Në Librari/ 4 titujt e rinj për këtë fundjavë: ‘Vocërrakja’, ‘Vallëzim me hënën’, ‘Shqipëria e vjetër motorike’ dhe ‘Shitësja e ëmbëlsirave’

Rubrika “Në Librari” përgatitur nga gazetarja Anila Dedaj vjen këtë fundjavë me katër tituj të rinj.

Titulli: “Vocërrakja

Autore: Silvia Montemurro

Shtëpia Botuese: “Muza”

Çmimi: 1000 lekë

Romani “Voçërrakja” i Silvia Montemurros të shpie në Milanon e fillimviteve ‘900. E rritur në një familje, që në vend të saj do të kishte dashur një djalë, Nora është një nga vajzat e shumta që rritet në një shoqëri të vrazhdë, të shfrytëzuara e të papaguara. Në grevën e vitit 1902 ku marin pjesë qindra punëtore fëmijë e të reja, është edhe ajo, 16-vjeçarja e revoltuar, nga padrejtësitë deri në krime çnjerëzore. Imazhi i saj prekës, i jetësuar nga Emilio Longoni, frymëzon edhe këtë roman.

Titulli: “Vallëzim me Hënën

Autor: Namik Dokle

Shtëpia Botuese: “Toena”

Çmimi: 1300 lekë

52 legjenda të Gorës, krahinës që bashkon tri shtete, Shqipërinë, Kosovën dhe Maqedoninë e Veriut, Namik Dokle i sjell në librin  “Vallëzim me Hënën”. Për historinë enigmatike të krijimit të Gorës që gjendet në dokumente me këtë emër prej 1348-ës, gjuhën e rrallë të ruajtur brez pas brezi ndonëse e pashkruar në libra, ritet, besimet fetare, magjistricat a engjëjt, Dokle sjell legjendet e pashkruara asnjëherë më parë.

Titulli: “Shqipëria e vjetër motorike

Autor: Bajram Peçi

Shtëpia Botuese: “Mediaprint”

Çmimi: 5000 lekë

Imazhe dhe histori, Bajram Peçi, përmbledh në një album “Shqipërinë e vjetër motorike” frymëzuar nga koleksioni i “Muzeut Ron”. Gjurmët e mjeteve të para të transportit në fund vitet ‘800,  krijimi i rrugëve gjatë Luftës së Parë Botërore, raportimet e kronikave për 375 automobila në vitin 1929 dhe 6000 të tilla në fund të viteve ’50, deri edhe fabrikat e prodhimit të biçikletave, kaskave e uniformave. Katalogu i Peçit vjen si dëshmi e mjeteve motorike që u përdorën në vendin tonë.

Titulli: “Shitësja e ëmbëlsirave

Autore: Suela Armata

Shtëpia Botuese: “Toena”

Çmimi: 1600 lekë

Frymëzimin për romanin “Shitësja e ëmbëlsirave” Suela Armata e merr nga një histori e vërtetë, e më pas e ngjyros me penelin delikat të letërsisë artistike. Personazhi i saj, është një vajzë e ëmbël, jeta e së cilës është shënjuar nga humbja e prindërve, e si pasojë mbi supe i bien shumë përgjegjësi, që duhet t’i përballojë dorë për dore me vëllain e saj. Plot tallaze është edhe jeta e saj dashurore, ku Suela, që gjithashtu si personazhi është një shitëse ëmbëlsirash, trajton lidhjet në rrethana të pazakonta, dhunën, dhe sfidat e një gruaje për të vijuar rrugëtimin jetësor në një shoqëri si e jona.

K.M//Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    A besoni se SPAK do të bëjë drejtësi për 21 janarin?



×

Lajmi i fundit

Eksperti i PD-së: Rënia e Euros rrit çmimet, qeveria të jetë më e kujdesshme me kursi

Eksperti i PD-së: Rënia e Euros rrit çmimet, qeveria të jetë më e kujdesshme me kursi