Ndahet nga jeta në moshën 95-vjeçare Kasëm Kaso-Kaçi, drejtori më jetëgjatë në Policinë e Shqiptare. Kasëm Kaso-Kaçi, ka ndërrua jetë ditën e djeshme, ndërsa ka mbajtur për 15 vite postin e Drejtorit të Përgjithshëm të Policisë Shqiptare, duke u cilësuar edhe drejtori më jetëgjatë në këtë detyrë.

Kasëm Kaso, i njohur publikisht Kasëm Kaçi, është lindur më 16 qershor 1927 në Gjirokastër. Kasëm Kaçi kreu 5 klasë të shkollës fillore në Gjirokastër, në periudhën 1936-1941, ndërsa shkollën e mesme e ka kryer në Shkodër, pas çlirimit të Shqipërisë. Arsimin e lartë, Institutin Juridik, e ka kryer në periudhën 1956-1959. Ka kryer me korrespondencë Fakultetin e Shkencave Politiko-Juridike, në Universitetin Shtetëror të Tiranës, duke u diplomuar “jurist”, ndërsa u specializua në Bashkimin Sovjetik për shërbimet e Policisë.

Në muajin maj 1943, ende pa mbushur moshën 16 vjeç, doli partizan dhe mori pjesë në Luftën Antifashiste Nacionalçlirimtare. Pas disa posteve në polici dhe Ministrinë e Brendshme, në shkurt 1968 në postin e lartë “Drejtor i Policisë Popullore”, ku qëndroi për dymbëdhjetë vjet pa lëvizur, deri në janar 1980. Në gusht 1982, është rikthyer përsëri në detyrën “Drejtor i Policisë Popullore”, ku shërbeu deri në dhjetor.

Për ndarjen e tij nga jeta ka shprehur ngushëllimet edhe drejtori i Përgjithshëm i Policisë së Shtetit, Gledis Nano, i cili ka vlerësuar rolin e tij në dërtimin e policisë së Shtetit përgjatë viteve.

"Te nderuar familjarë të Ish Drejtorit të Përgjithshëm të Policisë së Shtetit, Kasem KASO-KAÇI Me pikellim morëm lajmin për ndarjen nga jeta të Z.Kasëm KASO- KAÇI, i cili për rreth 15 vite ishte në cilësinë e Drejtorit të Përgjithshëm të Policisë Shqiptare, duke u veçuar si më jetëgjati në detyrë. Në emrin tim dhe të Policisë së Shtetit shpreh ngushëllimet më të sinqerta për humbjen e kësaj figure të rëndësishme në rrugëtimin 109 vjeçar të Policisë së Shtetit, të cilën Z.Kasëm KASO- KAÇI e drejtoi dy herë në periudhat respektive Shkurt 1968-Janar 1980 dhe Gusht 1982-31 Dhjetor 1984. Emri i tij do të kujtohet nga gjeneratat e ardhshme si një luftëtar dhe veteran i Luftës Antifashiste Nacionalçlirimtare, por edhe si ish Drejtor i Përgjithshëm i Policise Shqiptare në radhët e së cilës punoi mbi 40 vite. Njëherazi lutemi për përcjelljen e ketyre ngushëllimeve edhe te afermve, miqve dhe të dashurve të Z.Kasëm KASO- KAÇI. Qoftë i përjetshëm kujtimi për të", shkruan Nano.