bisedat që ne kemi me Stefanoviqin në tryezë", - deklaroi Tahiri.

Delegacioni i Beogradit u përgjigj se Serbia është e gatshme të përmbushë të gjitha ato për të cilat është rënë dakord dhe të punojë në atë drejtim, por asnjë nga zgjidhjet dhe përdorimi i tyre nuk duhet të cenojnë as Kushtetutën, as ligjet e Serbisë e as Rezolutën 1244 të OKB-së.
(Burimi Dwvelle, autor: Marina Maksimoviq / Esat Ahmeti)