Ndryshimet në qeveri, grupi i PD kërkesë për debat Kuvendit: Përbërja e Këshillit të Ministrave s’është produkt privat i Ramës

Kryetari i Grupit Parlamentar të PD Gazment Bardhi ka kërkuar që ndryshimet në përbërjen e Këshillit të Ministrave të bëhen përmes një debati parlamentar. Në kërkesën zyrtare të drejtuar Kuvendit, Bardhi shkruan se “Përbërja e Këshillit të Ministrave nuk është një produkt privat i Kryeministrit, që gëzon vetëm të drejtën kushtetuese të propozimit të saj, por caktimi është një ndërveprim institucional mes tre institucioneve Kryeministër-President i Republikës-Kuvendi i Shqipërisë. Në këtë rast, Kuvendi i Shqipërisë nuk mund të ketë rol formal, vetëm në certifikimin e vullnetit personal të Kryeministrit, por duhet të diskutojë dhe vlerësojë në meritë propozimet dhe dekretet e ardhura.”.
 
Grupi Parlamentar i PD kërkon që debati të zhvillohet në një kohë prej 6 orësh. “Duke qenë se jemi përpara ndryshimit të përbërjes së Këshillit të Ministrave, që nënkupton një përbërje të re të tij, në përputhje me nenet 12, 46, 48 dhe 110 të Rregullores së Kuvendit, kërkojmë që shqyrtimi i Dekreteve të Presidentit që ndryshojnë përbërjen e Këshillit të Ministrave t’i nënshtrohen debatit parlamentar, prej 6 orësh, të ndarë në mënyrë proporcionale mes grupeve parlamentare.” -  shkruhet në kërkesën zyrtare të Grupit Parlamentar të PD.

 

Lajmi kryesor:

Begaj dekreton ndryshimet në qeveri, në 17:00 mblidhet Kuvendi! PD kërkon 6 orë debat: Përbërja e kabinetit s’është produkt privat i Ramës

SI.E./E.B/Shqiptarja.com

TAG:
• taulant balla
• elisa spiropali
• Bajram Begaj
• PS
• edi rama