Ndërtimi i urës 300 metër mbi lumin Bunë, Abazoviç: Kushton rreth 20 mln euro, ndahet përgjysmë me Shqipërinë! Rama: S'është sa për të kaluar fushatën elektorale

 

Kryeministri i Malit të Zi, Dritan Abazoviç ka bërë me dije se ndërtimi i urës mbi lumin Buna do të kushtojë 20 milionë euro. Në deklaratën për media u shpreh se do të hapin tender për ofertën më të lirë dhe do e paguajnë për 3 vite.

Ndërsa Edi Rama tha se sfida mbetet gara pasi do të ketë një komision të përbashkët, gjë është hera e parë që ndodh. Po ashtu bëri me dije se projektin do ta publikojnë nesër duke shtuar se nuk është sa për të kaluar fushatën elektorale.

“Kjo është marrëveshja qendrore. Disa animime i kemi treguar. Mendoj që do të kushtojë rreth 20 milionë euro dhe nëse ndahet përgjysmë nuk është shumë nga buxheti kapital. Në vitin e parë jepen vetëm mjetet fillestare. Pagesa do të bëhet në disa vite që të mos jetë ngarkesë e ngarkuar për vendet tona.

73 km janë aktualisht, ura do të jetë 300 metra. Kemi trafik gjatë verës dhe do të ketë benefite edhe për GDP e 2 shteteve. Unë nuk e di që diçka mund të jetë më efektive dhe kaq i lirë për nga vlera. Pala shqiptare e ka bërë projektimin dhe shpresoj që të hapim tenderin për ofertën më të mirë. Një projekt i tillë për 3 vjet mund ta paguajë administrata vendore e jo buxheti i shtetit. Komisioni ndërshtetëror do të bëjë të gjitha kontrollet në terren. Edhe pika Pulaj-Shënkollë do të jetë në funksion të kësaj”, tha Abazoviç.

“Këtë projekt do e paguajnë të dyja qeveritë dhe ka vlerë të jashtëzakonshme se do të lidhë 2 anë të një kufiri që është 300 metra, sa ç’është ura ndërsa në realitetin e hidhur të fqinjësisë sonë është dhjetëra km, ku ka edhe të papritura si rasti i profesor Milos. Projekti i zbatimit është gati, sfida është të ndërtojmë një procedurë që është hera e parë që ndodh, 2 qeveri hapin një garë me komision të përbashkët. Të dyja ekipet juridike të 2 kryeministrive do të angazhohen menjëherë. Do përcaktohet fituesi dhe do ndërtohet ura. Projektin do e bëjmë të njohur që nesër dhe do shihni që është i bukur dhe ambicioz, nuk është urë për të kaluar një fushatë elektorale por shumë e shumë vite. Për ne është e vlefshme sepse edhe me ndërtimin e rrugës nga Shëngjini në Velipojë dhe me këtë lidhje rritet lëvizshmëria dhe ne fitojmë shumë. Kjo urë nuk zëvendëson atë lidhjen e plotë të korridorit blu. Koha do ta provojë që është projekt i domosdoshëm. Për zonën bregdetare do hapim konkurs ndërkombëtar për masterplan në aspektin e zhvillimit të turizmit. Është zonë e pazhvilluar që kërkon ndërhyrje precize për ta kthyer në magnet të turizmit. Të dyja vendet tona kanë harxhuar energjitë për bregun e detit”, tha Rama.

Lajmi kryesor:

VIDEO/ Mbledhja ndërqeveritare Shqipëri-Mali i Zi, Rama-Abazoviç: Jemi më shumë se fqinj! ‘Ballkani i Hapur’ ka rijetëzuar Procesin e Berlinit

A.M./r.k./Shqiptarja.com

TAG:
• edi rama
• mbledhje Shqiperi Mali i Zi
• mali i zi
• Dritan Abazovic