Në Karaçevë, barrikada, pankarta
kundër xhandarmërisë serbe

KARAÇEVË - Të revoltuar nga hyrja e xhandarmërisë serbe brenda territorit të Kosovës banorët e fshatit Karaçevë, në rrugën e Breznicës, janë organizuar dhe kanë vendosur flamuj e pankarta me mbishkrimin: “Stop hyrjes së xhandarmërisë serbe në Kosovë.
 
Protesta e para disa ditëve e banorëve të Karaçevës nuk u bëri punë, as thirrjet e lutjet e përditshme drejtuar institucioneve qendrore, që të trajtohet seriozisht rasti i Karaçevës, transmeton Rajonipress.
 
Banorët e Karaçevës të shtunën në mesditë kanë gjetur një formë tjetër për të shprehur revoltën e tyre paqësore.
 
Selver Lenjani, përfaqësues i këshillit të fshatit tha se askush nuk ka reaguar deri tani rreth hyrjes me motorë të xhandarmërisë serbe.
 
“Ne së bashku me banorët të përkrahur edhe nga diaspora vendosëm, që në vendin ku ka parakaluar xhandarmëria serbe, e quajtur si “Rruga e Breznicës’ të vendosim një barrikadë, ku janë të vendosur flamujt shqiptarë dhe ai amerikan”, sqaroj Lenjani.
 
Lenjani tha se kësaj radhe nuk do të lëvizin nga vendi sepse xhandarmëria serbe e ka tepruar me provokime dhe është shumë normale që edhe popullata të frikësohet.
 
“Këta flamuj simbolizojnë se kjo tokë dhe ky vend i takon Kosovës dhe xhandarmëria serbe, kur të hasë në këtë barrikadë do të ketë bukur telashe e pasoja. Ne do ta mbrojmë vetë pjesë tonë të tokës, e cila është punuar me vite nga stërgjyshërit tanë”, tha Lenjani.

Redaksia Online
(mag/shqiptarja.com)