POP 5

Lajmet më të lexuara të 5 minutave të fundit

Kultura

Në Librari/ Katër titujt e rinj për këtë fundjavë, ‘Dy gratë e një burri’, ‘Theofan Popa - martir i shkencës’, ‘Demonët e demokracisë’, ‘Fshati me 13 sekrete’

Rubrika “Në Librari” përgatitur nga gazetarja Anila Dedaj vjen këtë fundjavë me katër tituj të rinj.

Titulli: “Dy gratë e një burri”

Autore: Laura Olldashi

Shtëpia Botuese: “Toena”

Çmimi: 1500 lekë

“Dy gratë e një burri” është libri i tretë i Laura Olldashit, ku përzgjedh tregime nga botimet e mëhershme “Atman” dhe “Asgjëja ime”, si dhe të tjera. Mjeke në profesion, në Itali ku emigroi në ’98-ën, letërsia për autoren është ‘vendi ku arratiset’ nga ritmet e shpejta të jetës.  Rrëfimet e saj gati surreale, vijnë si një kompozim artistik letrar, me sfondin në përvojën jetësore, dhe ngjyrime nga një larmishmëri artesh. Tregimtaria e Olldashit, sjell kështu përmes fantazisë një fllad të letërsisë së të ardhmes në vendin tonë.

Titulli: “Theofan Popa – martir i shkencës”

Autor: Grup Autorësh

Shtëpia Botuese: “Mediaprint”

Çmimi: 1500 lekë

Shumë objekte me vlerë që sot gjenden në muzeumet shqiptare, janë të koleksionuara, duke i shpëtuar shkatërrimit, nga Theofan Popa. Një grup autorësh (Pirro Thomo, Aleksandër Meksi, Kostandios Giakoumis, Sokol Çunga, Andi Rëmbeci, Era Xhaferaj dhe Anisa Ymeri) , e sjellin studiuesin e trashëgimisë sonë si “Martirin e Shkencës”. Pavarësisht rolit të tij të rëndësishëm në studimet e artit bizantin dhe postbizantin në muralet e mbishkrimet kishtare, ikonat dhe kodikët, diktatura e persekutoi pasi studiuesi teolog nuk mundi të mohojë besimin e tij në Zot dhe u akuzua për propagandë fetare.

Titulli: “Demonët e demokracisë”

Autor: Ago Nezha

Shtëpia Botuese: “Pex”

Çmimi: 1500 lekë

Një zë intelektual aktiv në jetën politike, sociale e kulturore në vendin tonë. Publicisti Ago Nezha prezantoi këtë javë botimet e tij “Ishim mirë kur ishim keq” dhe “Demonët e demokracisë” . Në shkrimet e tij ai ‘skanon’ problemet e shoqërisë shqiptare në mbi tre dekada demokraci, duke reflektuar mbi shkaqet e pasojat. Nga shkatërrimet e uzinave, tek aferat korruptive,  vesi, virtyti e komunikimi, refleksionet e autorit ndalen në fenomene por edhe individë konkretë.

Titulli: “Fshati me 13 sekrete”

Autor: Nadine Debertolis

Shtëpia Botuese: “Mediaprint”

Çmimi: 900 lekë

Është një aventurë plot argëtim e mesazhe, ajo e zbulimit të ‘thesareve’ që ndërmarrin Tesa dhe Dimitri, në rikthimin e tyre për pushime në shtëpinë e dajë Ustashit. Pas “Shtëpisë me 36 çelësa”, Lorena Dedja e sjell të përkthyer me mjeshtëri librin magjik të Nadine Debertolis “Fshati me 13 sekrete”, ku rrëfimi i pasur, ‘sugjestionon’ imazhe gati filmike. Protagonistët të nxitur nga një legjendë mbi të kaluarën e fshatit, nisin hap pas hapi të zbardhin misteret, duke u përballur me të vërteta të pabesueshme.

K.M/SI.E./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    23 Dhjetor, 23:33

    Opozita proteston duke paralizuar 3 orë Tiranën, si e vlerësoni?

Lajme të tjera



×

Lajmi i fundit

Kamberi: Nëse protestat 'shuhen', Vuçiç do e çojë Serbinë në diktaturë

Kamberi: Nëse protestat 'shuhen', Vuçiç do e çojë Serbinë në diktaturë

25 Dhjetor, 20:46