Pasi në datë 29 shtator u fut me forcë dhe ndërpreu mbledhjen e Këshillit Bashkiak të Vlorë, duket se problemi i David Danos është zgjidhur.

Në një postim në rrjetet sociale, kryetari i komanduar i Bashkisë Vlorë, Elis Halili shkruan se problemi i Davidit është zgjidhur. Halili më tej shkruan se beson në nismat e të rinjve.

“Jam shumë i kënaqur që problemi i Davidit u zgjidh! Besoj fort në dëshirat dhe nismat e të rinjve, me bindjen që aftësitë, vullneti dhe besimi, do t'i bëjnë të ecin përpara!”, shkruan në Facebook, kryetari i komanduar  i Bashkisë Vlorë.

David Dano së bashku me një tjetër të ri, u fut me forcë në mbledhjen e Këshillit Bashkiak të Vlorës në 29 shtator.

I riu kërkonte dëmshpërblimin për banesën që i është prishur për ndërtimin e rrugës Transballkanike.

Ndërsa policia i shoqëroi në komisariat dy të rinjtë, ku nisi hetimet ndaj tyre.