Nesër KQZ shqyrton mandatin e Fredi Belerit! Pr/vendimi: Të dënuarit për korrupsion në zgjedhje nuk mund të jenë kryebashkiakë

Komisioni Qendror i Zgjedhjeve do të marrë nesër në shqyrtim mandatin e kryetarit të zgjedhur të Bashkisë, tashmë të dënuar me 2 vite burg edhe nga Apeli i GJKKO, ndërsa në projektvendimin e KQZ, thuhet se Beleri nuk mund ta ushtrojë më mandatin për shkak të Dekriminalizimit.

Sipas vendimit të Gjykatës së Posaçme të Apelit për Korrupsionin dhe Krimin e Organizuar është vendosur: “Deklarimi fajtor i të pandehurve Pandeli Kokaveshi dhe Dhionisios (Alfred) Beleri, për kryerjen e veprës penale “Korrupsioni aktiv në zgjedhje” kryer në bashkëpunim dhe dënimin e tij me 2 (dy) vite burgim. ë këto rrethana vlerësohet se Beleri i zgjedhur Kryetar i Bashkisë Himarë nuk mund të ushtrojë këtë detyrë për shkak të ndalimit që vjen nga ligji 138/2015 “Për garantimin e integritetit të personave që zgjidhen, emërohen ose ushtrojnë funksione publike”.

Kjo lëvizje e KQZ vjen pak ditë pasi kreu i FRESH në Himarë i dërgoi një letër kryekomisionerit Ilirjan Celibashi që të kërkoi shpalljen e pavlefshmërisë së mandatit të Kryebashkiakut të zgjedhur të Himarës, Fredi Beleri si dhe shpalljen e zgjedhjeve të parakohshme.

Heqja e mandatit të Fredi Belerit do t’i japë fund ‘Odisesë’ në Bashkisë së Himarës.

Pas vendimit të KQZ do të jetë Presidenti Bajram Begaj që të shpallë datën e re të zgjedhjeve. Kreu i shtetit sipas Kodit Zgjedhor menjëherë pas njoftimit duhet të shpallë zgjedhjet e parakohshme jo më parë se 30 ditë dhe jo më vonë se 45 ditë nga shpallja e vakancës.

Fredi Beleri u arrestua në flagrancë teksa bënte pazare për votat vetëm 2 ditë para zgjedhjeve vendore të 14 majit të 2023. Ai i fitoi zgjedhjet nga burgu me një diferencë të lehtë votash, më pak se 20 vota, por për shkak të arrestit nuk mundi të ulej asnjë ditë në karrigen e kryebashkiakut dhe as të bënte betimin. Mandatin vijoi ta mbante kryebashkiaku në detyrë Jorgo Goro deri më 23 mars, kur po ashtu u arrestua me urdhër të SPAK pas një kallëzimi që Fredi Beleri kishte bërë për të për pronat në Himarë. Më pas detyrën e drejtimit të bashkisë e mori përkohësisht Blerina Bala ndërsa aktualisht Himara drejtohet nga nënkryetari i Bashkisë Arqile Bollano

(Kliko këtu për të lexuar dokumentin e plotë)

S.B/Shqiptarja.com

TAG:
• fredi beleri