Nesër pritet përkeqësim i motit, Drejtoria Portuale Vlorë ndalon daljen në det për disa mjete lundruese! Në Durrës bëhet thirrje për marrjen e masave

Duke filluar nga dita e nesërme, pritet që kthjellimet t’ua lënë vendin vranësirave dhe reshjeve të shiut që do të përfshijnë gjithë territorin e vendit. 

Drejtoria Portuale në Vlorë, bën me dije se nga data 16 janar deri më 19 janar do të ndalohet lundrimi i mjeteve të vogla lundruese si dhe anijeve të peshkimit që operojnë jashtë gjirit të Vlorës. 

Ndërsa kërkohet marrja e masave për sigurimin e mjeteve lundruese dhe anijeve të peshkimit që operojnë brenda gjirit të Vlorës. Sa u takon anijeve të transportit ndërkombëtar detar ato do të vazhdojnë të operojnë normalisht.

Në lidhje më këtë parashikim për përkeqësimin e motit, Drejtoria e Përgjithshme Detare ka paralajmëruar drejtuesit e mjeteve lundruese, që të marrin masat e nevojshme për sigurimin e mjeteve.

‘Njoftim për përkeqësim të motit! Në bazë të parashikimit për situatën hidrometeorologjike në datën për 16-17-18 Janar 2023 moti do të përkeqësohet duke filluar në orën 01:00 të datës 16 Janar 2023 përgjatë gjithë bregdetit Shqiptar. Era do të jetë me drejtimin Jug-JugPerëndim në forcën 6-7bft deri 8bft 15-25m/s dhe lartësi dallge nga 1.80 deri 3.50 metra.

Përmirësimi i situatës hidrometeorologjike të përkeqësuar për lundrimin e sigurtë për mjetet e vogla lundruese dhe të peshkimit do të jetë mbas datës 19 Janar 2023 ora 16:00. Me qëllim parandalimin e çdo situate të papritur për shkak të kushteve atmosferike kërkojmë bashkëpunimin e të gjithë subjekteve që ushtrojnë veprimtari në fushën e detarisë, për të marrë të gjitha masat e nevojshme për sigurimin e mjeteve por edhe rritje e gadishmerisë së ekuipazhit në mjetet lundruese.’- njofton drejtoria Detare.

Rendit zhvillimet sipas orarit:

Të Fundit Të Parat

M.Q./Shqiptarja.com

TAG:
• Vlore
• lundrim ne det
• moti
• Drejtoria Detare
• Durres