Volejbolli shqiptar humbi  dje një emër të madh. Ish-kampioni i Dinamos, Jean Bonati mbylli sytë njëherë e përgjithmonë në moshën 81-vjeçare, duke lënë pas një trashëgimi suksesi dhe sacrifice që do të mbahet mend gjatë.

I lindur në Tiranë më 19 shkurt 1945, Bonati u shqua që herët si një nga talentet më premtues të viteve ’60. Emri i tij lidhet ngushtë me Dinamo Tirana, ku ishte pjesë e brezit të artë që dominoi kampionatin shqiptar.

Bonati luajti përkrah emrave të mëdhenj si Asllan Rusi, Alfred Radi, Vangjel Koja, Anastas Panteqi dhe Ylli Shehu, duke qenë shtylla kryesore e ekipit që fitoi titujt kampion në vitet 1964, 1965 dhe 1966.

Në parket njihej për fizikun e fortë, kërcimin e lartë dhe goditjet e fuqishme. Kolegët e përshkruajnë si një lojtar që bënte diferencën në çdo ndeshje.

Por karriera e tij nuk ishte pa pengesa. Si shumë sportistë të asaj kohe, edhe Bonati u përball me persekutim politik, çka i ndërpreu padrejtësisht rrugëtimin në kulmin e formës fizike. Megjithatë, ai arriti të rikthehej në vitin 1970 me ekipin e Dajtit të Tiranës, në një rikthim që shumëkush e quajti të rrallë e të lavdërueshëm  

Pas viteve ’90, Bonati nuk u largua nga sporti. Përkundrazi, iu përkushtua brezave të rinj si trajner në ekipin e Tiranës, duke lënë gjurmë edhe jashtë fushës.

Jean Bonati ishte gjithashtu babai i zëvendësministrit të Infrastrukturës dhe Energjisë, Hantin Bonati, i cili ka ndarë një mesazh prekës lamtumire:

“Me hidhërim të thellë njoftojmë ndarjen nga jeta të babait tonë të dashur, Jean Bonati. Lamtumirë babi, kujtimi yt do të jetojë përgjithmonë në zemrat tona. U prehsh në paqe.”

U.D/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 18 Prill, 08:22

    Si ju duk strategjia e drejtorit Hita në organizimin e policisë gjatë protestës së PD?

Lajme të tjera