Ndahet nga jeta ish-ministri i Shëndetësisë Cikuli, Meta, Basha dhe Ruçi shprehin ngushëllimet: Iku një personalitet i mjekësisë shqiptare

Kryetari i Kuvendit Gramoz Ruçi ka shprehur ngushëllimet e tij për ndarjen nga jeta të ish-ministrit të Shëndetësisë Maksim Cikuli, i cili vdiq sot në moshën 68-vjeçare. Ruçi shkruan se Cikuli ishte një personalitet i shquar i mjekësisë shqiptare, legjislator që shërbeu me vizion dhe përkushtim, i cili gjithashtu kishte virtyte të larta si deputet, profesionist dhe qytetar.

“Me dëshpërim mora vesh lajmin për ndarjen nga jeta të profesorit Maksim Cikuli, këtij personaliteti të shquar të mjekësisë dhe shkencës shqiptare. Si deputet i Kuvendit të Shqipërisë gjatë viteve 1996-2001, Maksim Cikuli ka treguar vizion, përgjegjësi, profesionalizëm dhe përkushtim të lartë prej legjislatori për mbështetjen e zhvillimit të mjekësisë dhe të shërbimit shëndetësor në Shqipëri si edhe për shërbimin ndaj qytetarëve. Gjatë gjithë jetës së tij, Profesor Cikuli ka shërbyer me korrektesë e devotshmëri dhe me virtytet e larta profesionale e njerëzore ka fituar respektin dhe mirënjohjen e qytetarëve të Shqipërisë. Deputeti Maksim Cikuli do të mbetet përgjithmonë në kujtesën time si një koleg, ligjvënës dhe qytetar shembullor dhe referencë për shkencëtarët, politikanët dhe deputetët e Shqipërisë. Ngushëllimet e mia të sinqerta familjes dhe gjithë të afërmve.”, shkruan Kryetari i Kuvendit, z. Gramoz Ruçi, në mesazhin e ngushëllimit me rastin e ndarjes nga jeta të ish deputetit Maksim Cikuli,"-shkruan Ruçi.

Kryetari i Partisë Demokratike Lulzim Basha në rrjetet sociale ka shkruar për ndarjen nga jeta të ish-doktorit dhe ish-ministrit të Shëndetësisë Maks Cikuli. Basha thotë se Cikulin e kishte një mik të çmuar, ndërsa gjithë jetën e tij e kishte vënë në shërbim të shëndetit të njerzëve, si mjek, si profesor, si deputet dhe si ministër i shëndetësisë.

"Jam i tronditur nga lajmi për largimin e parakohshëm nga jeta të mjekut, profesorit, politikanit, dhe mikut tim të çmuar, Maks Cikuli. Ngushëllimet e mia më të ndjera Zanës, Julianit dhe Sarës për humbjen e bashkëshortit dhe babait të tyre të dashur. Me mendje e zemër gjendem sot pranë tyre dhe gjithë miqve të Maksit në këtë ditë zie.

Profesor Cikuli e vuri gjithë jetën e tij në shërbim të shëndetit të njerëzve, si mjek, si profesor, si deputet dhe si ministër i shëndetësisë.

Ai ishte një nga reformatorët e spikatur që e udhëhoqën Shqipërinë në rrugën e çlirimit nga diktatura komuniste drejt ndërtimit të institucioneve demokratike dhe të ekonomisë së tregut të lirë. Dy herë ministër Shëndetësie, në vitet 1994-1998 e 2005-2008, profesor Cikuli kontribuoi në tranzicionin e sistemit të shëndetësisë dhe mbështeti investimet e mëdha në ndërtimin e sallave bashkëkohore kirurgjikale dhe sistemit të spitaleve rajonale.

Maks Cikuli spikat si model i urtësisë politike dhe angazhimit inetelektul duke u dalluar në jetën parlamentare të vendit për kultivimin e dialogut dhe debatit civil si dhe mbrojtjen e pakompromis të lirive dhe të drejtave të shqiptarëve. Partia Demokratike është e nderuar që ka patur në radhët e veta njërin nga themeluesit e pluralizmit në Shqipëri, simbol të angazhimit shoqëror, të profesionalizmit, të dijes dhe të humanzimit.

Në këtë ditë zije kur familja ka humbur njeriun e saj më të shtrenjtë, qytetaria kujton me repektin më të madh modelin e intelektualit, shoqëria jonë nderon humanistin e pashoq, demokratët njërin nga përfaqësuesit e tyre të shquar dhe unë një mik të çmuar e të paharrueshëm. U prehtë në paqe!"-shkruan Basha në 'facebook'.

Presidenti i Republikës Ilir Meta shkruan se është një lajm trishtues ai i ndarjes nga jeta të Maksim Cikulit, ish-ministër i Shëndetësisë, i cili u nda nga jeta në moshën 68-vjeçare. Sipas Metës pavarësisht ikjes nga kjo botë ai do të mbahet mend si zë i moderuar, i angazhuar për mbrojtjen e parimeve të lirisë dhe të drejtave të njeriut.

"Trishtues lajmi i ndarjes nga jeta të Prof. Dr. Maksim Cikulit, personalitet i shquar i mjekësisë shqiptare, por edhe politikan e përfaqësues i nderuar i elitës qytetare dhe intelektuale të vendit.
Në dekada pune e përkushtimi dhe humanizmi të madh, Prof. Dr. Maksim Cikuli dha një kontribut të shquar si mjek, por veçanërisht si themelues i shërbimit të vetëm kombëtar të gjenetikës në Shqipëri.
Në politikë, si ish-ministër i Shëndetësisë dhe deputet në dy legjislatura, ai do të mbahet mend si një zë i moderuar, i angazhuar për mbrojtjen e parimeve të lirisë dhe të drejtave të njeriut qysh në vitet e para të pluralizmit politik, si dhe për reformimin e sistemit shëndetësor në vend.
Duke u përulur me nderim e mirënjohje të thellë para kujtimit dhe veprës së tij, u shpreh ngushëllimet më të thella familjes, të afërmve, miqve e bashkëpunëtorëve,"-shkruan Meta në 'facebook'.