Ndërron jetë në burg aktivisti
i Vetëvendosjes, Astrit Dehari

Aktivisti i Lëvizjes Vetëvendosje, Astrit Dehari që mbahej në paraburgim në burgun e Prizrenit ka ndërruar jetë.
 
Sipas mediave në Kosovë, bazuar në burimet nga policia ai ka ndërruar jetë gjatë transportit nga dhomat e paraburgimit për në Spitalin Rajonal.
 
Policia e Prizrenit thotë se viktima ka përdorur disa ilaçe e më pas ka rënë në koma.
 
Ndërsa Kryeprokurori i Prizrenit, Sylë Hoxha ka deklaruar se po presim mjekësinë ligjore për të përcaktuar shkaqet e vdekjes.
 
Sipas tij, vdekja e aktivistit të Vetëvendosjes, Astrit Dehari ka qenë e dyshimtë. 

Shërbimi Korrektues i Kosovës deklaroi se në bashkëpunim me institucionet e tjera përgjegjëse së shpejti do të japin raport për rrethanat dhe detajet e vdekjes.
 
Astrit Dehari po mbahej në paraburgim me dyshimin për terrorizëm me rastin e sulmit që ka ndodhur ndaj Kuvendit te Kosovës.
 
Ai ishte njëri nga gjashtë të akuzuarit për sulm ndaj ndërtesës së Kuvendit të Kosovës në gusht të këtij viti.

Pas lajmit për vdekjen e aktivistit ka reaguar Lëvizja Vetëvendosje duke akuzuar qeverinë e Kosovës.


Deklarata e Vetëvendosjes
"Astrit Dehari mbahej në burg prej 68 ditësh si i burgosur politik me prova të fabrikuara në një proces të montuar gjyqësor.
 
Në këto momente të rënda për familjarët dhe shokët e Astrit Deharit, dhe për të gjithë ne, Lëvizja VETËVENDOSJE! po ndjek nga afër deklaratat kontradiktore të organeve të shtetit të Kosovës lidhur me vdekjen e tij.
 
Astrit Dehari po mbahej në burg prej 68 ditësh bazuar mbi akuza të montuara për terrorizëm nga Prokuroria dhe Policia e kapur e Kosovës. Astrit Dehari ishte anëtar i Këshillit të Përgjithshëm të Lëvizjes VETËVENDOSJE!.
 
Nga njëra anë, Drejtori i Policisë për Rajonin e Prizrenit, Nexhmi Krasniqi, ka deklaruar se Astrit Dehari ka vdekur rrugës për në Spitalin e Prizrenit për shkak të konsumimit të barnave.
 
Nga ana tjetër, Shërbimi Korrektues i Kosovës ka deklaruar se Astrit Dehari ka vdekur pasi ka mbërritur në Spitalin e Prizrenit dhe ende nuk ka nxjerr raport mbi vdekjen e tij.
 
Burime të tjera tregojnë se Astrit Dehari mund të ketë vdekur në burg si pasojë e mungesës së duhur të kujdesit ndaj shëndetit të tij.
 
Kurse kryeprokurori i Prizrenit deklaron se vdekja është e dyshimtë. Të gjitha këto janë informata kontradiktore dhe të papërputhshme.
 
Lëvizja VETËVENDOSJE! ka bërë disa herë thirrje dhe protesta për lirimin e aktivistit Astrit Dehari dhe 5 aktivistëve të tjerë që ende mbahen si të burgosur politikë.
 
Protesta e fundit për lirimin e aktivistit Astrit Dehari është mbajtur dje pranë burgut të Prizrenit, por kërkesa jonë e drejtë ka rënë në vesh të shurdhër.
 
Përtej deklaratave kontradiktore të organeve të shtetit, ndërkohë që ende jemi duke bërë maksimumin për të marrë vesh të vërtetën e plotë mbi ngjarjen, Lëvizja VETËVENDOSJE! mban pikësëpari përgjegjës për këtë vdekje zinxhirin komandues të Policisë së Kosovës, Prokurorinë dhe Qeverinë e Kosovës që e kanë mbajtur Astrit Deharin si të burgosur politik për 68 ditë rresht pa zhvilluar një gjykim të paanshëm dhe të drejtë me akuza krejtësisht të montuara".
 


dy.b/shqiptarja.com